तनहुँ । तनहुमा सातौ पटक चितुवा खोरमा परेको छ। माघ १३ गते लोहीपाखा बन्दिपुर ४ मा बालकको ज्यान लिने नरभक्षी चितुवा शुक्रबार राति डिभिजन वन कार्यालय तनहुँले थापेको खोरमा परेको हो । सातौ पट्क चितुवा खोरमा परेको जिल्ला वन डिभिजन कार्यालय तनहुँका प्रमुख केदार बरालले बताए ।
डिभिजन वन कार्यालय, नगरपालिका र चितुवा प्रभावित क्षेत्रका सामुदायिक वनको सक्रियतामा निर्माण गरिएको परम्परागत काठको खोरमा थापिएको पासोमा चितुवा पर्न थालेपछि आक्रमणको त्रास कम हुँदै गएको छ।
पहिलो पटक २०७४ फागुन १ मा आँगनमै खेलिरहेका भानु–३ दोरदोरका ६ वर्षीय विशाल श्रेष्ठलाई चितुवाले आक्रमण गरेको थियो । त्यसयता २०७५ कात्तिक २९ मा भानु–४ जोखानेकी ४ वर्षीया रञ्जिता लम्साल, मंसिर १५ मा भानु–२ ढल्केबरका १० वर्षीय अमृत गुरुङ, गत जेठ २४ मा भानु–२ भकुन्डथोककी ९ वर्षीया पुष्पा अधिकारी, असोज २१ मा भानु–१ भन्सारका ३ वर्षीय आशिष बानियाँ, कात्तिक ११ मा भानु–२ फुर्सेटारका ७ वर्षीय ऋतिक रोका गरी ६ जनाको ज्यान गएको छ । ४ बालबालिका घाइते भएका छन् ।
चितुवाले बालबालिकालाई आक्रमण गर्न थालेपछि स्थानीय निकै त्रसित थिए । चितुवा आतंकले बालबालिका सहज रूपमा विद्यालय आवतजावत पनि गर्न सकेका थिएनन् । त्रासका कारण घरभित्रै बसिरहने अवस्था सिर्जना भएको थियो ।
