काठमाडौं । गायक, संगीतकार कालीप्रसाद बासकोटाले आफ्नो एकल साँगीतिक कन्सर्ट दिने भएका छन् । उनले यही ३१ वैशाखमा दरबारमार्गको क्लब प्लाटिनममा आफ्नो एकल गीतहरु प्रस्तुत गर्ने भएका छन् ।
नेपालमा बिदेशी कलाकारहरुको कन्सर्ट क्रम बढेको बेला काली प्रसाद बासकोटाको एकल कन्सर्ट आयोजना हुन लागेको हो । ‘कालीप्रसाद बासकोटा लाइभ’ नाम दिइएको यो कन्सर्टलाई पोजेटिभ भाइब्स इन्टरटेनमेन्ट (पीभीइ) नेटवर्कले आयोजना गर्न लागेको हो ।
उनले ‘जालमा’, ‘निर’, ‘साली मन पर्यो’लगायत विभिन्न गीतहरु प्रस्तुत गर्ने छन् । कार्यक्रममा अन्य कलाकारहरुको आकर्षक नृत्य प्रस्तुति पनि हुनेछ । गायक काली प्रसादका अनुसार कोभिड महामारीपछि काठमाडौंमा उनको यो पहिलो प्रस्तुती हुनेछ ।
काली केही समयअघि सम्पन्न गायन रियालिटी शो ‘सा रे ग म प’को निर्णायकसमेत हुन् । यसबाहेक उनले ‘नेपाल आइडल’को सिजन १, २ र ३ मा पनि निर्णायकको भूमिका निभाइसकेका छन् ।
