कपिलवस्तु । कपिलवस्तु जिल्लामा पूर्ण खोप सुनिश्चित गर्ने अभियानले गति लिएको छ । यसअन्तर्गत विजयनगर गाउँपालिका बुधबार पूर्ण खोप सुनिश्चित घोषणा गरिएको पाँचौँ पालिका बनेको छ ।

लुम्बिनी प्रदेशका स्वास्थ्य मन्त्री खेम सारूले विजयनगर गाउँपालिकालाई पूर्ण खोप सुनिश्चित घोषणा गर्दै बालबालिकाको स्वास्थ्य संरक्षणमा खोप कार्यक्रमको भूमिका महत्त्वपूर्ण रहेको बताए । कुनै पनि बालबालिका खोप सेवाबाट बाहिर नपरोस् भन्ने उद्देश्यले अभियानलाई थप प्रभावकारी बनाइने उनले उल्लेख गरे ।

यसैबिच गाउँपालिका अध्यक्ष गोपालबहादुर थापाका अनुसार विजयनगरमा एक वर्षमुनिका १ हजार १ सय १९ जना र ६ देखि २३ महिनासम्मका १ हजार ५ सय ६२ जना बालबालिकाले आवश्यक खोप प्राप्त गरेका छन् ।

यसअघि जिल्लाका बुद्ध भूमि, बाणगंगा, महाराजगञ्ज नगरपालिका तथा शुद्धोधन गाउँपालिका पूर्ण खोप सुनिश्चित घोषणा भइसकेका छन् । बाँकी पाँच स्थानीय तहमा पनि घोषणा प्रक्रिया अगाडि बढिरहेको खोप फोकल पर्सन केदारनाथ शाहले जनाए ।

स्वास्थ्य कार्यालयका अनुसार चालु आर्थिक वर्षमा जन्मदेखि १५ महिनासम्मका बालबालिकालाई १३ प्रकारका खोप प्रदान गर्ने कार्यक्रम सञ्चालनमा छ । घोषणा हुन बाँकी पालिकाहरूमा छुटेका बालबालिकाको खोजी गरी खोप लगाउने अभियान समेत जारी रहेको छ । कपिलवस्तु जिल्ला यसअघि २०७० फागुन १४ गते पहिलो पटक पूर्ण खोप जिल्ला घोषणा भएको थियो ।

सम्बन्धित समाचार

बबईमा पुल नहुँदा सर्वसाधारणलाई सास्ती जथाभाबी पार्किङ गर्ने सवारी साङ्लोमा बाँधिएपछि… नगरप्रहरीको ज्यादतीमा नगरप्रमुखले कारबही नगर्ने काठमाडौंका सुकुम्वासी बस्तीमा शनिबारबाट डोजर धनगढी उपमहानगरले गर्‍यो फोहोर व्यवस्थापनलाई औपचारिक पाठ्यक्रममा समावेश बाँकेमा १५६ विभिन्न वन्यजन्तुको उद्धार भर्ना शुल्कमा अनियमितता सम्बन्धमा स्थानीय सरकार र गृह मन्त्रालयसँग संवाद गर्दै शिक्षा मन्त्रालय नेपाल माइक्रो इन्स्योरेन्सका अध्यक्ष श्रेष्ठ हाजिरी जमानीमा रिहा