पोखरा । बागलुङको ढोरपाटन नगरपालिका नगर प्रमुख तथा इमेज बचत तथा ऋण सहकारी संस्थाका संस्थापक अध्यक्ष देवकुमार नेपाली पक्राउ परेका छन् । फरार भएको १६ महिनापछि उनी भारतको नयाँ दिल्लीबाट पक्राउ परेका हुन् ।

सहकारी ठगी अभियोगमा फरार प्रतिवादी नेपालीलाई लामो समयसम्म नभेटिएपछि गत वर्ष १२ माघ इन्टरपोलमा रेड नोटिससमेत जारी भएको थियो । नेपाली गत वर्ष ५ जेठदेखि फरार थिए । प्रहरी स्रोतका अनुसार उनलाई भारतस्थित नेपाली दूतावासबाट समन्वय नेपाल झिकाउने तयारी भएको छ ।

इमेज सहकारी ठगीपछि जिल्ला प्रहरी कार्यालय बागलुङले पीडितलाई उजुरी दिन आह्वान गरेको थियो । मेयर नेपालीसँगै सहकारी रकम अपचलन आरोपमा उनकी श्रमिती छेला नेपालीविरुद्ध समेत प्रहरीमा जाहेरी छ । उनीहरुविरुद्ध १ हजार ५ सय ७३ जना बचतकर्ताले जिल्ला प्रहरी कार्यालय बागलुङमा उजुरी दिएका छन् । गत वर्ष २३ जेठमा पहिलोपल्ट मुद्दा दर्ता भएको थियो । हालसम्म उनीहरुविद्धरु बिगो १ अर्ब ३८ करोड ६३ लाख रुपैयाँ रहेको प्रहरीले जनाएको छ । नेपालीले कृत्रिम कर्जा खडा गरी सहकारीको रकम अपचलन गरेको अनुसन्धानमा भेटिएको छ ।

तर नेपाली बेलाबेलामा फेसबुक लाइभमा आउने र आफ्नो जीउधनको सुरक्षा नभएकाले केही समय टाढा बस्नुपरेको बताउने गर्थे । सहकारी रजिस्ट्रारको कार्यालयले गरेको अध्ययनमा उनले पोखरासहित बागलुङ, बुर्तीबाङ, गल्कोटमा गरी बचतकर्ताबाट झण्डै २ अर्ब रुपैयाँ उठाएर हिनामिना गरेको उल्लेख छ ।

उनी गत वर्ष ५ मंसिरमा पहिलोपल्ट सामाजिक सञ्जाल फेसबुकमा लाइभ आएर एकै पटक धेरै जना बचतकर्ताले बचत फिर्ता माग्न आउँदा सहकारी समस्यामा परेको दाबीसमेत गरेका थिए । आफ्नो घरमा आई हतियारसहित ज्यान मार्ने धम्की आएको र ६ लाख बचत भएकाहरुले करोडौंको घर मागेकोले बेपत्ता हुनुपरेको उनले बताएका थिए ।

आफ्नो चलअचल सम्पत्ति पूरै बागलुङमा रहेको भन्दै कर्मचारीले आफूलाई असहयोग गरेको बताए । बागलुङको ढोरपाटन नगरपालिकाको प्रमुख भएर ७ वर्षदेखि बुर्तिवाङ बस्दा सहकारीमा समय दिन नसकिएको उनले स्वीकारेका छन् ।

उनले आफू र पत्नीका नाममा भएको घरजग्गाको विवरण समेत सार्वजनिक गर्दै आफूले बचतकर्ताको पैसा फिर्ता गर्न तयार रहेको समेत वचन दिएका थिए । बागलुङ, पोखरा र काठमाडौंमा गरी उनका १८ घर रहेको र ती घरको मूल्य ३ अर्बभन्दा बढी रहेको बताएका छन् ।

एमालेबाट २०७४ र २०७९ को स्थानीय तह निर्वाचनमा ढोरपाटनको मेयर जितेका नेपाली अध्यक्ष रहेको इमेज सहकारीको मुख्य कार्यालय बागलुङ बजारमा छ । शाखा कार्यालयहरू पोखराको सिर्जनाचोक तथा बालगुङको हटिया र बुर्तिबाङ बजारमा छन् ।

उक्त सहकारी ठगी अभियोगमा पक्राउ परेका सञ्चालक चित्रबहादुर भण्डारी, प्रबन्धक शक्ति किसान र कर्मचारी लालमती रोकालाई पुर्पक्षका लागि थुनामा पठाउन अदालतले आदेश दिएको थियो ।

सम्बन्धित समाचार

दुर्गा प्रसाईका समर्थकले झापामा जलाए तीन वटा ट्रक ससुराको हत्या आरोपी ज्वाई सार्वजनिक दशैको मुखमा चामुण्डाविन्द्रासैनी नगरपालिकाले ७१ कर्मचारी हटायो दन्तकाली विशेष कार्य तालिम शिक्षालयले मनायो २२ औं स्थापना दिवस अग्नि सापकोटाविरुद्धको मुद्दामा अनुसन्धान फाइल पेस गर्न सर्वोच्चको आदेश