काठमाडौं । शेर्पा संस्कृतिमा निर्माण भईरहेको चलचित्र ‘कार्साङ’को छायांकन सम्पन्न भएको छ । यम शेर्पाले निर्देशनमा निर्माण भएको फिल्मको छायांकन २२ दिनमा सम्पन्न भएको हो । चलचित्रलाई सिन्धुपाल्चोकको बाह्रबिसे नगरपालिका, भोटेकोसी गाउँपालिका क्षेत्र आसपासमा छायाँकन गरिएको निर्देशक शेर्पाले बताए ।
‘चलचित्रको सम्पूर्ण टिम राम्रो रहेकाले सबैको मेहनतमा सोचेको भन्दा छोटो समयमै चलचित्रको छायांकन सम्पन्न गर्न पाइयो’, निर्देशक शेर्पाले भने, ‘अब पोस्टको काम सोही अनुरूप गर्दैछौँ, सोचे जस्तै भयो भने हामी आउँदो माघमा यो चलिचत्र रिलिज गर्नेछौं ।’
यो चलचित्रमा दयाहाङ राई, सिर्जना निङ्लेखु, जितु नेपाल, दिया मास्के, बुद्धि तामाङ, प्रेम लोप्चन, डोमा ह्योल्मो, सृष्टि गौतम, छोकी शेर्पा, सुरवीर पण्डित, कर्मा शेर्पाको अभिनय रहेनछ । बाल कलाकारमा राशी लिम्बु र सोहन थापाले अभिनय गरेका छन् ।
यो चलचित्रलाई पुरुषोत्तम प्रधानले निर्माण गरेका हुन् । सामाजिक कथावस्तुमा निर्माण भएको यो चलचित्रमा निर्देशक शेर्पा स्वयंको कथा, पटकथा तथा संवाद रहेको छ । यसअघि थुप्रै सर्ट फिल्म निर्देशन गरिसकेका शेर्पाको यो डेब्यु निर्देशकीय फिल्म हो ।
