काठमाडौं । जेनजी आन्दोलनका क्रममा घरमै कुटिएपछि उपचारपछि आराम गरिरहेका नेपाली कांग्रेसका सभापति शेरबहादुर देउवा भोलि २८ असोजका लागि बोलाइएको केन्द्रीय समिति बैठकमा सहभागी हुँदै सार्वजनिक हुने बताइन्छ ।
आइतबार पार्टी कार्यालय सानेपामा बसेको केन्द्रीय कार्यसम्पादन समिति बैठकमा उपसभापति पूर्णबहादुर खड्काले देउवा केन्द्रीय समिति बैठकमा सहभागी हुने जानकारी दिएका हुन् ।
जेनजी आन्दोलनका क्रममा गत २४ भदौमा बूढानीलकण्ठस्थित आफ्नै निवासमा कुटिएपछि सार्वजनिक रूपमा नदेखिएका देउवा बैठकमा सहभागी हुने नहुने निश्चित भएको थिएन ।
बैठकले महाधिवेशन सम्बन्धमा एजेन्डा लैजाने भने पनि कहिले महाधिवेशन गर्ने भन्ने विषयमा सहमति जुटाउन सकेन । केन्द्रीय समितिले मिति तय गर्नेगरी नियमित महाधिवेशन गर्ने एजेन्डा केन्द्रीय समिति बैठकमा लैजाने र मिति केन्द्रीय समितिबाट तय गर्ने समझदारी बैठकमा बनेको सहमहामन्त्री महालक्ष्मी उपाध्यायले जनाएकी छन् ।
यसैबीच, कांग्रेसका महामन्त्री गगनकुमार थापाले तीन दलका तीन प्रमुख नेताहरूलाई बिदाइ गर्न आह्वान गरेका छन् । उनले संवादको नयाँ वातावरण बनाउनसमेत अपिल गरेका छन् ।
आइतबार एक भिडियो सन्देश जारी गर्दै उनले यस्तो अपिल गरेका हुन् । नेपालमा शेरबहादुर देउवा, केपी शर्मा ओली र पुष्पकमल दाहाल ‘प्रचण्ड’बीच १० वर्षयता म्युजिकल चेयर घुमिरहेको प्रसंग पनि उनले उल्लेख गरेका छन् ।
थापाले २५ भदौ २०८२ पछि र २२ भदौअघिको नेपाल एउटै नरहेको टिप्पणीसमेत गरेका छन् । सभापति शेरबहादुर देउवालाई यत्रो पर्दाखेरि सिम्पेथी नराखेको भनेर पार्टीका साथीहरूले कुरा उठाएकामा उनले सिम्पेथी राखेको जिकिर गरे । आफू र अर्का महामन्त्री विश्वप्रकाश शर्माले २५ भदौमा सभापति देउवामाथि भएको आक्रमणको भत्र्सना गर्दै वक्तव्य निकालेको पनि थापाले स्मरण गराए । उनले आफूहरू कसैमाथि पनि हुने भौतिक आक्रमणको कुरा अस्वीकार्य हुन्छ भनेर मान्ने व्यक्ति भएको उल्लेख गरे ।
सम्बन्धित समाचार
बयान दिन साइबर ब्युरोमा एमाले नेता बस्नेत
प्रहरी चौकीमा आक्रमण गरेको आरोपमा वडाध्यक्ष पक्राउ
निर्वाचन तयारीका लागि छलफल गर्न २९ दललाई पत्राचार
आन्तरिक तयारीमा दलहरू, नेतृत्व हस्तान्तरणदेखि पार्टी एकताको तयारी
नियमित महाधिवेशनकै बाटोमा फर्कियो कांग्रेस
कपिलवस्तुमा मतदाता नामावली दर्ता अभियान तिव्र, नयाँ मतदातामा उत्साह
पूर्वमन्त्री ज्वाला कुमारीको बास जनताको घरमा
