न्युयोर्क । बेलायती किशोरी इमा राडुकानुले यूएस ओपन टेनिसको उपाधि जितेकी छन् । आइतबार बिहान भएको फाइनलमा १८ वर्षीया राडुकानुले क्यानडाकी अर्की किशोरी लेइला फर्नान्डेजलाई २–० को सोझो सेटमा पराजित गर्दै उपाधि जितेकी हुन् ।
अर्थर आसे स्टेडियममा बहुप्रतीक्षित मानिएको यी दुई किशोरीबीचको फाइनलमा राडुकानुले ६–४ र ६–३ ले जित हात पारिन् । राडुकानुले ४० वर्षपछि बेलायतलाई महिला एकल टेनिसमा उपाधि दिलाउन सफल भइन् । यो उपलब्धि अविश्वसनीय भएको बताउँदै इमा राडुकानुले यो उपलब्धि १९७७ मा विम्बल्डन विजेता भर्जिनिया वेडप्रति समर्पित गरिन् । त्यसयता बेलायतका कुनै पनि महिला खेलाडीले ग्रान्ड स्लामको उपाधि जितेका थिएनन् । उनी ग्रान्ड स्लाम इतिहासमा क्वालिफायर चरणबाट आएर उपाधि जित्ने पहिलो खेलाडीसमेत बनिन् ।
सन् २००४ मा अमेरिकी खेलाडी मारिया सारापोभाले विम्बल्डन जितेयता सर्वाधिक कम उमेरमा यूएस ओपन च्याम्पियन बन्ने खेलाडी बनिनन् । साथै उनी सबैभन्दा कम उमेरमा ग्रान्डस्लाम जित्ने पहिलो बेलायती खेलाडी बनिन् । राडुकानु २०१४ मा अमेरिकी सेरेना विलियम्सपछि कुनै पनि सेट नगुमाई उपाधि जित्ने खेलाडीसमेत बनिन् ।
यूएस ओपनको उपाधि जितेसँगै उनी बेलायतमा शीर्ष वरीयतामा तथा विश्व वरीयतामा २३आंै स्थानमा उक्लनेछिन् ।
