काठमाडौँ । भीषण बाढी तथा पहिरोबाट प्रभावित क्षेत्रमा मृत्यु भएका ७५२ जनाको शव फेला परेको छ। राष्ट्रिय विपद् जोखिम न्यूनीकरण तथा व्यवस्थापन प्राधिकरणले दिउँसो १ बजेसम्मको विवरण सार्वजनिक गर्दै मृत्यु पुष्टि भएकाको संख्या ७५२ पुगेको जनाएको हो।

प्राधिकरणका अनुसार सबैभन्दा धेरै शव चितवनमा भेटिएका छन्। चितवनमा २५९, नवलपरासी पूर्वमा १८४, नवलपरासी पश्चिममा १००, गोरखामा ५८, नुवाकोटमा ५२, धादिङमा ५०, तनहुँमा ३६ तथा रसुवामा १३ जनाको शव फेला परेको छ।

विपद्का घटनामा २३९ जना घाइते भएका छन्। उनीहरूको विभिन्न स्वास्थ्य संस्थामा उपचार भइरहेको प्राधिकरणले जनाएको छ।

बाढीपछि २ हजार ५०२ जना अझै सम्पर्कविहीन रहेका छन्। यसमध्ये जलविद्युत् आयोजनामा कार्यरत ९३३ जना रहेका छन्। त्यस्तै, ५९२ विदेशी नागरिक र उनीहरूसँग रहेका १२७ नेपाली नागरिकको अवस्था अझै अज्ञात रहेको विवरणमा उल्लेख छ।

स्थानीयतर्फ रसुवाका ५६२ र नुवाकोटका ११५ जना सम्पर्कविहीन छन्। उद्धार तथा राहतमा परिचालित सुरक्षाकर्मीमध्ये पनि केही सम्पर्कमा आउन सकेका छैनन्। प्राधिकरणका अनुसार नेपाली सेनाका ४५, नेपाल प्रहरीका २५ र सशस्त्र प्रहरीका १३ जना सुरक्षाकर्मी बेपत्ता छन्।

यसबीच ८ हजार ७३० जनाको जीवित उद्धार गरिएको छ। उद्धार गरिएकामध्ये सशस्त्र प्रहरीले ३५७, नेपाली सेनाले २ हजार ९७४ र नेपाल प्रहरीले २ हजार ६९९ जनालाई उद्धार गरेका छन्।

जलविद्युत् आयोजनाका सुरुङमा फसेका २७९ जनालाई हेलिकप्टरमार्फत बाहिर निकालिएको प्राधिकरणले जनाएको छ। समग्र हवाई उद्धार अभियानबाट २ हजार ८४५ नेपाली तथा २३६ विदेशी नागरिकलाई सुरक्षित स्थानमा ल्याइएको छ।

विपद् प्रभावित क्षेत्रमा खोज तथा उद्धार अभियानलाई निरन्तरता दिन ठूलो संख्यामा सुरक्षाकर्मी परिचालन गरिएको छ। प्राधिकरणका अनुसार नेपाली सेनाका ८ हजार ३१९, नेपाल प्रहरीका ७ हजार २९३ र सशस्त्र प्रहरी बलका ४ हजार २०३ गरी १९ हजार ८९५ सुरक्षाकर्मी उद्धार तथा खोजी कार्यमा खटिएका छन्।

सम्बन्धित समाचार

उद्धारका लागि ड्रोन उडाउन अनुमति लिनु नपर्ने भूकम्पपछि हिमपहिरो फुट्दा बाढी आएको प्रारम्भिक सूचना: परराष्ट्र मन्त्री नेपालको छोचेन र पुरेपु साङपो नदीमा कृतिम ताल बनेको छ, ३ दिनमा फुटन् सक्छ : चिनियाँ जलस्रोत मन्त्रालय बाढीमा ज्यान गुमाएका १०२ जनाको डीएनए परीक्षण र पहिचान प्रक्रिया सुरु प्रहरी प्रधान कार्यालयलाई नेपाल चेम्बरले दियो १७ वटा सर्भिलेन्स ड्रोन भोटेकोशीमा बाढीको जोखिम कायमै रसुवा बाढी अपडेट : ६ सय २६ जनाको शव फेला, २ हजार ४२६ जना अझै सम्पर्कविहीन भोटेकोसी-त्रिशूली बाढीमा ज्यान गुमाउनेकाे संख्या ६६९ पुग्याे