काठमाडौं । प्रतिनिधिसभाको आजको बैठकमा पूर्वप्रधानन्यायाधीश चोलेन्द्र शमशेर जबराको पक्राउ र रिहाइको विषयले प्रवेश पाएको छ । आजको बैठकमा बोल्ने विपक्षी सांसदले पूर्वप्रधानन्यायाधीश जबरा पक्राउको चर्काे विरोध गरेका छन् ।

नेकपा एमालेले पूर्वप्रधानन्यायाधीश जबराको गिरफ्तारीलाई सरकारको राज्य आतंक र बर्बर नमुना भएको बताएको छ । प्रतिनिधिसभाको बैठकमा आकस्मिक समयमा बोल्दै एमाले प्रमुख सचेतक ऐनबहादुर महरले सरकारको पछिल्लो कदमप्रति आपत्ति जनाए ।

१० असोजको राति पूर्वप्रधानन्यायाधीश जबरालाई घरबाटै पक्राउ गरिएको घटनाप्रति असन्तुष्टि जनाउँदै महरले भने, ‘सरकारले पूर्वप्रधानन्यायाधीश जस्तो सम्मानित र प्रतिष्ठित व्यक्तिलाई मध्यरातमा अपहरण शैलीमा पक्राउ गरेर राज्य आतङ्क र बर्बर नमुना प्रस्तुत गरेको छ । यो राज्य र विधिको शासनको चरम उल्लंघन हो ।’

महरले सरकार गठन भएको केही समयमै विभिन्न पूर्वपदाधिकारीहरूलाई पक्राउ गर्ने शैलीले सरकारको नियतमाथि प्रश्न उठाएको बताए । ‘सरकार बनेकै दिनदेखि नै पूर्वप्रधानमन्त्री केपी शर्मा ओलीदेखि पूर्वप्रधानन्यायाधीशसम्मलाई मध्यरातमा डाका शैलीमा पक्राउ गर्ने, घरमै गएर धरपकड गर्ने काम भइरहेको छ । यसले सरकारको लोकतान्त्रिक चरित्र होइन, निरंकुशता र स्वेच्छाचारिताको नमुना देखाउँछ,’ उनले भने ।

एमाले प्रमुख सचेतक महरले जेन्जी पुस्ताको काँधमा टेकेर सरकारले आफ्ना गैरकानुनी क्रियाकलापलाई ढाकछोप गर्ने प्रयास गरिरहेको आरोप लगाए । ‘जोसुकै व्यक्तिले कानुन मिचेको छ भने उसलाई कानुनको दायरामा ल्याउनुपर्छ, यसमा कसैको विमति छैन । तर, तथ्य र प्रमाणबिना, प्रतिशोधका आधारमा पूर्वाग्रही भएर गरिने पक्राउले कानुनको शासनलाई नै गिज्याउँछ,’ उनले भने ।

उनले थपे, ‘मान्छेलाई तर्साउने, धम्क्याउने, मध्यरातमा पक्राउ गरेर हुर्मत लिने काम अहिलेको सरकारको मुख्य शैली बनेको छ । यो विधिको शासन हो कि जसको शक्ति उसैको भक्ति भन्ने शैलीको निरंकुशता ?’।

यस्तै, नेपाली कम्युनिस्ट पार्टी (नेकपा) ले पूर्वप्रधानन्यायाधीश चोलेन्द्र शमशेर जबराको पक्राउ र रिहाइ प्रकरणले देशमा गैरकानुनी राज्यको अभ्यास भइरहेको आरोप लगाएको छ । प्रतिनिधिसभाको आजको बैठकमा प्रमुख सचेतक युवराज दुलालले सरकारको पछिल्लो कार्यशैलीप्रति तीव्र असन्तुष्टि व्यक्त गरे ।

प्रमुख सचेतक दुलालले पूर्वप्रधानन्यायाधीश जबरालाई मध्यरातमा पक्राउ गर्ने र बिनाकारण छाड्ने सरकारको कदमले लोकतन्त्रको उपहास गरेको बताए । उनले भने, ‘बिना पक्राउ पुर्जी, बिना कारण मध्यरातमा पक्राउ गर्ने अनि १२ घण्टा नबित्दै छोड्ने ? यो कस्तो कानुनी राज्य हो ? सरकारले कुन स्टन्ट देखाउन खोजेको हो ?’

उनले थप प्रश्न गर्दै भने– ‘यो सरकार कानुनी बाटोमा हिँड्दै छ कि अराजकताको ? गिरफ्तार गर्ने र सुरक्षा थ्रेट छ भन्दै बहाना बनाउने कामले देशको न्याय प्रणालीमाथि गम्भीर प्रश्न उब्जाएको छ ।’ उनले सरकारलाई यस्तो ‘दादागिरी’ र ‘पागलपन’ बन्द गर्न चेतावनी दिए ।

प्रमुख सचेतक दुलालले राज्य संयन्त्रको दुरुपयोग गरेर राजनीतिक स्टन्ट देखाउनु भन्दा कानुनी प्रक्रियामा स्पष्ट हुन सरकारलाई आग्रह गरे । ‘मध्यरातमा जोस र दिउँसो होस हराउने सरकारको कार्यशैलीले जनतालाई निराश बनाएको छ। के खाएपछि यस्तो मध्यरातमा जोस र दिउँसो होस हराउँछ, सरकारले यसको जवाफ दिनुपर्छ,’ उनले भने ।

