काठमाडौं । नेपाली कांग्रेसमा पूर्वसभापति शेरबहादुर देउवा नेतृत्वको समूहले छुट्टै १५औँ महाधिवेशन घोषणा गरिसकेको अवस्थामा उनकै पक्षबाट १४औँ महाधिवेशनमा निर्वाचित भएका ठूलो संख्याका नेता गगन थापा नेतृत्वको कांग्रेसको केन्द्रीय कार्यसमिति बैठकमा सहभागी भएका छन् ।

देउवा पक्षले १५ असोजदेखि वडा अधिवेशन र २१–२३ असोजमा केन्द्रीय महाधिवेशन गर्ने छुट्टै कार्यतालिका अघि सारेका बेला उक्त पक्षका नेताहरू भने सानेपामा बसेको सभापति गगन कुमार थापा नेतृत्वको बैठकमा सहभागी भएका हुन् ।

छुट्टै महाधिवेशन घोषणा गरेको देउवा पक्षकै नेताहरू संस्थापनको बैठकमा, शेखर दुवै पक्षबाट अलग

देउवा पक्षका करिब ४० नेता गगन नेतृत्वको वर्तमान केन्द्रीय कार्यसमितिमा समायोजन भएर १५औँ महाधिवेशन प्रक्रियामा सहभागी हुने निर्णयमा पुगेका छन् ।

बिहीबारको बैठकमा महालक्ष्मी उपाध्याय ‘डिना’, मीनबहादुर विश्वकर्मा, रामहरि खतिवडा, ईश्वरी न्यौपाने, किरण यादव, नैनसिंह महर, ज्ञानेन्द्रबहादुर कार्की, गोविन्द भट्टराई, सुरेन्द्र पाण्डे, इन्द्रबहादुर बानियाँ, जीवनबहादुर शाही, सीता गुरुङ, सुशीला थिङलगायत नेताहरू सहभागी भएका छन् ।

उनीहरूको सानेपा आगमनलाई देउवा पक्षबाट गगन पक्षमा राजनीतिक प्रवेशका रूपमा मात्रै हेर्न नमिल्ने उनीहरूकै भनाइ छ । देउवा पक्षका नेताहरूले पार्टी विभाजनभन्दा एकताको महाधिवेशनमा सहभागी हुनु उचित हुने तर्क गर्दै आएका छन् ।

देउवा पक्षले अघि सारेका मागमध्ये १४औँ महाधिवेशनबाट निर्वाचित तर विशेष महाधिवेशनपछि केन्द्रीय कार्यसमितिबाट बाहिर परेका नेताहरूलाई समायोजन गर्ने विषय गगन नेतृत्वको पक्षले स्वीकार गरेपछि उनीहरू बैठकमा सहभागी भएका हुन् ।

देउवा पक्षका तत्कालीन कार्यवाहक सभापति पूर्णबहादुर खड्काले उठाएको आठबुँदे मागलाई आधार बनाएर संस्थापन पक्षले समायोजन, महाधिवेशन आयोजक समिति, निर्वाचन समिति, विधान मस्यौदा समिति र अनुशासन समितिलगायत विषयमा सहमतिअनुसार अघि बढ्ने प्रतिबद्धता जनाएको थियो । त्यसपछि खड्का निकट नेतासहित देउवा पक्षका धेरै नेता गगन नेतृत्वको प्रक्रियामा फर्किएका हुन् ।

देउवा पक्षभित्रको मुख्य मतभेद अब १४औँ महाधिवेशनबाट आएको नेतृत्वलाई निरन्तरता दिने कि विशेष महाधिवेशनबाट आएको नेतृत्व स्वीकार गर्ने भन्नेमा देखिएको छ । देउवा पक्षले १५औँ महाधिवेशन १४औँ महाधिवेशनबाट निर्वाचित सभापति देउवाकै नेतृत्वमा हुनुपर्ने अडान राख्दै आएको थियो । तर गगन नेतृत्वको पक्षले विशेष महाधिवेशनबाट आएको वर्तमान संरचनालाई निरन्तरता दिँदै १५औँ महाधिवेशन असोज १६ देखि १९ मै गर्ने अडान लिएको छ ।

गगन नेतृत्वको पक्षले भने १४औँ महाधिवेशनका नेताहरूलाई महाधिवेशन प्रक्रियामा सहभागी हुने बाटो खोलेपछि देउवा पक्षभित्रै दुई धार देखिएको हो । एक समूहले देउवालाई नै सभापति मानेर समानान्तर महाधिवेशनमा जाने तयारी गरिरहेको छ भने अर्को समूहले पार्टी एकताका लागि निर्धारित महाधिवेशन प्रक्रियामा सहभागी हुने निर्णय गरेको छ ।

बैठकमा सहभागी नेता रामहरि खतिवडाले आफूहरू सानेपाको बैठकमा सहभागी हुने बताएका थिए । देउवा पक्षका नेताहरूले पार्टीलाई विभाजनतर्फ लैजानुभन्दा एकताको प्रक्रियामा सहभागी हुनु उपयुक्त हुने बताउँदै आएका छन् । यसअघि खतिवडाले पनि विशेष महाधिवेशनमा सहभागी नहुनुको कारणभन्दा पार्टी एकता कायम राख्ने प्रयासलाई प्राथमिकता दिएको बताएका थिए ।

