उदयपुर । मृत्युपछि काम नलाग्ने आँखाको नानी दान गर्दा दृष्टिविहीन व्यक्तिले पुनः संसार देख्न सक्ने भएकाले सबैले मृत्युपछि आँखा दान गर्ने अभियानमा सहभागी हुनु पर्ने कोशी प्रदेशका मुख्यमन्त्री हिक्मतकुमार कार्कीले बताएका छन् ।

मुख्यमन्त्री कार्कीले आँखा दानलाई ठूलो पुण्यको कामका रूपमा लिन आग्रह गर्दै मृत्यु भएपछि संकलन गरिएको आँखाको नानी सुरक्षित भण्डारण गरी आवश्यकता अनुसार दृष्टिविहीन व्यक्तिमा प्रत्यारोपण गर्न सकिने बताए । उनले कोशी प्रदेशमा आँखा दान, संकलन, संरक्षण र प्रत्यारोपणको व्यवस्था थप प्रभावकारी बनाउन प्रदेश सरकारले आवश्यक सहयोग गर्ने प्रतिबद्धता जनाए ।

मदन भण्डारी आँखा अस्पताल (दृष्टिकुञ्ज), गाईघाटमा आइतबार आयोजित ‘स्मृति वृक्षारोपणको सातौँ वार्षिक उत्सव कार्यक्रममा सम्बोधन गर्दै मुख्यमन्त्री कार्कीले भने, ‘मृत्युपछि सबैले आँखा दान गर्दा राम्रो हुन्छ । हामीलाई नचाहिने बेलाको आँखाले अर्को व्यक्तिले संसार देख्न सक्छ ।

उनका अनुसार कोशी प्रदेशमा हाल उपलब्ध क्षमता र पूर्वाधारबाट करिब ३०० जनासम्मको आँखा प्रत्यारोपण गर्न सकिने सम्भावना विशेषज्ञहरूले औँल्याएका छन् । विराटनगर आँखा अस्पताल र मेची आँखा अस्पतालमा यस अघि नै आँखा प्रत्यारोपण सेवा सञ्चालनमा रहेको जानकारी दिँदै उनले प्रदेशका अन्य क्षेत्रमा समेत सेवा विस्तार गर्न सरकार सकारात्मक रहेको बताए ।

मुख्यमन्त्री कार्कीका अनुसार एक साता अघि विराटनगरमा स्वास्थ्य मन्त्रालयका सचिव तथा आँखा उपचारसँग सम्बन्धित विशेषज्ञहरूसँग बैठक गरी मृत्युपछि आँखा संकलन, संरक्षण तथा प्रत्यारोपण सेवालाई प्रभावकारी बनाउने विषयमा छलफल गरिएको थियो । प्रदेश सरकारले आवश्यक बजेट र प्राविधिक सहयोग उपलब्ध गराउने गरी अस्पतालहरूलाई काम अघि बढाउन निर्देशन दिइ सकेको उनले बताए । आँखा दानबाट दृष्टिविहीन व्यक्तिलाई नयाँ जीवन सरह उज्यालो दिन सकिने भएकाले यसलाई सामाजिक सेवाको महत्वपूर्ण अभियानका रूपमा अघि बढाउनु पर्नेमा उनले जोड दिए ।

मुख्यमन्त्री कार्कीले उदयपुरमा रहेको मदन भण्डारी आँखा अस्पतालको सेवा विस्तारका लागि प्रदेश सरकारले आवश्यक सहयोग गर्ने पनि बताए । अस्पतालमा नियमित रूपमा आँखा शल्यक्रिया भइ रहेको उल्लेख गर्दै उनले आवश्यक उपकरण तथा पूर्वाधारका लागि स्वास्थ्य मन्त्रालय मार्फत सहयोग उपलब्ध गराउने प्रतिबद्धता जनाए ।

