काठमाडौं । लामो समयदेखि जारी निषेधाज्ञाका कारण धेरै म्युजिक भिडियोको छायांकन ठप्प जस्तै छ । जसका कारण सानो पर्दामा काम गर्ने प्राविधिक पूर्ण बेरोजगार बनेका छन् । उनीहरूको चुलो बल्न समेत नसक्ने अवस्था आएको बेला १ सय २० म्युजिक भिडियोसँग सम्बन्धित कलाकार तथा प्राविधिकलाई काठमाडौंको अनामनगरमा एक समारोहबीच राहत प्रदान गरिएको छ ।
उनीहरूलाई आर्थिक समस्या पर्न थालेपछि म्युजिक भिडियो कलाकार संघ नेपालले राहत प्रदान गरेको हो । उनीहरूलाई संघका तर्फबाट चामल, दाल, तेललगायतका दैनिक उपभोग्य सामग्री वितरण गरिएको छ । म्युजिक भिडियोमा कार्यरत कलाकार, प्राविधिक एवं नृत्य कलाकारलाई राहत प्रदान गरिएको हो ।
संघका अध्यक्ष शंकर बिसीका अनुसार निषेधाज्ञाका कारण काम ठप्प भएपछि म्युजिक भिडियोसँग सम्बन्धित कलाकार, प्राविधिक एवं डान्सर समेतलाई आर्थिक अभावले हातमुख जोर्न गाह्रो परेको छ । सोही कारण संघका तर्फबाट उनीहरूलाई दैनिक उपभोग्य सामग्री प्रदान गरिएको अध्यक्ष बिसीले बताएका छन् ।
केही समयअघि मात्र निषेधाज्ञाका कारण म्युजिक भिडियोमा कार्यरत कलाकार प्राविधिकलाई आर्थिक समस्या परेको समाचार आएको थियो । सो समाचारका आधारमा उनीहरूका लागि देश विदेशबाट सहयोग प्राप्त भएको हो । सोही आर्थिक सहयोगबाट प्राप्त रकमले आफूहरूले खाद्यसामग्री किनेर सहयोग गरेको पनि अध्यक्ष बिसीले बताए ।
