कोभिड–१९ को महामारीमा पनि कतारका राजकुमार शेख मोहमद विन अब्दुल्लाहले आमादब्लाम हिमालको सफल आरोहण गरेर नेपाललाई भिन्न शिराबाट पर्यटन प्रवद्र्धनको खोजी गर्नुपर्ने पाठ सिकाएका छन् । बुधबार बिहान ११ः२० बजे आमादब्लाम हिमालको चुचुरोमा पुगेका कतारका राजकुमार शेख मोहमदसहितको आरोहण दलको सफलतालाई विगतका पर्वतारोहणको निरन्तरताका रूपमा मात्र लिनु नेपालको पर्यटन विकासका लागि ठूलो दुर्भाग्य हुनेछ ।
नेपाल आफंैले पर्यटन वर्ष २०२० घोषणा गरी फिर्ता लिएको दुःखद घडीमा यसलाई समीक्षाको आधार बनाएर सिंगो पर्यटन विकासको विशिष्ट खाका तयार पार्नुपर्छ । कोरोना महामारी सामान्य नभएकाले यसले लिन सक्ने दीर्घकालीन समय र त्यस बीचमा राज्यले गर्न सक्ने सम्भावनाका कुराको राम्ररी विश्लेषण गर्नु जरुरी छ । समस्या आइपर्दा पछि हट्ने र अरू कुनै अमुक समस्या वा व्यक्तितर्फ इंगित गरी आफू चोखिन खोज्ने प्रवृत्ति नेपालीमाझ व्याप्त छ । विदेशबाट आएर नेपालको विशिष्ट सम्भावनालाई उजागर गरिदिने साउदी राजकुमारले नेपालीको सम्भावना पनि नदेख्ने र काम पनि नगर्ने प्रवृत्तिलाई झट्का दिएका छन् ।
नेपाल आफैंमा मौसमी विविधताको देश पनि हो । हावापानी पनि भौगोलिक बनावटअनुसार फरक फरक छ । प्राकृतिक, भौगोलिक विविधता, हावापानी र मौसममा हुने विविधता तिनका सबल र दुर्बल पक्षलाई ध्यान दिने हो भने नेपालले पर्यटनका विविध नयाँ आयामलाई नेपाली विशिष्टतामा विकास गरेर अघि बढाउन सक्छ । त्यसो त अन्य ऋतुभन्दा शरद् ऋतु हिमाल आरोहणका लागि वसन्तपछिको उत्तम मौसममा गणना गरिन्छ । यस बेलामा आकाश पनि स्वच्छ रहने, वर्षाको सम्भावना पनि नरहने, सन्तुलित मौसमका कारण हावाहुरी र हिमपात आदिको पनि कुनै भय नहुने अनुकूल मौसम हो हिमाल आरोहणका लागि । यसलाई मौसमी विशिष्टताका आधारमा विकास गरी अन्तर्राष्ट्रिय पर्यटनलाई आकर्षित गर्न सकिन्छ । यो आफैंमा निकै रमणीय पनि हुन्छ । डाँडापाखामा हरियाली हुनु, फूलहरु पाखाभरि फुल्नु, क्षितिज खुल्नु र हिमाल तथा पहाडहरु स्पष्ट रूपमा देखिनु शरद् मौसमका विशेषता हुन् । नेपालमा हिमाल आरोहण भने पनि उही सेतो हिउँ जमेको हिमालको मात्र परिकल्पना गरिन्छ । तर, विदेशी पर्यटकले हिमाल आरोहणमा जाँदा र आउँदाका सिंगो पर्यावरणीय वातावरणको निकै ख्याल गर्छन् र त्यसको छुट्टै आनन्द लिन्छन् ।
यो अतुलनीय प्राकृतिक पर्यावरणीय सौन्दर्य नेपाल र नेपालीका लागि ‘नजिकको तीर्थ हेला’ भनेझैं भएको प्रतीत हुन्छ । आफूले आफैंलाई बुझ्न र चिन्न नसकेर हामी आफैं हराइरहेका छौं । हाम्रो तयारी कति छ, समग्रमा त्यो पनि हामीलाई थाहा छैन । तर, कोरोना महामारीका बीचमा पनि पर्यटकीय नगरी पोखरा, चितवन र अन्य पर्यटकीय गन्तव्य स्थलमा विदेशी तथा घरेलु पर्यटकको आगमनमा बढोत्तरी हुँदै गइरहेको छ । पर्यटकको चहलपहल नेपालको पर्यटन उद्योगका लागि शुभ संकेत हो । यसलाई महामारीको अवस्थामा नेपालको पर्यटन प्रवद्र्धनका लागि एकदमै उपलब्धिमूलक र फलदायी सुरुवातका रूपमा लिनुपर्छ । यसको शिक्षाका रूपमा नेपाली पर्यटन प्रवद्र्धनका लागि नेपालले नयाँ शिराबाट पर्यटन सम्भाव्यताको अध्ययन, अनुसन्धान र प्रयोगमा अघि बढ्न जरुरी छ ।
