उदयपुर । कोशी प्रदेश प्रमुख परशुराम खापुङले नेपाल विभिन्न जातजाति, भाषाभाषी, धर्म र संस्कृतिका समुदायको साझा फूलबारी भएको बताएका छ । उनले विविधता बीचको एकता नेपालको मौलिक पहिचान भएकाले सबै समुदाय बीच आपसी सद्भाव, धार्मिक सहिष्णुता र राष्ट्रिय एकता कायम गर्नु पर्नेमा जोड दिए ।

उदयपुरको त्रियुगा नगरपालिका–२, जोगिदहस्थित शिवालय मन्दिर धार्मिक वन समूहमा निर्मित शिवलिङ्गको सोमवार एक कार्यक्रमका बीच उदघाटन गर्दै प्रदेश प्रमुख खापुङले यस्तो बताएको हो । उनले नेपालमा विभिन्न जातजाति र भाषाभाषीको बसोबास रहेको तथा विभिन्न धर्म मान्ने समुदायहरू पनि मिलेर बसेको उल्लेख गर्दै सबै धर्म, संस्कृति र परम्पराको सम्मान गर्नु पर्ने बताए ।

फरक जाति, भाषा र धर्मलाई विभाजनको आधारमा नभई राष्ट्रिय एकताको आधार बनाउनु पर्ने उनको भनाइ थियो । नेपाल विभिन्न जातजाति र भाषाभाषी बसोबास गर्ने साझा फूलबारी हो,” प्रदेश प्रमुख खापुङले भने, “यो साझा फूलबारीमा विभिन्न जातका फूलहरू फुल्न पाउनु पर्दछ । त्यसका लागि आपसी सद्भाव, एकता र धार्मिक सहिष्णुता कायम गर्दै राष्ट्रिय एकतालाई बलियो बनाउनु आजको आवश्यकता रहेको औल्याए ।

नेपालको सामाजिक संरचना विविधतापूर्ण रहेको उल्लेख गर्दै उनले यही विविधता भित्र एकता कायम गर्न सके मुलुकको सामाजिक तथा सांस्कृतिक सम्बन्ध अझ बलियो बन्ने बताए । धार्मिक आस्था र संस्कृतिका विषयमा एक अर्का प्रति सम्मान र सहिष्णुताको भावना विकास गर्न आवश्यक रहेको उनको भनाइ थियो ।

प्रदेश प्रमुख खापुङले धार्मिक तथा सांस्कृतिक स्थलहरूको संरक्षणले स्थानीय समुदाय बीचको सम्बन्धलाई समेत मजबुत बनाउने बताए । यस्ता स्थलहरू धार्मिक आस्थाका केन्द्र मात्र नभई सामाजिक सद्भाव, सांस्कृतिक पहिचान र समुदाय बीचको सहकार्यका आधार समेत बन्न सक्ने उनले उल्लेख गरे । उनले कुनै पनि धर्म, जात वा समुदाय प्रति विभेद गर्ने प्रवृत्तिको अन्त्य गर्दै सबै नागरिकले समान रूपमा सम्मान र अपनत्व महसुस गर्ने वातावरण निर्माण गर्नु पर्नेमा जोड दिए । समाजमा शान्ति, सद्भाव र सहिष्णुता कायम राख्न राजनीतिक नेतृत्व, सामाजिक संघसंस्था, धार्मिक समुदाय तथा नागरिकको साझा भूमिका आवश्यक रहेको उनले बताए ।

प्रदेश प्रमुख खापुङले नेपालको राष्ट्रिय एकता कुनै एक जाति, भाषा वा धर्मको पहिचानमा मात्र सीमित नभई सबै समुदायको साझा सहभागिता र अपनत्वबाट निर्माण हुने धारणा व्यक्त गरे । फरक–फरक पहिचान, संस्कृति र धार्मिक आस्थालाई सम्मान गर्दै अघि बढ्न सके मात्र समृद्ध, समावेशी र सुदृढ राष्ट्र निर्माण गर्न सकिने उनँको भनाइ थियो ।

शिवालय मन्दिर धार्मिक वन समूहमा निर्मित शिव लिङ्गको उदघाटनसँगै प्रदेश प्रमुख खापुङले धार्मिक तथा सांस्कृतिक सम्पदाको संरक्षण र विकासमा स्थानीय समुदायको सक्रिय सहभागिता आवश्यक रहेको समेत बताए । उनले धार्मिक सहिष्णुता, सामाजिक सद्भाव र राष्ट्रिय एकतालाई व्यवहारमै स्थापित गर्दै सबै समुदाय बीचको सम्बन्ध थप प्रगाढ बनाउनु पर्नेमा जोड दिए ।

नेपालमा हिन्दू, बौद्ध, किराँत, मुस्लिम, इसाई लगायत विभिन्न धर्मावलम्बी समुदायको बसोबास रहेको उल्लेख गर्दै प्रदेश प्रमुख खापुङले सबै धर्म र संस्कृतिको सम्मान गर्नु पर्ने बताए । धार्मिक आस्थाका आधारमा विभेद वा द्वन्द्व सिर्जना हुन नदिन एक अर्काको धर्म, संस्कृति, परम्परा र विश्वासप्रति सम्मानको भावना विकास गर्नु पर्नेमा जोड दिए ।

त्यसैगरी त्रियुगा नगरपालिका नगर प्रमुख बसन्तकुमार बस्नेतले धर्मको नाममा धार्मिक द्वेष फैलाएर आङ्खनो व्यक्तिगत स्वार्थ पूरा गर्ने प्रवृत्तिको अन्त्य गर्नु पर्ने बताएका छन् । उनले त्यस्ता गतिविधिमा संलग्न व्यक्तिलाई समाजले निरुत्साहित गर्दै सामाजिक रूपमा तिरस्कार गर्नु पर्नेमा जोड दिए ।

सम्बन्धित समाचार

झापामा लगत सङ्कलनदेखि धनीपुर्जा वितरणसम्मका कार्य तीव्र धिमाल समुदायको मातृभाषा संरक्षणमा जोड कार्यस्थलमा स्तनपान कक्षको अभाव मिलापत्रमै टुङ्गिन्छन् सम्बन्धविच्छेदका अधिकांश मुद्दा लैङ्गिक हिंसासम्बन्धी उजुरीमा अन्तरमन्त्रालय समन्वय आश्रयविहीनहरूको सहारा बन्दै मानवसेवा आश्रम पौडी खेल्ने क्रममा ३ दाजुभाइको डुबेर मृत्यु महेन्द्र कार्कीद्वारा गौशालामा ३ सय जनालाई खीर भोजन