यस्तै, आजको आकस्मिक समयमा बोल्दै राप्रपा सांसद भरत गिरीले सरकारले राज्य आतंक सिर्जना गरेको आरोप लगाए ।

सांसद गिरीले पूर्वप्रधानन्यायाधीश जस्तो सम्मानित पदमा बसेका व्यक्तिलाई कानुनी प्रक्रिया मिचेर गरिएको गिरफ्तारीले मुलुकमा विधिको शासनको उपहास भएको बताए । ‘सरकारले पूर्वप्रधानन्यायाधीश जबरालाई जसरी मध्यरातमा घरबाटै अपहरण शैलीमा पक्राउ ग¥यो, यो राज्य आतङ्कको बर्बर नमुना हो। यस्तो शैलीले लोकतन्त्र र मानव अधिकारको मर्ममाथि प्रहार गरेको छ,’ उनले भने ।

सांसद गिरीले आफूहरू कानुनको शासन र विधिको शासनको पक्षमा रहेको तर सरकारले कानुनको नाममा ‘प्रतिशोध’ को राजनीति गरिरहेको बताए । ‘हामी कानुन मान्छौँ, तर कानुनको आडमा गरिने डार्क राजनीति हामीलाई स्वीकार्य छैन । राज्यले शक्ति प्रयोग गर्दा पारदर्शिता अपनाउनुपर्छ, तर यो सरकारले त पटक–पटक निरंकुश र स्वेच्छाचारी शैली अपनाइरहेको छ,’ उनले भने ।

सांसद गिरीले यो सरकार गठन भएदेखि नै संवैधानिक अंगका प्रमुखहरू, पूर्वप्रधानमन्त्रीहरू र पूर्वपदाधिकारीहरूलाई लक्षित गरी निरन्तर यस्ता घटना दोहोरिरहेको बताए । उनले भने, ‘कहिले पूर्वप्रधानमन्त्री, कहिले पूर्वपदाधिकारी त कहिले पूर्वप्रधानन्यायाधीश राति सुतिरहेको बेला उठाउने र हतकडी लगाउने काम सरकारको नियमित कार्यतालिका जस्तै भएको छ । के यो लोकतान्त्रिक सरकारको काम हो ?’

श्रम संस्कृति पार्टीका सांसद ध्रुवराज राईले पूर्वप्रधानन्यायाधीशलाई पक्राउ गर्ने र भोलिपल्टै छाड्ने सरकारी शैलीप्रति कडा आपत्ति जनाउँदै यसलाई केटाकेटी खेलको संज्ञा दिए । सिंहदरबारस्थित संसद् भवनमा बोल्दै सांसद राईले प्रधानन्यायाधीश जस्तो गरिमामय पदमा बसेको व्यक्तिलाई पक्राउ गर्नु सामान्य विषय नभएको बताए ।

उनले भने, ‘पूर्वप्रधानन्यायाधीशलाई पक्राउ गर्ने, अनि भोलिपल्टै छोड्ने ? यो पक्राउ हो कि केटाकेटी खेल्ने खेल हो ? सरकारले यस्ता गम्भीर विषयमा नौटंकी गर्न छोड्नुपर्छ ।’

सांसद राईले राज्य संयन्त्रले कुनै पनि व्यक्तिलाई पक्राउ गर्दा त्यसको आधार र गम्भीरता पुष्टि हुनुपर्नेमा जोड दिए । ‘विषय कति गम्भीर हो, त्यसको तथ्यपूर्ण अनुसन्धानपछि मात्रै कानुनी कारबाही अघि बढाउनुपर्छ। । पक्रिने र भोलिपल्टै छोड्ने कामले देशको न्याय प्रणाली र सरकारी निकायको विश्वसनीयतामाथि प्रश्न उठाएको छ,’ उनले भने ।

सम्बन्धित समाचार

बाढी प्रभावित क्षेत्रका सडक सञ्जाल असोजभित्रै सञ्चालन हुन्छ : मन्त्री लम्साल कांग्रेस सभापतिको उम्मेदवार बन्न ४० हजार रुपैयाँ शुल्क लाग्ने दुवै महाधिवेशनमा सहभागी नहुने शेखर कोइरालाको घोषणा कांग्रेसमा एक्लिँदै शेरबहादुर देउवा बझाङ कांग्रेस अधिवेशनः ९४ मध्ये ८९ वडामा नयाँ नेतृत्व अन्तरसंंघर्ष व्यवस्थापनमा एमाले, एकताको ढोका खोल्दै नेकपा देउवा समूहले कोशी र मधेशबाहेक पाँच प्रदेशका ५५ जिल्लामा तोक्यो संयोजक, क-कसले पाए जिम्मेवारी ? कांग्रेसको क्षेत्रीय अधिवेशन आज १३ जिल्लामा हुँदै, केन्द्रीय नेताहरू उम्मेदवार बन्दै