गुल्मी । स्थानीय तह गठन भएको झन्डै नौ वर्षपछि गुल्मीको इस्मा गाउँपालिकाको केन्द्र टुंगिएको छ । गाउँपालिकाले वडा नम्बर ५ स्थित हुलाके नजिकै चापटारीमा केन्द्र राख्ने निर्णय गरेसँगै पालिकाको केन्द्र विवादसमेत टुंगिएको छ ।
गाउँपालिकाले सोमबार सर्वसम्मतरुपमा पालिकाको केन्द्र टुंगो लगाएको हो । लक्ष्मण विष्ट नेतृत्वको अघिल्लो गाउँपालिकाले १७ मंसिर २०७७ मा तेस्रो गाउँसभाबाट वडा नम्बर ५ स्थित रातापोखरामा पालिका भवन र वडा नम्बर ३ को माटाखानीमा कार्यालय रहने गरी निर्णय गरेको थियो । तत्कालीन समयमा गाउँसभामा रहेका २९ मध्ये २१ जनाले रातापोखराको पक्षमा र आठ जनाले विपक्षमा मतदान गरेका थिए ।
यसरी बहुमतको आधारमा अघिल्लो कार्यकालमा केन्द्र टुंगिएको थियो । अघिल्लो कार्यकालमा कांग्रेसका पाँच र एमालेका तीन जनाले रातापोखरा केन्द्रको विपक्षमा मतदान गरेका थिए । केन्द्र टुंगिएपनि सो निर्णय न्यायोचित नभएको भन्दै तत्कालीन वडा नम्बर १ र २ का वडाध्यक्षहरू चुराबहादुर खत्री र टिकाबहादुर रेश्मीले सर्वोच्चमा रिट दायर गरेका थिए । सर्वोच्चले सो रिट खारेज गरी पालिकाको केन्द्र तोक्ने अधिकार सम्बन्धित पालिकाकै हुने फैसला गरेको छ ।
त्यससँगै सर्वोच्चले पालिका केन्द्र हेरफेर गर्नुपरेमा सम्बन्धित पालिकाबाट सर्वसम्मत वा बहुमतको आधारमा निर्णय गरी केन्द्र सरकारसँग पठाउनुपर्ने फैसला सुनाएको छ । सर्वोच्चको सोही फैसलाको आधारमा वडा नम्बर ३ मा एमालेबाट निर्वाचित वडा सदस्य पोमप्रसाद भुसालको प्रस्ताव र कांग्रेसबाट निर्वाचित वडा नम्बर ६ का वडाध्यक्ष ढालबहादुर कुँवरको समर्थनमा पालिकाको केन्द्र चापटारीमा रहने निर्णय गरिएको पालिका अध्यक्ष भगतसिंह खड्काले जानकारी दिए ।
उपाध्यक्ष पार्वती कुँवरले पालिका मर्च हुने बहस चलिरहेका बेला भएपनि केन्द्र टुंगिएकोमा सम्बन्धित सबै सरोकार पक्षलाई धन्यवाद दिइन् । नौ वर्षसम्म भाडामा र विद्यालयबाट कार्यालय सञ्चालन गर्दा समस्या परेको भन्दै उनले अब छिट्टै प्रशासकीय भवन बनाउने गरी अगाडि बढ्ने बताइन् ।
सम्बन्धित समाचार
चौथो गोरखा–जितगढी पदयात्रा आइपुग्यो पाल्पा
गुल्मीमा साढे तीन वर्षमा तीन सयबढी बेपत्ता
अठार वर्षपछि सडक स्तरोन्नति गर्न थालियो
सुत्केरीको हेलिकप्टरमार्फत उद्धार
बागलुङका घरबास स्तरोन्नति गर्न अनुदान
पृथ्वी राजमार्गमा बस दुर्घटना हुँदा ३१ जना घाइते
पोखरा सभागृह पुनर्निर्माण गरिने
राष्ट्रपतिद्वारा भानु साहित्य उद्यानको शिलान्यास
