पत्नी हुँदाहुँदै सालीसँग विवाह गराइदिन दबाब दिन टेलिफोन टावरमा चढेको घटना सार्वजनिक भएको छ। सालीसँग बिहे नगराइदिए आत्महत्या गर्ने चेतावनीसहित ती युवक गाउँकै एक टेलिफोन टावरमा चढेका थिए ।

घटना भारतको उत्तर प्रदेश राज्य अन्तर्गत औरैया जिल्लाको गोपालपुर गाउँमा भएको हो। सहरुद्दीन उर्फ शेरा नाम गरेका युवक सोमबार बिहान करिब ९ बजे टेलिफोन टावरमा चढेर सालीसँग विवाह गराइदिन परिवारलाई दबाब दिएका थिए।

भारतीय सञ्चारमाध्यमका अनुसार प्रहरी र स्थानीय प्रशासनको समन्वयमा उनलाई सम्झाइ–बुझाइ गरी सुरक्षित रूपमा टावरबाट तल झारिएको थियो । त्यसपछि प्रहरीले युवकलाई नियन्त्रणमा लिई आवश्यक कानुनी प्रक्रिया अघि बढाएको जनाएको छ।

घटनाले स्थानीय क्षेत्रमा केही समय तनावको स्थिति सिर्जना भए पनि प्रहरीको सक्रियतापछि अवस्था सामान्य बनेको बताइएको छ।