धनगढी । धनगढी उपमहानगरपालिकाका मेयर (नगर प्रमुख) गोपाल हमालले सरकारी सेवा सुविधाबाट प्राप्त रकम सामाजिक क्षेत्रमा खर्च गर्दै आएका छन् । शुक्रबार आयोजित पत्रकार सम्मेलनमा उनले पाँच आर्थिक वर्षमा प्राप्त सेवा सुविधासहित व्यक्तिगत रकम थप गरी कुल ४४ लाख रुपैयाँ सामाजिक काममा खर्च गर्ने बताएका हुन् ।

५ वर्षमा ११ हजार विद्यार्थी लाभान्वित

नगर प्रमुख हमालका अनुसार पाँच आर्थिक वर्षमा उनले सेवा सुविधाबापत ३८ लाख ८२ हजार ८ सय ७३ रुपैयाँ प्राप्त गरेका छन् । त्यसमध्ये ५ लाख १७ हजार १ सय २६ रुपैयाँ व्यक्तिगत रूपमा थप गरी सामाजिक क्षेत्रमा लगानी गर्ने घोषणा गरेका हुन् ।

नगर प्रमुख हमालले सार्वजनिक शिक्षा सुधार, विपन्न तथा ग्रामीण क्षेत्रका विद्यार्थीको शिक्षामा पहुँच विस्तार, गौ संरक्षण तथा विभिन्न सामाजिक संस्थालाई सहयोग गर्दै आएका छन् ।

आर्थिक वर्ष २०७८/७९ मा उनले सेवा सुविधाबाट प्राप्त १ लाख ३७ हजार २ सय ७३ रुपैयाँमध्ये गौ संरक्षणका लागि ५५ हजार ६ सय ८७ रुपैयाँ तथा दक्षिणकाली आधारभूत बहिरा आवासीय विद्यालयलाई ८१ हजार ५ सय ८६ रुपैयाँ सहयोग गरेका थिए ।

यस्तै, आर्थिक वर्ष २०७९/८० मा प्राप्त ९ लाख ३६ हजार ४ सय रुपैयाँ दृष्टि फाउन्डेशन, मानव सेवा आश्रम, आमाको माया छात्रावास, अपाङ्ग संघ, दक्षिणकाली बहिरा विद्यालय तथा पञ्चोदय माध्यमिक विद्यालयलाई वितरण गरिएको उनले बताए । सोही वर्ष उनले २ लाख ६७ हजार ८ सय रुपैयाँ बराबरको लुगासमेत सहयोग गरेका थिए ।

नगर प्रमुख हमालले सार्वजनिक गरेको विवरणअनुसार आर्थिक वर्ष २०८०/८१ मा ९ लाख ९२ हजार ६ सय ५ रुपैयाँ बराबरको शैक्षिक सामग्री वितरण गरिएको थियो । उनले सो वर्ष सरकारी सेवा सुविधाबाट प्राप्त रकममार्फत सामुदायिक विद्यालयका ३ हजार ४ सय ८९ विद्यार्थीलाई शैक्षिक सामग्री उपलब्ध गराएको बताए ।

उनले ग्रामीण क्षेत्रका विद्यार्थीलाई प्राथमिकतामा राखेर सहयोग गर्दै आएको उल्लेख गर्दै भने, ‘रोजगारीको सुविधा नभएका क्षेत्रका विद्यालयका विद्यार्थीलाई सहयोग गर्दै आएको छु । शिक्षकहरूको सुझावका आधारमा यो अभियान चलाइएको हो । बुवाको पाइन्टमा डोरी बाँधेर विद्यालय आउने विद्यार्थी देखेपछि यो काम सुरु गरेको हुँ ।’

आर्थिक वर्ष २०८१/८२ मा प्राप्त ९ लाख ३६ हजार ४ सय रुपैयाँ सेवा सुविधासहित १ लाख रुपैयाँ व्यक्तिगत रकम थप गरेर उनले १० लाख रुपैयाँ बराबरको शैक्षिक सामग्री वितरण गरेका छन् । उक्त रकमबाट ४७ सामुदायिक विद्यालयका ७ हजार ४ सय ७५ विद्यार्थी लाभान्वित भएको उनले जानकारी दिए ।

नगर प्रमुख हमालका अनुसार चालु आर्थिक वर्षसम्म उनले सेवा सुविधाबापत कुल ३८ लाख ८२ हजार ८ सय ६३ रुपैयाँ प्राप्त गर्नेछन् । हालसम्म २३ लाख ९० हजार ८ सय ८७ रुपैयाँ सामाजिक क्षेत्रमा खर्च भइसकेको र १४ लाख ८५ हजार १ सय ९५ रुपैयाँ बाँकी रहेको उनले बताए । बाँकी रकमसमेत चालु शैक्षिक सत्रभित्र शैक्षिक सामग्री वितरणमा खर्च गरिने उनले जानकारी दिए ।

नगर प्रमुख पदका लागि निर्वाचन लड्दा उनले सरकारी सेवा सुविधा र सवारी साधन नलिने घोषणा गरेका थिए ।

सम्बन्धित समाचार

धनगढी उपमहानगरले गर्‍यो फोहोर व्यवस्थापनलाई औपचारिक पाठ्यक्रममा समावेश ‘हाम्रो धनगढी, सफा धनगढी’ मा बढ्दो जनसहभागिता विपिन जोशीको परिवारलाई सरकारले १० लाख सहयोग गर्ने पर्यटन प्रवद्र्धनका लागि धनगढीको टोली अपि हिमाल बेस क्याम्पतर्फ सुदूरपश्चिम विश्वविद्यालयको तीन सय बिघा जग्गा अतिक्रमण पूर्वाधार विकासमा गति लिँदै बेदकोट नगरपालिका सरकारले गुणस्तरीय शिक्षामा जोड दिइरहेको छ: मुख्यमन्त्री शाह लालपूर्जा तथा खोसिएको अधिकार माग्दै नगरवासी उत्रे सडकमा