पोखरा । रसुवाको भोटेकोशीमा आएको बाढीले ज्यान गुमाएकाहरुमध्ये हालसम्म १ सय २ शव पोखरा ल्याइएको छ । पोखरास्थित स्वास्थ्य विज्ञान प्रतिष्ठानमा पोस्टमार्टमपछि पहिचान भएका शव परिवार तथा आफन्तलाई बुझाउने गरी तथा व्यवस्थापनका लागि नवलपुर, गोरखा, तनहुँ र धादिङमा संकलन गरेर यहाँ ल्याइएको हो ।

बाढीले बगाएर नवलपुरमा फेला परेका शवमध्ये सबैभन्दा बढी ४१ शव पोखरा ल्याइएको छ । ९३ शव रामघाटस्थित पोखरा स्वास्थ्य विज्ञान प्रतिष्ठान र ९ शव मणिपाल शिक्षण अस्पतालमा छन् ।

शुक्रबार साँझसम्म ४ वटा शवको सनाखत भएको जिल्ला प्रहरी कार्यालय, कास्कीले जनाएको छ । ४ मध्ये एउटा मात्र शव मृतकका परिवारजनले बुझेर लगेका छन् । भक्तपुर नगरपालिका–९ का ३६ वर्षीय श्यामसुन्दर प्रजापतिको शव आफन्तले बुझेका हुन् । बाँकी ३ शव सनाखत भएको र पोस्टमार्टम हुन बाँकी रहेको प्रहरी निरीक्षक दीपक रिजालले बताए ।

२ दिन अवधिमा यहाँ २० शव पोस्टमार्टम भइसकेको छ । अब शनिबार बिहान ९ बजेदेखि बाँकी शवको पोस्टमार्टम सुरु गरिने रिजालले बताए । कास्कीमा शव व्यवस्थापनका लागि प्रहरी निरीक्षकको कमाण्डमा पोखरा स्वास्थ्य विज्ञान प्रतिष्ठानमा चौबिसै घण्टा हेल्प डेस्क खडा गरिएको छ । जहाँ शवको पहिचान खुल्ने गरी मुखाकृति, शरीरका टाटु, शरीरका अंगहरु भिडियोमार्फत देखाउने गरिएको छ । शव पहिचानका लागि मृतकका आफन्त तथा परिवारजन बिहीबार दिनभर मलीन मुद्रामा ओहोरदोहोर गरेको पाइन्थ्यो ।

शवको पहिचान गर्न आएका ३२ जना आफन्तलाई पोखराका विभिन्न होटलमा निःशुल्क खानेबस्ने व्यवस्था मिलाइएको छ । पहिचान भएका शव आफ्नो गृहजिल्लासम्म तथा अन्तिम दाहसंस्कार गर्ने ठाउँसम्म निःशुल्क शवबाहनको व्यवस्था गरिएको छ । ५ शववाहन तयारी अवस्थामा छन् ।

पोखरा स्वास्थ्य विज्ञान प्रतिष्ठानमा ७२ मात्र शव राख्न मिल्ने क्षमता रहेको पूर्व जानकारी गराइएको थियो । तर २०-२२ वटा शव सग्लो नभएको र हात, खुट्टा वा शरीरका अन्य अंगमात्र भेटिएकाले छुट्टाछुट्टै राख्न नपर्दा व्यवस्थापन गर्न सकिएको अस्पतालले जनाएको छ ।

‘स्याम्पलिङ र ट्यागिङ फरक–फरक हुन्छ । त्यस्ता शव फरक–फरक पोकामा एउटै ठाउँमा राखेर पनि म्यानेज गरेका छौं,’ प्रहरी निरीक्षक रिजालले भने । उनका अनुसार प्रत्येक शवको फिङ्गर प्रिन्ट लिनुका साथै डिएनए नमूना संकलन गरिएको छ । कलेक्सन, लेभलिङ र प्याकेजिङ प्रक्रियाका लागि फरेन्सिङ साइन्स ल्याबबाट प्रहरी निरीक्षकको कमाण्डमा प्राविधिक टोली पोखरा आएको छ । उक्त टोलीले शवको वैज्ञानिक परीक्षण गर्नेछ ।

सम्बन्धित समाचार

स्याङ्जामा जिप दुर्घटना : दुई जनाको घटनास्थलमै मृत्यु, चालकसहित १० जना घाइते पोखरा बसपार्कका ३२५ परिवार भूमिहीन, बस्ती स्थानान्तरण अर्काे साता सुरु भयो मिथिलामा झुलनोत्सव दाजुभाइको दीर्घायुको कामना गर्दै रानाथारू महिलाले मनाए तीज स्कुलबाट घर आउँदै गर्दा बगेकी बिनिताको शव भेटियो, एक जनाको खोजी जारी बस र मोटरसाइकल ठोक्किँदा मोटरसाइकलमा सवार दुई जनाको मृत्यु गण्डकी प्रदेश सरकारबाट मन्त्री फिर्ता बोलाउने निर्णय मोहम्मद जयन्तीमा मुस्लिम धर्मावलम्बीलाई मात्र सार्वजनिक बिदा