बेलग्रेड । सर्बियामा भ्रष्टाचारविरोधी विद्यार्थी आन्दोलनले संसदीय निर्वाचनमा विजयको घोषणा गरेको छ । यससँगै राष्ट्रपति अलेक्जान्डर भुसिकको दलको १४ वर्ष लामो शासन अन्त्य हुने भएको छ ।

सन् २०२४ मा नोभी साद रेलवे स्टेसनको छत भत्किँदा १६ जनाको मृत्यु भएपछि सुरु भएको प्रदर्शनले देशव्यापी रूप लिएको थियो । विद्यार्थीहरूले दुर्घटनाको पारदर्शी अनुसन्धान र भ्रष्टाचार नियन्त्रणको माग गर्दै करिब दुई वर्षदेखि अभियान चलाउँदै आएका थिए ।

विद्यार्थी सूचीका उम्मेदवार राडोमिर साइसिकले प्रारम्भिक नतिजाले अधिकांश मतदान केन्द्रमा आफूहरू अगाडि रहेको देखाएको बताएका छन् । उनले निर्वाचनको परिणामलाई न्याय, स्वतन्त्रता र मर्यादित सर्बियाको आशासँग जोडेका छन् ।

निर्वाचनमा करिब ६५ प्रतिशत मतदाताले मतदान गरेका थिए । यो सन् १९९३ यताकै उच्च मतदान सहभागिता भएको जनाइएको छ । मतदान सकिएको दुई घण्टाभन्दा कम समयमै भुसिकले पराजय स्वीकार गरेका थिए । राजधानी बेलग्रेडमा हजारौँ समर्थक सडकमा भेला भएर विद्यार्थी आन्दोलनको विजय उत्सव मनाएका थिए ।

प्रारम्भिक तथ्याङ्कअनुसार विद्यार्थी आन्दोलनले २५० सदस्यीय संसद्मा १३५ देखि १४० सिट जित्न सक्ने भुसिकले बताएका थिए । उनले निर्वाचनको परिणाममा विभिन्न युरोपेली देश र अमेरिकाको ‘डिप स्टेट’ को समर्थन रहेको आरोपसमेत लगाएका छन् ।

विद्यार्थीहरूले देशभर र्‍याली तथा पदयात्रा गर्दै मतदातासँग प्रत्यक्ष सम्पर्क बढाएका थिए । बिहीबार बेलग्रेडमा आयोजित अन्तिम चुनावी र्‍यालीमा करिब एक लाख ५० हजार मानिस सहभागी भएको स्वतन्त्र अनुगमनकर्ताले जनाएका थिए ।

निर्वाचनमा विद्यार्थी आन्दोलनबाट उम्मेदवार बनेकाहरूलाई युरोपेली आयोगकी प्रमुख उर्सुला भोन डेर लेयन र हङ्गेरीका प्रधानमन्त्री पिटर मग्यारले बधाई दिएका छन् । भोन डेर लेयनले सर्बियामा कानुनी शासन, सञ्चारमाध्यमको स्वतन्त्रता र भ्रष्टाचार नियन्त्रणका लागि सहयोग गर्ने बताएकी छन् ।

विद्यार्थी सूचीमा रहेका अधिकांश उम्मेदवार शिक्षाविद्, कलाकार र विभिन्न क्षेत्रका विशेषज्ञ छन् । तीमध्ये धेरैसँग राजनीतिक अनुभव कम छ । नोभी साद दुर्घटनाको पारदर्शी अनुसन्धानको मागबाट सुरु भएको आन्दोलन पछि भ्रष्टाचार नियन्त्रण र निर्वाचनको मागमा केन्द्रित भएको थियो ।

आन्दोलनको दबाब बढेपछि भुसिकले गत महिना आकस्मिक निर्वाचन घोषणा गरेका थिए । उनले प्रधानमन्त्री बन्न राष्ट्रपति पदबाट राजीनामा दिएका थिए । निर्वाचनको अनुगमन स्वदेशी तथा अन्तर्राष्ट्रिय पर्यवेक्षकले गरेका थिए भने विद्यार्थीहरूले पनि मतदान प्रक्रियाको निगरानी गर्न ठूलो सङ्ख्यामा स्वयंसेवक परिचालन गरेका थिए ।

सम्बन्धित समाचार

पाकिस्तानमा विद्यालयको छाना खस्दा एक शिक्षकसहित २१ बालबालिकाको मृत्यु यमनमा हुथी विद्रोहीको आक्रमणमा २० सैनिकको मृत्यु स्पेसएक्स र टेस्ला गाभ्ने मस्कको प्रस्ताव इरानमाथि नयाँ हमलाको तयारी, तेहरानको चेतावनी हिमनदी पग्लिँदा खुल्दैछ स्विट्जरल्यान्डको इतिहास ३,१५६ पाउन्डको फर्सीले विश्व कीर्तिमान बनाउने सम्भावना जोर्डनको चर्चमा अन्त्येष्टिका बेला गोली प्रहार, सात जनाको मृत्यु, ४० घाइते फ्रान्समा विरोध प्रदर्शन जारी: लाखौं जनता सडकमा, १,००० जना पक्राउ