काठमाडौं । परिवारको उज्ज्वल भविष्य बनाउने सपना बोकेर रोजगारीका लागि माल्टा पुगेका नेपाली युवा तारासिंह बोहरा अब कहिल्यै आफ्ना प्रियजनसँग बोल्न वा मुस्कुराउन फर्किने छैनन्। उहाँको निस्प्राण शरीर भने अन्ततः आफ्नै जन्मभूमिको काखमा फर्किने भएको छ।

गैरआवासीय नेपाली संघ (एनआरएनए) राष्ट्रिय समन्वय परिषद्, माल्टाका अनुसार आवश्यक सम्पूर्ण कानुनी तथा प्रशासनिक प्रक्रिया पूरा गरी १० जुलाई २०२६ मा स्वर्गीय बोहराको पार्थिव शरीर नेपाल पठाइएको छ। उहाँको पार्थिव शरीर आगामी १२ जुलाईको बिहान काठमाडौं आइपुग्ने जनाइएको छ।

विदेशको भूमिमा भएको यो दुःखद घटनापछि पार्थिव शरीर स्वदेश ल्याउने प्रक्रिया सहज थिएन। अनेक कानुनी, प्रशासनिक र व्यवस्थापकीय चुनौतीबीच अन्ततः उहाँलाई आफ्नै मातृभूमिमा अन्तिम बिदाइ गर्न सकिने भएको छ। यो खबरले एकातिर परिवारका आँखा रसाएका छन् भने अर्कोतर्फ स्वदेश फर्किने उहाँको यात्रा यसरी हुनेछ भन्ने कसैले कल्पना पनि गरेको थिएन।

यस पीडादायी घडीमा एनआरएनए माल्टाले दिवंगत आत्माको चिरशान्तिको कामना गर्दै शोकाकुल परिवार, आफन्तजन र सम्पूर्ण शुभेच्छुकप्रति गहिरो समवेदना व्यक्त गरेको छ। साथै पार्थिव शरीर स्वदेश फर्काउने कठिन अभियानमा प्रत्यक्ष वा अप्रत्यक्ष रूपमा साथ दिने सबैप्रति हार्दिक कृतज्ञता प्रकट गरेको छ।

विशेषगरी माल्टावासी नेपाली समुदाय, त्यहाँ क्रियाशील नेपाली संघ–संस्था, सम्बन्धित निकाय, स्वयंसेवक तथा सहयोगी हातहरूले देखाएको मानवीय संवेदना, एकता र सहकार्यले कठिन परिस्थितिमा परिवारलाई ठूलो सहारा दिएको परिषद्ले जनाएको छ।

यसैबीच, स्वर्गीय बोहराको शोकाकुल परिवारलाई आर्थिक रूपमा केही राहत पुर्‍याउने उद्देश्यले सञ्चालन गरिएको गो गेट फण्ड अभियान अझै केही दिन जारी रहने जानकारी पनि परिषद्ले दिएको छ। सहयोग गर्न चाहने महानुभावहरूले अभियानमार्फत आफ्नो साथ र सहयोग निरन्तर गर्न सक्नेछन्।

विदेशमा पसिना बगाएर परिवारको भविष्य उज्यालो बनाउने सपना बोकेका एक नेपालीको जीवन यसरी असामयिक रूपमा अन्त्य हुनु केवल एउटा परिवारको पीडा मात्र होइन, सिंगो नेपाली समुदायको साझा दुःख बनेको छ। अब उहाँका प्रियजनले प्रतीक्षा गर्नेछन्—तर त्यो भेट मुस्कानको होइन, अन्तिम बिदाइको हुनेछ।

सम्बन्धित समाचार

विदेशी भूमिमा जीवनसँग लड्दै गरेकी नरमाया अन्ततः घरदेश फर्किइन् ममतालाई घरमै पुगेर दिइयो नागरिकता दुई आईजी कार्की र पौडेल आज अमेरिका जाँदै चलचित्र निर्माणमा उत्रिए यी संगीतकार एकीकरण वा नयाँ राजनीतिक दल गठनवारे कांग्रेस संस्थापनइतरमा बहस बञ्जीजम्पप्रति भारतीय पर्यटकको आकर्षण बढ्दो सशस्त्रले ‘विशेष अधिकार’सहित चार एसएसपीलाई फिल्डमा खटायो, तत्काल कारबाही गर्न सक्नेसम्मको अधिकार ‘आक्रोशको आगो’ मा सदाका लागि जले नेपाली