धनगढी । सुदूरपश्चिम प्रदेशका मुख्यमन्त्री खगराज भट्टले भोलि बुधबार प्रदेशसभाबाट विश्वासको मत लिने तयारी गरेका छन् । सोमबार मुख्यमन्त्री निवासमा भएको छलफलपछि विश्वासको मत लिने निर्णय भएको हो ।

यस विषयमा आज दिउँसो २ बजे नेकपा संसदीय दलको बैठक बस्दैछ । बैठकबाट विश्वासको मत लिने विषयमा आवश्यक निर्णय गरिने मुख्यमन्त्रीसँग छलफलमा रहेका एक सांसदले बताए ।

शुक्रबार मुख्यमन्त्रीमा नियुक्त भएका भट्टले विश्वासको मत लिएलगत्तै प्रदेश सरकारलाई पूर्णता दिने तयारी गरेका छन् । हाल नेकपाबाट ३ मन्त्री र १ राज्यमन्त्री नियुक्त भइसकेका छन् । सरकारलाई पूर्णता दिने क्रममा अब नेकपाबाट थप ३ मन्त्री र २ राज्यमन्त्री नियुक्त गर्ने तयारी छ ।

विश्वासको मतपछि मन्त्रालयको जिम्मेवारी बाँडफाँट र बाँकी मन्त्री तथा राज्यमन्त्री नियुक्तिको प्रक्रिया अघि बढाइने छ । विश्वासको मत र सरकार विस्तारका विषयमा नेकपा संसदीय दलका नेता एवं मुख्यमन्त्री भट्ट र नेकपा प्रदेश इन्चार्ज भानुभक्त जोशीबीच संयुक्त छलफल भएको थियो ।

त्यसअघि प्रदेश संयोजक हरि चौधरी, नेतृ रञ्जिता श्रेष्ठ, इन्चार्ज जोशी र मुख्यमन्त्री भट्टबीच पनि विश्वासको मतका विषयमा छलफल भएको थियो । प्रदेश करिब एक महिनादेखि आंशिक बजेट शून्यतामा रहेकाले सरकार विस्तारपछि बजेट ल्याउने प्रक्रिया पनि छिटो अघि बढ्ने अपेक्षा गरिएको छ ।

सम्बन्धित समाचार

सुदूरपश्चिमका रास्वपा सांसदले प्रधानमन्त्रीलाई के-के समस्या सुनाए ? सुदूरपश्चिमका मुख्यमन्त्री शाहले आज विश्वासको मत लिँदै सुदूरपश्चिमका मुख्यमन्त्री शाहले दिए राजीनामा सुदूरपश्चिम सरकार गठन : भोलि बिहान ११ बजेभित्र दाबी पेस गर्न आह्वान सुदूरपश्चिम प्रदेशमा नेकपाका खगराज भट्ट मुख्यमन्त्री नियुक्त सुदूरका मुख्यमन्त्री भट्टले लिए शपथ पूर्वाधारमन्त्री लम्साललाई हेलिकप्टरमार्फत धनगढी लगियो सरकारका प्रवक्ताले आज पत्रकारहरूसँग राजनीतिक विषयमा अन्तरक्रिया गर्ने