काठमाडौं । सर्वोच्च अदालतले राजनीतिक विश्लेषक भरत दाहाललाई २४ घन्टाभित्र मिसिलसहित उपस्थित गराउन आदेश दिएको छ ।

सर्वोच्चका न्यायाधीश कुमार रेग्मीले मंगलबार बन्दीप्रत्यक्षीकरण मुद्दाको सुनुवाइ गर्दै सरकारका नाममा यस्तो आदेश दिएका हुन् । भरत दाहालको तर्फबाट डेनिका दाहाल निवेदक रहेको मुद्दाको पेसीमा वरिष्ठ अधिवक्ता ध्रुवलाल श्रेष्ठ, अधिवक्ताहरु युवराज कोइराला, शान्ति ढुंगाना, शुभाषसिंह धामी र निकेश धितालले बहस गरेका थिए ।

‘निवेदकको मागबमोजिमको आदेश किन जारी हुनु नपर्ने हो ? आदेश जारी हुन नपर्ने भए आधार कारणसहित यो आदेश प्राप्त भएका मितिले बाटाका म्यादबाहेक २४ घण्टाभित्र अनुसन्धानको मिसिल र बन्दीसहित उपस्थित हुन महान्यायाधिवक्ताको कार्यालयमार्फत लिखित जवाफ पेस गर्नु भनी विपक्षीहरुका नाममा यो आदेश र रिट निवेदनको प्रतिलिपि साथै राखी म्याद सूचना पठाई म्यादभित्र लिखित जवाफ परे वा अवधि नाघेपछि नियमानुसार पेश गर्नू,’ आदेशमा भनिएको छ ।

अमेरिकी मिडिया ग्रेजोनले प्रकाशित गरेको समाचार सेयर गरेको आरोपमा प्रहरीले दाहाललाई पक्राउ गरेको हो । समाचार सेयर गरेकै आधारमा पक्राउ गरिनुले नागरिकको मौलिक हकमाथि सरकारले प्रतिबन्ध लगाउन खोजेको भन्दै सर्वत्र विरोध भइरहेको छ ।

सम्बन्धित समाचार

सरकारको प्रतिगामी कदम धेरै टिक्दैन : अध्यक्ष ओली केन्द्रीय कार्यसम्पादन समितिको निर्णयप्रति देउवा पक्ष असहमत प्रधानमन्त्रीसँग बैठक बसेलगत्तै गाउँपालिका अध्यक्ष सिंहदरबारबाटै पक्राउ जलवायु मुद्दामा छलफल गर्न ४२१ स्थानीय तह जोमसोममा सभामुख र प्रमुख प्रतिपक्षी दलका नेताबीच भेटवार्ता काँग्रेसको १५औँ महाधिवेशन: वडा अधिवेशन आजदेखि सुरु परराष्ट्रमन्त्री खनाल आइतबार न्यूयोर्क प्रस्थान गर्ने