काठमाडौं । नेपाली कांग्रेसको विभाजन रोक्ने हो भने पुसभित्र महाधिवेशन अनिवार्य भएको नेता शेखर कोइरालाले बताएका छन् । उनले केही नेताहरूले महाधिवेशन वैशाख वा सोभन्दा पनि ढिलो गर्ने अभिव्यक्ति दिएको प्रति असन्तुष्टि व्यक्त गर्दै पुसभित्रै महाधिवेशन सम्पन्न गर्नुपर्ने बताएका हुन् ।

बिहान विशालनगरस्थित सम्पर्क कार्यालयमा ४० भन्दा बढी युवाहरूसँगको कुराकानीमा कोइरालाले भने, ‘२०८२ मंसिरभित्रै महाधिवेशन हुनुपर्‍यो भन्ने कुरा मैले पहिलेदेखि नै भन्दै आएको हुँ । अहिले नियमित अधिवेशनको परिभाषा कोही वैशाख भन्छन्, कोही त्यसपछि पनि भन्छन् । मेरो कुरा अहिले पनि त्यही छ – मंसिरको सट्टा पुसभित्रै महाधिवेशन गरौं ।’

यदि पुस मसान्तभित्र १५ औं महाधिवेशन हुन नसके विशेष महाधिवेशनमा जानुपर्ने उनको भनाइ छ । तर, विशेष महाधिवेशनमा जाँदा असोज २९ गते ५४ प्रतिशत महाधिवेशन प्रतिनिधिहरूले बुझाएको हस्ताक्षर सनाखत गराएर भन्दा पनि केन्द्रीय समितिबाट सर्वसम्मत निर्णय गरेर जानु उपयुक्त हुने कोइरालाले बताए ।

‘पुसभित्रै नियमित महाधिवेशन हुन सकेन भने केन्द्रीय समितिबाट विशेष महाधिवेशनमा जाने निर्णय गर्ने । बहुमतका आधारमा होइन, केन्द्रीय समितिले सर्वसम्मत निर्णय गर्ने र विशेष अधिवेशनमा जाने,’ कोइरालाले भने, ‘यसो गरियो भने विवाद कम हुन्छ र पार्टीलाई फुटबाट बचाउँदै एकताबद्ध बनाउन सकिन्छ ।’

असोज २९ गते ५४ प्रतिशत महाधिवेशन प्रतिनिधिहरूले विशेष महाधिवेशन माग गर्दै कार्यवाहक सभापति पूर्णबहादुर खड्कालाई हस्ताक्षर बुझाएका थिए । ती हस्ताक्षर सनाखत गराउन सुरु गरेमा पार्टी विभाजनमा जान सक्ने दाबी गर्दै कोइरालाले विवादरहित बनाउन केन्द्रीय समितिले नै विशेष महाधिवेशनमा जाने निर्णय लिनुपर्ने बताए ।

नेविसंघ केन्द्रीय सदस्य भुवन भट्टले कोइरालालाई उद्धृत गर्दै भने, ‘तपाईं युवाहरूले पार्टी विभाजन भएको देख्नुभएको छैन । मैले त आँखैअगाडि पार्टी विभाजन भएको देखेको छु, अहिले हस्ताक्षर सनाखत गराउन थाल्ने हो भने विभाजन हुन सक्छ, म पार्टी विभाजनको पक्षमा छैन ।’

सम्बन्धित समाचार

जेनजी समूहले मतदाता संकलनमा सघाउँदै विशेष महाधिवेशनवारे गगन पक्ष कानुनी परामर्शमा मधेश प्रदेश प्रमुख पदमुक्त, जनकपुरधाममा तनाव संविधान सुधारदेखि ‘नो भोट’को अधिकार माग्दै प्रधानमन्त्रीलाई जेनजीको ज्ञापन कहीँ नभएको जात्रा मधेस प्रदेशमा दुर्गा प्रसाईंको नागरिक बचाउ दलले गर्‍यो निर्वाचन आयोग पुगेर सनाखत