सगरमाथा आरोही ५ चलचित्रकर्मीसहित ३१ चलचित्र सम्मानित

काठमाडौं । चलचित्र विकास बोर्डले विभिन्न चलचित्र एवम् चलचित्रकर्मीलाई सम्मानित तथा पुरस्कृत गर्दै आफ्नो २६ औँ वार्षिक उत्सव मनाएको छ । बोर्डले मंगलवार बोर्डको सभा हलमा २६ औँ वार्षिक उत्सव समारोह आयोजना गर्दै सम्मान एवम् पुरस्कार प्रदान गरेको हो ।

विगत २५वर्ष भित्र सगरमाथा आरोहण गर्ने ५ जना चलचित्रकर्मीलाई समारोहमा सम्मानित गरियो । ‘सगरमाथा आरोहण सम्मान’बाट अभिनेत्रीहरू निशा अधिकारी, कविता नेपाली, रोजिता बुद्धाचार्य, अभिनेता अर्जुन कार्की र मेकअप आर्टिष्ट निलम पौडेललाई समारोहमा सञ्चार तथा सूचना प्रविधि मन्त्री डा. विक्रम तिमल्सिना, सञ्चार मान्त्रालयकी सचिव लक्ष्मीकुमारी बस्नेत र बोर्ड अध्यक्ष दिनेश डिसीले सम्मानित गरेका हुन् ।

चलचित्र विकास बोर्डले केही महिना अघि लघु चलचित्र, वृत्तचित्र प्रतियोगिताको आह्वान गरेको थियो । सो प्रतियोगितामा सहभागी लघु चलचित्र एवम् वृत्तचित्र मध्येबाट उत्कृष्टलाई सो समारोहमा पुरस्कृत गरियो । लघु चलचित्र तर्फ कमल एक्चै मगर निर्देशित ‘बाछिटा’ले प्रथम हुँदै १ लाख ५० हजार जित्यो । यस्तै लघु चलचित्रमै अमन श्रेष्ठ र डार्विन श्रेष्ठको ‘आई सि यु’ले द्वितीय हुँदै १ लाख रुपैयाँ र कुलुङ चलचित्र संघको कुलुङ भाषाको लघु चलचित्र ‘सिक्खुम’ले तृतीय पुरस्कार र ७५ हजार रुपैयाँ प्राप्त ग¥यो ।

सोही समारोहमा उत्कृष्ट वृत्तचित्रको पुरस्कार १ लाख रुपैयाँ सहित अनुपमा अमात्य निर्देशित ‘काठमाडौँ’ले जित्यो भने बिपना तामाङ भुजेल निर्देशित भुजेल भाषाको वृत्तचित्र ‘चोबो ल्यांम योङ हौ सम्मुख कर्म’ले ७५ हजार रुपैयाँ सहित द्वितीय पुरस्कार र भगवती कुमारी मैनाली उप्रेती निर्देशित ‘योगमाया खोज’ वृत्तचित्रले ५० हजार रुपैयाँसहित तृतीय पुरस्कार हासिल ग¥यो । यो प्रतियोगिताको निर्णायक संयोजकमा रमेश बुढाथोकी एवम् निर्णायकहरूमा करुण थापा, एन.वि. महर्जन, दीपेन्द्र के खनाल, सुचित्रा श्रेष्ठ थिए ।