मीनबहादुर विश्वकर्माले पनि यसअघि १५औँ महाधिवेशनलाई एकताको महाधिवेशन बनाउने र सबैलाई समान सम्मानका साथ सहभागी गराउने विषयमा छलफल भइरहेको बताएका थिए ।

शेखर दुवै पक्षमा नलाग्ने
कांग्रेस नेता शेखर कोइरालाले बिहीबार विज्ञप्ति नै जारी गरेर आफू कुनै पक्षमा नलाग्ने स्पष्ट गर्दै पार्टी एकताका लागि अभियान चलाउने बताएका छन् । उनले पार्टीभित्रको विभाजन र गुटबन्दीप्रति चिन्ता व्यक्त गर्दै सबै पक्षलाई एकताबद्ध हुन आग्रह गरेका छन् ।

कोइरालाले आफू कसैप्रति आरोप–प्रत्यारोप नगर्ने भन्दै पार्टीलाई एकताबद्ध राख्न गाउँदेखि केन्द्रसम्मका नेता–कार्यकर्तालाई अभियानमा जुट्न आग्रह गरेका छन् । उनी गगन नेतृत्वको बैठकमा सहभागी नभए पनि महाधिवेशनमा सहभागी हुने बाटो खुला रहेको नेताहरूले बताएका छन् ।

महाधिवेशन उद्घाटन गर्न आउन गगनको आह्वान
केन्द्रीय समिति बैठकमा सभापति गगन थापाले पार्टीभित्रका असहमति र असन्तुष्टि सम्बोधन भइसकेको भन्दै अब सबैलाई समेटेर कांग्रेसलाई एकताबद्ध बनाउने बताएका छन् । उनले पूर्वसभापति देउवासहित पूर्वपदाधिकारी तथा नेताहरूलाई १५औँ महाधिवेशन प्रक्रियामा सहभागी हुन आग्रह गरे ।

थापाले देउवालाई १६ असोज १६ मा हुने महाधिवेशनको उद्घाटनमा सहभागी हुन आग्रह गर्दै पूर्वसभापतिले महाधिवेशन उद्घाटन गरिदिनु आफूहरूका लागि सम्मानको विषय हुने बताएका छन् । पार्टी विधानले अब देउवालाई सभापति बन्न नदिने उल्लेख गर्दै उनले महाधिवेशन निर्धारित समयमै हुने पनि स्पष्ट पारे ।

वडा अधिवेशनमा सहभागी हुने १४औँ महाधिवेशनका नेता स्वतः केन्द्रीय सदस्य
गगन नेतृत्वको कांग्रेसले विशेष महाधिवेशनमा सहभागी नभएका तर १४औँ महाधिवेशनबाट निर्वाचित केन्द्रीय सदस्यलाई १५औँ महाधिवेशन प्रक्रियामा सहभागी हुने गरी वर्तमान केन्द्रीय कार्यसमितिमा समायोजन गर्ने निर्णय यसअघि नै गरिसकेको छ । वडा अधिवेशनमा सहभागी हुने त्यस्ता नेताहरूलाई केन्द्रीय सदस्यको हैसियत दिने निर्णय भएको हो ।

कांग्रेसको निर्धारित कार्यतालिकाअनुसार असोज ३ र ४ गते वडा अधिवेशन, ७ गते पालिका तथा १० गते प्रदेशसभा र प्रतिनिधिसभा निर्वाचन क्षेत्रीय अधिवेशन हुँदैछन् । केन्द्रीय महाधिवेशन असोज १६ देखि १९ गतेसम्म काठमाडौंमा गर्ने कार्यतालिका छ ।

देउवा समूहले छुट्टै महाधिवेशनको तयारी अघि बढाइरहेका बेला उनका निकटस्थ तथा १४औँ महाधिवेशनबाट निर्वाचित नेताहरूको ठूलो समूह निर्धारित महाधिवेशन प्रक्रियामा फर्किनुले कांग्रेसभित्रको शक्ति समीकरणमा नयाँ अवस्था देखिएको छ ।

सम्बन्धित समाचार

जेनजी आन्दोलनको एक वर्ष: ८४ अर्बको क्षति, पुनर्निर्माण अझै अधुरै कांग्रेस विवाद समाधानको मध्यार्गी प्रस्ताव राष्ट्रिय पीडालाई राजनीतिक हतियार बनाउने छुट कसैलाई छैन : रास्वपा सभापति लामिछाने जेनजी आन्दोलन दल विशेष थिएन, तत्कालीन सरकारको दमनको परिणाम थियोः कांग्रेस सांसद केसी यसकारण गलत छ काननुमन्त्रीको दाबी संरचना बन्लान्, मुर्झाएका मन फेरि फक्रेलान् ? बाढी प्रभावित क्षेत्रका सडक सञ्जाल असोजभित्रै सञ्चालन हुन्छ : मन्त्री लम्साल कांग्रेस सभापतिको उम्मेदवार बन्न ४० हजार रुपैयाँ शुल्क लाग्ने