काठमाडौं । प्रदर्शनीको तयारीमा रहेको नेपाली चलचित्र ‘नरसिंहाः अवतार’को नयाँ गीत ‘मेरी प्यारी छोरी…’को भिडियो यती बेला सार्वजनिक गरिएको छ । यही ९ जेठबाट रिलिज हुने यो चलचित्रको रिलिज मिति नजिकिँदै गर्दा यो गीतलाई सार्वजनिक गरिएको निर्देशक दिवाकर भट्टराईले राजधानीलाई बताए ।
यो गीतमा छोरी प्रति बुबाको माया र कर्तव्यलाई प्रस्तुत गरिएको छ । गीत स्वरूपराज आचार्यको स्वरमा रहेको छ । मुक्त उदासले लेखेको यो गीतमा अर्जुन पोखरेलको संगीत गरेका छन् ।
यो गीतको भिडियोमा पिताको भूमिकामा अभिनेता राजेश हमाल, उनको पत्नीको भूमिकामा अभिनेत्री नीति शाह र छोरीको भूमिकामा रहेकी बाल–कलाकार एल्भिना खड्काबिचको पारिवारिक सम्बन्ध देखाइएको छ । गीतको भिडियोमा एल्भिनाप्रति राजेशको अभिभावकत्व र नीति शाहको मातृत्व भावलाई प्रस्तुत गरिएको छ । नरसिंहाः अवतारको यो गीतलाई रामजी लामिछानेको कोरियोग्राफी गरेका हुन् ।
यस चलचित्रको पटकथा सम्बाद दिवाकर भट्टराईले लेखेका हुन् । जसमा राजेश हमाल, नीति शाह, राज कटुवाल, सनिषा भट्टराई, नीर शाह, प्रशान्त ताम्राकार, सरोज खनाल, रमेश चन्द सोडारी, राजिभ जंग बस्नेत, दीपा शाहीलगायतका कलाकारहरूको अभिनय छ ।
यो चलचित्रको निर्मातामा नेम महर्जन, नरेन्द्र महर्जन, दीपक प्रसाद ढकाल र ध्रुव न्यौपाने छन् । चन्द्र पन्तको कथा रहेको यस चलचित्रमा राजु तामाङको द्धन्द्ध निर्देशन, राजु थापाको डीओपी, साहिल खान र मिलन श्रेष्ठको सम्पादन छ ।