मुख्यमन्त्री कार्कीले उदयपुरलाई वन क्षेत्रका हिसाबले महत्वपूर्ण जिल्ला भन्दै वन नभएका तथा खाली क्षेत्रमा बहुउद्देश्यीय र आम्दानी दिने प्रजातिका बिरुवा रोप्न स्थानीय तह र वन कार्यालयलाई आग्रह गरे । उनले वातावरणीय सन्तुलन कायम गर्न मात्र नभई आर्थिक समृद्धिमा समेत योगदान पु¥याउने गरी फलफूल तथा काठजन्य प्रजातिका रूख रोप्नु पर्ने धारण राखे । रूखले वातावरणीय सन्तुलन कायम गर्छ । त्यसबाट प्राप्त हुने फलफूल तथा अन्य उत्पादनले आर्थिक लाभ समेत दिन्छ,’ उनले भने, ‘त्यसैले वातावरण संरक्षणसँगै आम्दानी बढाउने गरी बहुउद्देश्यीय बिरुवा रोप्ने अभियान अघि बढाउनु पर्छ । उनले स्थानीय तह, वन कार्यालय तथा समुदायको सहकार्यमा खाली र वन क्षेत्र नभएका स्थानमा उत्पादनमुखी वृक्षरोपण गर्नु पर्ने बताए । यसबाट वातावरण संरक्षणसँगै स्थानीयस्तरमा आर्थिक गतिविधि बढाउन सहयोग पुग्ने उनको भनाइ थियो ।

त्यसैगरी मुख्यमन्त्री कार्र्कीले मदन भण्डारी आँखा अस्पताल परिसरमा आफ्ना स्वर्गीय मातापिताको स्मृतिमा वृक्षारोपण समेत गरेका थिए । नेपाल नेत्र ज्योति संघ उदयपुर तथा मदन भण्डारी आँखा अस्पतालका सभापति भागवत राउतका अनुसार अस्पताल परिसरमा ‘स्मृति वृक्षारोपण अभियान’ सात वर्ष अघि सुरु गरिएको हो । पितृहरूको सम्झनामा गरिँदै आएको वृक्षारोपणका कारण अस्पताल परिसर हराभरा बन्दै गएको राउतले बताए ।

उनका अनुसार यो अभियान वृक्षारोपणमा सीमित नभई मानव सेवा, वातावरण संरक्षण, संस्थागत इतिहास र नागरिक सहभागितालाई जोड्ने दीर्घकालीन अभियानका रूपमा अघि बढाइएको हो । अस्पतालसँग जोडिएका दाता, सहयोगी, चिकित्सक, कर्मचारी, सामाजिक अभियन्ता, विभिन्न संस्था तथा शुभेच्छुकहरूको योगदानलाई जीवित स्मृतिका रूपमा संरक्षण गर्दै अस्पताल परिसरमा ‘स्मृति वाटिका’ विकास गर्ने अभियानको मुख्य उद्देश्य रहेको राउतले बताए ।

सम्बन्धित समाचार

डेगु नियन्त्रणमा सरोकारवालाको भूमिका महत्वपूर्ण १५ क्विन्टलभन्दा बढी गाँजासहित ट्रक नियन्त्रणमा, चालक फरार बाढीपीडितका लागि चौदण्डीगढी नगरपालिकाद्वारा ४४ लाख सहयोग तीन अवस्थाबाहेक पक्राउ परेकालाई हत्कडी नलगाउन सर्वोच्चको आदेश धनगढीमा पर्सिदेखि जेईविरुद्ध खोप अभियान, १ लाख ३ हजारलाई लगाइने खनाललाई दिल्लीमा एक्सिलेन्स इन एजुकेशनल लिडरसिप अवार्ड मोरङ–६ मा मनोनयन दर्ताअघि कांग्रेस कार्यकर्तावीच झडप, दर्जन घाइते मोरङ–६ कांग्रेस अधिवेशनमा झडप सभापति तामाङको प्रतिवाद