सुन्दरहरैँचा (मोरङ) । राष्ट्रिय निजी तथा आवासीय विद्यालय एसोसिएसन नेपाल (नेशनल प्याब्सन) सुन्दरहरैँचा नगर समितिको आयोजनामा सम्पन्न ‘अन्तरविद्यालय स्पेलिङ कन्टेस्ट प्रतियोगिता–२०८३’ मा हिमालय इङ्लिस स्कुलले उत्कृष्ट प्रदर्शन गर्दै तीनवटै तहमा प्रथम स्थान हासिल गरेको छ।

सुन्दरहरैँचा–१२ स्थित श्री इन्द्रपुर इङ्लिस बोर्डिङ स्कुलमा शनिबार सम्पन्न प्रतियोगितामा नगर क्षेत्रका विभिन्न विद्यालयका विद्यार्थीहरूको उत्साहजनक सहभागिता रहेको थियो। विद्यार्थीको अंग्रेजी शब्दज्ञान, सही हिज्जे तथा उच्चारण क्षमता विकाससँगै आत्मविश्वास अभिवृद्धि गर्ने उद्देश्यले प्रतियोगिता आयोजना गरिएको आयोजकले जनाएको छ।

प्रतियोगिताको अध्यक्षता नेशनल प्याब्सन सुन्दरहरैँचा नगर अध्यक्ष भीम अधिकारीले गरेका थिए। कार्यक्रममा प्रमुख अतिथिका रूपमा नेशनल प्याब्सन कोशी प्रदेश अध्यक्ष तथा हिमालय इङ्लिस स्कुलका संस्थापक प्रिन्सिपल कमल खनाल सहभागी थिए।

कार्यक्रमलाई सम्बोधन गर्दै प्रमुख अतिथि खनालले विद्यालयस्तरमा आयोजना हुने यस्ता सिर्जनात्मक तथा प्रतिस्पर्धात्मक कार्यक्रमले विद्यार्थीभित्र लुकेको प्रतिभा उजागर गर्न महत्वपूर्ण भूमिका खेल्ने बताए। उनले यस्ता प्रतियोगिताले अंग्रेजी भाषाप्रतिको रुचि, शब्दज्ञान, उच्चारण क्षमता र आत्मविश्वास बढाउन सहयोग पुग्ने उल्लेख गरे।

उनले प्रतियोगितालाई केवल जित र हारका रूपमा मात्र नहेरी विद्यार्थीको सिकाइ, क्षमता अभिवृद्धि र व्यक्तित्व विकासको अवसरका रूपमा लिनुपर्नेमा जोड दिए।

तीनै तहमा हिमालयको वर्चस्व
प्रतियोगिताको प्रथम तहमा हिमालय इङ्लिस स्कुल प्रथम, पाठशाला दोस्रो, बाल बगैँचा तेस्रो र श्री इन्द्रपुर इङ्लिस बोर्डिङ स्कुल चौथो भएका छन्। त्यस्तै दोस्रो तहमा पनि हिमालय इङ्लिस स्कुल प्रथम भएको छ। यस तहमा गुरुकुल दोस्रो, श्री इन्द्रपुर इङ्लिस बोर्डिङ स्कुल तेस्रो, पाठशाला एकेडेमी चौथो, मदरल्याण्ड पाँचौँ र सप्तकोशी छैटौँ भएका छन्।

तेस्रो तहमा हिमालय इङ्लिस स्कुलले पुनः प्रथम स्थान हासिल गरेको छ। श्री इन्द्रपुर इङ्लिस बोर्डिङ स्कुल दोस्रो, मदरल्याण्ड तेस्रो र पाठशाला चौथो भएका छन्। यससँगै हिमालय इङ्लिस स्कुलले प्रतियोगिताका तीनै तहमा प्रथम स्थान हासिल गर्दै आफ्नो वर्चस्व कायम गरेको छ।

प्रतियोगितामा प्रत्येक तहका प्रथम, द्वितीय र तृतीय स्थान हासिल गर्ने विद्यार्थीलाई क्रमशः १५ हजार, १० हजार र ५ हजार नगद पुरस्कार सहित ट्रफी मेडल र प्रमाणपत्र गरिएको आयोजकले जनाएको छ। प्रतियोगितामा विद्यार्थीहरूले उत्साहपूर्वक सहभागिता जनाएका थिए। कार्यक्रममा विभिन्न विद्यालयका शिक्षक, विद्यार्थी तथा अभिभावकको उपस्थिति रहेको थियो।

नेशनल प्याब्सन सुन्दरहरैँचा नगर समितिले विद्यार्थीको प्रतिभा, सिर्जनशीलता र क्षमता विकासमा सहयोग पुर्‍याउने यस्ता अतिरिक्त तथा प्रतिस्पर्धात्मक कार्यक्रमलाई आगामी दिनमा समेत निरन्तरता दिने जनाएको छ।

सम्बन्धित समाचार

खनाललाई दिल्लीमा एक्सिलेन्स इन एजुकेशनल लिडरसिप अवार्ड डेगु नियन्त्रणमा सरोकारवालाको भूमिका महत्वपूर्ण राजनीतिक दलका गतिविधिमा संलग्न शिक्षकलाई कारबाही गर्न शिक्षामन्त्रीको निर्देशन भुसुने जंगलमा झण्डै २ कुइन्टल गाँजा हलेसी तुवाचुङमा भूमि प्रशासन सेवा सुरु उदयपुरका आठवटै पालिकामा कांग्रेसको नयाँ नेतृत्व चयन मोरङ–६ कांग्रेस क्षेत्रीय अधिवेशन बहिष्कार गर्ने सभापति तामाङ पक्षको घोषणा चित्रमा उतारिँदै मौलिकता, रङमा देखिँदै रोङको पहिचान