यस्तै चलचित्र विकास बोर्ड स्थापना भएको वर्ष अर्थात २६ वर्ष यताबाट ७ करोड भन्दा माथिको व्यापार पर्ने ३१ वटा चलचित्रलाई यस वार्षिक उत्सव समारोहमा ‘स्वदेशी चलचित्र प्रवर्धन सम्मान’बाट सम्मानित गरियो । २६ वर्ष यता रिलिज भएर ७ करोड भन्दा माथि व्यापार गरि सम्मानित हुने चलचित्रहरूमा पूर्णबहादुरको सारंगी, कबड्डी ४, १२ गाउँ, परान, छक्का पन्जा ४, जारी, छक्का पन्जा १, महाजात्रा, छक्का पन्जा ५, कोहिनुर, छक्का पन्जा २, आ बाट आमा, शत्रु गते, जेरी अन टप, उनको स्वीटर, कबड्डी कबड्डी, बोक्सीको घर, छ माया छपक्कै, लाली बजार, लुट २ रहेको छ । यस्तै चलचित्र दिमाग खराब, अन्जिला, परदेशी २, छक्का पन्जा ३, प्रेमगीत ३, कबड्डी कबड्डी कबड्डी, पुजार सार्की, महापुरुष, कबड्डी, पशुपति प्रसाद २ (भस्मे डन) र आगोलाई पनि ७ करोड भन्दा माथिको व्यापार गरेबापत ‘स्वदेशी चलचित्र प्रवर्धन सम्मान’बाट सम्मानित गरियो ।

यस्तै स्टोरी बैंकमा उत्कृष्ट भएको स्कृप्ट ‘सुरिलो रुख’लाई ४ लाख रुपैयाँ प्रदान गरियो । यो चलचित्रका निर्माता प्रेम प्रसाद अधिकारी र निर्देशक निराकर भक्त राईलाई सो रकम सञ्चार मन्त्री तिमल्सिनाले वार्षिक उत्सव समारोहमा प्रदान गरेका हुन् । चलचित्र विकास बोर्डका दुई कर्मचारी नासु जागेश्वर नेपाली र खरिदार त्रिलोचन थापालाई सम्मान प्रदान गर्दै समारोहमा मन्त्री तिमल्सिनाले ‘बोर्डको वार्षिक गतिविधि र सिनेपा’ पुस्तक पनि विमोचन गरे । उनले सोही समारोहमा चलचित्र विकास बोर्डद्वारा सञ्चालित ‘सिनेपा : एप’को फुल भर्सनको पनि उद्घाटन गरे ।

समारोहलाई सम्बोधन गर्दै सञ्चार मन्त्री डा. तिमल्सिनाले लामो समयदेखि चलचित्रकर्मीहरूको प्रतीक्षामा रहेको राष्ट्रिय चलचित्र ऐन अब चाँडै प्रतिनिधि सभाबाट पारित हुने बताए । ऐनमा समेट्नु पर्ने भनेर हालै लिइएको सुझावलाई समेटेर यसलाई पारित गर्ने तयारी भइरहेको उनले बताए । नेपाली चलचित्रको प्रवर्धनमा सरकारसँगै चलचित्रकर्मीहरूको साथमा रहेको पनि उनले बताए । उनले बोर्डलाई २६ औँ वार्षिक उत्सवको शुभकामना दिँदै नयाँ ऐन आएपछि बोर्डबाट चलचित्रकर्मीहरूको धेरै समस्या सम्बोधन हुने विश्वास व्यक्त गरे ।

चलचित्र विकास बोर्डका अध्यक्ष दिनेश डिसीले आफू बोर्डमा नियुक्त भए यता २२ महिनामा गरिएको कार्यहरूको जानकारी गराए । बोर्डमा अब आफू रहनु पर्ने समय निकै कम रहेको र गर्नु पर्ने केही महत्त्वपूर्ण कामहरू बाँकी रहेको स्मरण गराए ।

सम्बन्धित समाचार

नेपालमा पनि बन्न थाल्यो पुरानो चलचित्रको ‘रिमेक’ मौलिक खानासँगै काठमाडौंको टोल टोलमा चलचित्र महोत्सव पर्यटकीयस्थल घोडेपानी-पुनहिलमा साइकल मार्ग आजको मन्त्रिपरिषद् बैठकका यस्ता छन् निर्णय विदेशमा नेपाली चलचित्रको कमाई स्वदेश भित्राउन चोर बाटो नेपालमा एनिमेसन चलचित्रको छुट्टै महोत्सव हुँदै ‘झिंगे दाउ २’को मार्मिक गीत ‘महिमा आमाको’ सार्वजनिक उत्पादनमा आधारित उद्योगलाई सरकारले प्रोत्साहन गर्छः मुख्यमन्त्री बानियाँ