काठमाडौं । साउदी अरेबिया सरकारले रमजान १४४७ हिजरी (२०२६) को अवसर पारेर ३३ जना नेपाली कैदीलाई आममाफी दिएको छ। परराष्ट्र मन्त्रालयले मंगलबार जारी गरेको विज्ञप्तिमार्फत उक्त जानकारी सार्वजनिक गरेको हो।

नेपाल सरकारले यस कदमलाई नेपाल र साउदी अरेबियाबीच लामो समयदेखि कायम रहेको मित्रता, सद्भाव तथा सौहार्दपूर्ण द्विपक्षीय सम्बन्धको महत्वपूर्ण उदाहरणका रूपमा लिएको छ। मन्त्रालयका अनुसार साउदी सरकारको यो मानवीय निर्णयले दुई देशबीचको सम्बन्धलाई अझ प्रगाढ बनाउन सहयोग पुग्ने विश्वास गरिएको छ।

परराष्ट्र मन्त्रालयले जनाएको अनुसार रियादस्थित नेपाली दूतावासमार्फत नेपाल सरकारले गरेको अनुरोधका आधारमा साउदी सरकारले ३३ नेपाली कैदीलाई आममाफी प्रदान गरेको हो। लामो समयदेखि विभिन्न मुद्दामा सजाय भोगिरहेका नेपाली नागरिकलाई माफी प्रदान गरिनु नेपालका लागि सकारात्मक र सुखद समाचार भएको मन्त्रालयले जनाएको छ।

मन्त्रालयका अनुसार आममाफी पाएका नेपाली नागरिकहरू साउदी अरेबियाको प्रचलित कानुनअनुसार आवश्यक कानुनी प्रक्रिया पूरा गरेपछि क्रमशः नेपाल फर्कनेछन्। उनीहरूको स्वदेश फिर्ताका लागि आवश्यक समन्वय र सहजीकरणका कामहरू नेपाली दूतावासले गरिरहेको पनि मन्त्रालयले जनाएको छ।

विदेशमा विभिन्न कारणले कारागार जीवन बिताइरहेका नेपाली नागरिकको उद्धार, कानुनी सहायता तथा स्वदेश फिर्ताका लागि नेपाल सरकारले सम्बन्धित देशहरूसँग निरन्तर कूटनीतिक पहल गर्दै आएको छ। साउदी सरकारले दिएको यो आममाफी पनि त्यही पहलको सकारात्मक परिणामका रूपमा हेरिएको छ।

हाल साउदी अरेबियामा लाखौं नेपाली श्रमिक रोजगारीका सिलसिलामा कार्यरत छन्। नेपाली श्रमिकहरूको हकहित संरक्षण, कानुनी सहायता तथा समस्या समाधानका लागि नेपाल सरकार र रियादस्थित नेपाली दूतावासले विभिन्न पहलहरू सञ्चालन गर्दै आएका छन्।

परराष्ट्र मन्त्रालयले साउदी सरकारप्रति आभार व्यक्त गर्दै भविष्यमा पनि दुई देशबीचको मैत्रीपूर्ण सम्बन्ध अझ सुदृढ हुने विश्वास व्यक्त गरेको छ। मन्त्रालयले आममाफी पाएका नेपाली नागरिकहरू सुरक्षित रूपमा स्वदेश फर्कने प्रक्रिया छिट्टै पूरा हुने अपेक्षा समेत गरेको छ।

सम्बन्धित समाचार

नागढुङ्गा सुरुङमार्गमा साउनदेखि सञ्चालनको तयारी समूह ‘एल’मा इङ्ल्यान्डलाई क्रोएसियाको चुनौती सञ्चारमन्त्रीसँग हुवावे एसिया प्रशान्त क्षेत्रका अध्यक्षद्वारा शिष्टाचार भेट नेदरल्यान्ड र जर्मनी विजयी, इतिहास रच्यो कुरासाओले सभापति लामिछाने र वरिष्ठ नेता शाहद्वारा महाधिवेशन उद्घाटन यस्तो छ– रास्वपा महाधिवेशनमा खानाको मेन्यू अद्यावधिकको नाममा सदस्यता खारेज गर्ने निर्णय अलोकतान्त्रिक भएको आरोप रास्वपा केन्द्रीय सदस्य निर्वाचनको मतदान सकियो