इटहरी । इटहरीमा जारी स्व. कृष्णप्रसाद भट्टराई स्मृति गोल्डकपको सोमबार भएको पहिलो सेमिफाइनल खेलमा दमक एकेडेमी झापालाई सडन डेथमा पराजित गर्दै लोहोरुङ फुटबल क्लब संखुवासभा फाइनलमा प्रवेश गरेको छ ।
सडन डेथमा लोहोरुङका लागि मिलन लिम्बू र विदेशी खेलाडी अरमन्द बिएडोमले १–१ गोल गरे । दमकका लागि रोशन तामाङले १ गोल गर्दा रोशन धिमालको प्रहार पोस्टबाहिर गयो ।
निर्धारित समयमा १–१ गोल बराबरी भएपछि खेल टाइब्रेकरमा धकेलिएको थियो । निर्धारित समयको १६ मिनेटमा दमकका लागि गौरव धिमालको कर्नरमा किस्मत लिम्बूले १ गोल गर्दै टिमलाई अग्रता दिलाए । त्यसपछि दबाबमा परेको लोहोरुङका लागि खेलको ६७ औँ मिनेटमा दोर्जे तामाङले जवाफी गोल गरे ।
बराबरीमा गएपछि रोमाञ्चक बनेको खेलमा दुवै टिमबाट पटकपटक अवसर प्राप्त भएपनि गोल गर्न सकेनन् । खेल बराबरीमा गएपछि टाइब्रेकरमा धकेलिएको थियो । टाइब्रेकरमा लोहोरुङका लागि दोर्जे तामाङ, हेमन लिम्बू, धीरेन क्षेत्री, चरी लिम्बू र विदेशी खेलाडी बेफोरले गोल गरेका थिए । दमकका लागि आशिष लावती, अनुप सिवा, गौरव धिमाल, रोशन थाम्सुहाङ र किस्मत लिम्बूले गोल गरे ।
खेलको म्यान अफ दि म्याच लोहोरुङका जीवन लोहोरुङ घोषित हुँदै नगद पाँच हजार प्राप्त गरे ।
आयोजक द योङ ब्रदर्श क्लबका अध्यक्ष विजय सुब्बाका अनुसार मंगलबारको अन्तिम सेमिफाइनल खेल केराबारी फुटबल क्लब मोरङ र सिंहदेवी फुटबल क्लब धनकुटाबीच हुनेछ । प्रतियोगिताको विजेता टिमले नगद दुई लाख ५० हजार प्राप्त गर्ने सुब्बाले जनाए । उपविजेता टिमले नगद एक लाख ३० हजारमा चित्त बुझाउनेछ ।
अघिल्लो वर्ष विजेतालाई दुई लाख २२ हजार प्रदान गरिएको थियो भने उपविजेताले एक लाख ११ हजार रुपैयाँ प्राप्त गरेका थिए । तर, यस वर्ष पुरस्कार राशि बढाइएको उनले बताए ।
प्रतियोगितामा हरेक खेलको म्यान अफ दि म्याच हुने खेलाडीले नगद पाँच हजार प्राप्त गर्नेछन् । विधागततर्फ सर्वोत्कृष्ट खेलाडीलाई नगद १० हजार, उत्कृष्ट गोलरक्षकलाई नगद १० हजार, उत्कृष्ट डिफेन्डरलाई नगद १० हजार, उत्कृष्ट मिड फिल्डरलाई नगद १० हजार, उत्कृष्ट स्ट्राइकरलाई नगद १० हजार र सर्वाधिक गोलकर्ता खेलाडीलाई नगद १० हजारसहित ट्रफी र मेडलसहित प्रमाणपत्र वितरण गरिने खेल संयोजक एवम् क्लबका संरक्षक विकास केसीले जानकारी दिए ।
प्रतियोगितामा २२ लाख ५५ हजार रुपैयाँ खर्च हुने अनुमान गरिएको उनले जनाए ।
