खोटाङ । खोटाङको हलेसी तुवाचुङ नगरपालिका–११ राजापानीस्थित चर्चित घर्तीभीर (महभीर) फोडेर सडक निर्माण सम्पन्न भएको छ । आहाले–रेग्मीटार सडक खण्ड अन्तर्गत साप्सु खोला किनारमा रहेको उक्त चट्टानी भीर वर्षौँदेखि सडक विस्तारको मुख्य अवरोध बनेको थियो ।

निर्माण कम्पनी कमल कन्स्ट्रक्सन एण्ड सप्लायर्स उदयपुरले झन्डै पाँच महिनाको समय खर्चेर चट्टान काटी सडक निकालेको हो । जोखिमपूर्ण भूगोलमा निरन्तर खनिंदै आएको उक्त चट्टानीभीर असार ११ गते अन्ततः छिचोलिएको थियो । भौतिक पूर्वाधार विकास कार्यालय खोटाङमार्फत १ करोड ७ लाख ७८ हजार रुपैयाँ लगानीमा सडक स्तरोन्नतीको ठेक्का सम्झौता २०८२ माघ ११ गते भएको थियो, जसको म्याद गत जेठ ३१ गते नै सकिएको थियो ।

काम पूरा भएसँगै असार १३ गते कोशी प्रदेशका पूर्व भौतिक पूर्वाधार विकास मन्त्री भूपेन्द्र राईले आहाले–रेग्मीटार–सगरमाथा राजमार्ग जोड्ने सडकको उद्घाटन गरे । विगतमा पनि उक्त भीर काट्ने प्रयास भएको थियो, तर जोखिमका कारण कोही अघि बढेका थिएनन् । भीर काटिएसँगै दिक्तेलबाट उदयपुरको गाईघाट जाने बाटो उल्लेख्य रूपमा छोटिएको छ । यसअघि दिक्तेलबाट महुरे–बुईपा–राजापानी–रेग्मीटार–फोक्सिङटार हुँदै वा आहाले–राजापानी–रेग्मीटार हुँदै घुमेर गाईघाट जानु बाध्यता रहेको थियो ।

अब घर्तीभीर हुँदै सिधा र छोटो बाटो खुलेको छ । महभीरका नामले समेत चिनिने यो ठाउँमा पहिले चट्टान काटेर मुस्किलले हिड्ने साँघुरो गोरेटो मात्र रहेको थियो । सडक नबनेका बेला ढाकर–टेकुवा बोकेर पैदलयात्रा गर्ने व्यापारीहरू यही भीर पार गरेर तराई झर्ने गर्दथे । यसक्रममा धेरैले लडेर ज्यान गुमाएका र खच्चड समेत साप्सु खोलामा खसेर मरेका घटनाहरू स्थानीयबासी सुनाउँछन् ।

जोखिमपूर्ण भूगोलमा निर्भीक रूपमा एक्स्काभेटर सञ्चालन गरेर सडक निर्माणलाई सफल बनाउने सिन्धुलीका प्रकाश लामा र हेटौडाका प्रकाश पाख्रिनसहित निर्माण व्यवसायी अर्जुन बरालले भौतिक पूर्वाधार विकास कार्यालयबाट विशेष सम्मान पाएका छन् । कार्यालयका अनुसार अत्यन्त चुनौतीपूर्ण चट्टानी भिरमा उच्च जोखिम मोलेर सडक विस्तारमा पु¥याएको योगदानको कदर गर्दै सम्मान गरेको हो ।

यसैक्रममा साहस र समर्पणको कदरस्वरूप दुई अपरेटरलाई नगद प्रोत्साहन पुरस्कार पनि प्रदान गरिएको छ । नेपाल राष्ट्रिय व्यवसायी महासङ्घका संस्थापक अध्यक्ष तथा समाजसेवी नरेश कटुवाल (दिक्तेल रुपाकोट मझुवागढी नगरपालिका–५ लफ्याङ घर, हाल काठमाडौं निवासी) ले १५ हजार रुपैयाँ र समाजसेवी डिल्लीराम कटुवालले ५ हजार रुपैयाँ सहयोग गरेका थिए ।

यसरी जम्मा भएको २० हजार रुपैयाँ पूर्व मन्त्री भूपेन्द्र राईले दुई अपरेटरलाई जनही १० हजार रुपैयाँका दरले हस्तान्तरण गरे । वर्षौँदेखि विकासको बाधक बनेको घर्तीभीर फोडिएर सडक सञ्चालन हुने भएपछि जिल्लाबासीलाई तराईसँग जोड्ने यातायातको क्षेत्रमा थप सहजता आउनेछ ।

सम्बन्धित समाचार

जन्तेढुङ्गा गाउँपालिकाद्वारा कर्मचारी र विद्यार्थी पुरस्कृत बैंकिङ कसुर अभियोगमा सरोज पक्राउ स्कुल बस दुर्घटना हुँदा १ जनाको मृत्यु, ३० जना घाईते पानी पर्‍यो कि राजदुवाली सम्झिन्छन् इलामे मिक्लाजुङदेखि सर्लाहीसम्म महिलाको आशा बनेकी पार्वती गच्छदार मेची कोरिडोरको भञ्ज्याङ–बेलासे सडक काम अधुरो फिक्कल माध्यमिक विद्यालयले गर्‍यो उद्यमशीलता प्रदर्शनी अर्घाखाँचीमा साठी हजार टिमुरका बिरुवा रोपिँदै