काठमाडौं । नेपाली कांग्रेसको केन्द्रीय कार्यसमिति बैठक पुनः सरेको छ। आज (बिहीबार) का लागि तय भएको बैठक यही शनिबार दिउँसो १ बजेसम्मका लागि स्थगित भएको पार्टी केन्द्रीय कार्यालयका मुख्य सचिव कृष्णप्रसाद पौडेलले जानकारी दिए । यो सँगै कांग्रेसभित्र विशेष महाधिवेशनको विषयमा देखिएको अन्योल कायमै रहेको हो ।

पटकपटक सर्दै आएको कांग्रेस केन्द्रीय समितिको बैठक अब शनिबार पार्टी केन्द्रीय कार्यालय, सानेपामा बस्नेछ । यसअघि कात्तिक ३० गतेको सूचनाअनुसार मंसिर १ गतेका लागि निर्धारित बैठक पनि स्थगित गरी आजका लागि तोकिएको थियो ।

बैठकको मुख्य एजेन्डा पार्टीको १५ औं महाधिवेशन र आगामी प्रतिनिधि सभा निर्वाचनका सन्दर्भमा निर्णय लिनु रहे पनि विशेष महाधिवेशनको बहसले प्राथमिकता पाइरहेको छ । पार्टीभित्र विशेष महाधिवेशनको माग गर्दै हस्ताक्षर संकलनसमेत भइसकेको अवस्थामा संस्थापन पक्षका नेताहरू भने चुनावपछि नै नियमित महाधिवेशन गर्नुपर्ने अडानमा छन् ।

गत असोज २८ गतेबाट सुरु भएको यस बैठकमा कात्तिक २७ गतेसम्म केन्द्रीय सदस्यहरूले आ-आफ्ना धारणा राख्ने क्रम सकिएको थियो । त्यसपछि कात्तिक २९ र मंसिर १ गतेका लागि तय गरिएका बैठकहरू पनि स्थगित भई आजका लागि निर्धारण गरिएको थियो, जुन अब शनिबारका लागि सरेको छ ।

विशेष महाधिवेशनको पक्षमा रहेका नेताहरूले पार्टीलाई नयाँ ऊर्जा दिनुपर्ने तर्क गरिरहेका छन् भने संस्थापन पक्षले संसदीय निर्वाचनको तयारीलाई प्राथमिकता दिनुपर्नेमा जोड दिएको छ । नेपाली कांग्रेसको यो केन्द्रीय समिति बैठकले पार्टीको आगामी राजनीतिक दिशा निर्धारण गर्नेछ ।

सम्बन्धित समाचार

मधेश प्रदेशका मुख्यमन्त्री सोनलले दिए राजीनामा मुख्यमन्त्री नियुक्तिको विरोधमा जनकपुर तनावग्रस्त मधेश प्रदेशका मुख्यमन्त्री यादवलाई बर्खास्त गर्न माग गर्दै प्रदर्शन मिथ्या सूचनामा निगरानी, हरित निर्वाचनमा जोड उपचारबाट फर्केलगत्तै कांग्रेस सभापति देउवा भेटघाटमा सक्रिय मधेशका मुख्यमन्त्रीको समर्थनमा एमालेको धर्ना सुरक्षा जोखिमले थिचिँदै निर्वाचन तयारी