कपिलवस्तु । जाडो मौसम सुरु भएसंगै जाडो छल्न बुद्धभुमि नगरपालिकाको बुड्ढी तालमा आएका आगन्तुक चरा असुरक्षित भएका छन् । तालमा रहेका पानी चरा, जाडो छल्न आएका आगन्तुक चरा, रैथाने चराहरूलाई स्थानीयले पासोमा फसाउने, गुलेलीले हानेर मार्ने गर्दा चरा असुरक्षित बनेका हुन् ।
स्थानीयले तालको आसपासमा जथाभावी रूपमा माछा मार्न जाल थाप्ने गरेको फेला परेको चरा संरक्षण सङ्घका फिल्ड बायोलोजिस्ट दिलीप चन्दले बताए । जसका कारण चराहरू मानिस नजिक देखेपछि उडेर भाग्ने गरेका छन् ।
गत शुक्रवार चरा गणना गर्ने क्रममा तालको आसपासमा माटिकोरे (किङ्ग फिसर ) चरा, हुँचिल (लाटोकोसेरो) को प्वाँख समेत फेला परेको चरा गणनामा खटिएका भएका नेचर गाइड इश्वरी प्रसाद चौधरीले बताए ।
केही वर्ष पहिले तालमा निकै चरा आउने गरेपनि पछिल्लो समय तालमा जाडो छल्न आउने चराको संख्या घटेको छ । जाडो छल्न आउने आगन्तुक चराको उचित संरक्षणमा स्थानीय सरकारले चासो नदेखाउने र चराको चोरी शिकारी हुँदा आगन्तुक चरा घट्दै गएको हो ।
करिब ७ सयदेखि ८ सयको हाराहारीमा चरा देखिएको र २१ प्रजातिका चरा फेला पारेको पन्छी संरक्षण सङ्घले जनाएको छ । तालमा सबैभन्दा धेरै संख्याका आगन्तुक चरा सिलसिले हाँस रहेको बताइएको छ ।
