लन्डन। कोरोना संक्रमणले बेलायतमा ६६ जना नेपालीको मृत्यु भइसकेको छ भने १५ सय भन्दा बढी संक्रमित भएका छन् । यो तथ्यांकसँगै कोरोना संक्रमणले सबैभन्दा धेरै नेपालीको ज्यान बेलायतमा गएको छ ।
गैरआवासीय नेपाली संघ यूकेले हिजो शुक्रबार जारी गरेको तथ्यांकअनुसार बेलायतमा १५ सय १७ नेपालीमा संक्रमण देखिएको छ । अहिलेसम्म बेलायतमा कोरोना भाइरसको संक्रमण पुष्टि भएका ६६ जना नेपालीको मृत्यु भएको हो ।
कोरोना संक्रमण भएका कुल १५ सय १७ नेपालीमध्ये अधिकांश घरमै ‘आइसोलेसन’ बाट निको भएका छन् । ७६ जना निको भएर अस्पतालबाट घर फर्किएका छन् । अहिले पनि विभिन्न अस्पतालमा उपचारकै क्रममा रहेका संक्रमित नेपालीको संख्या ८ छ ।
एनआरएनए यूकेले सञ्चालन गरेको हेल्पलाइन र आफ्ना प्रतिनिधिहरुको सक्रियतामा नेपालीको तथ्यांक बटुलेको हेल्पलाइनका संयोजक जीत रानाभाटले जानकारी दिए । तथ्यांक संकलन गर्न कोशलेश्वर ढकाल र हेम गुरुङले हेल्पलाइनको संयोजन गरेका थिए ।
