वीरगन्ज । मध्य तराईमा अत्यधिक गर्मी बढेसँगै वीरगन्ज महानगरपालिकाभित्रका २७२ वटा शैक्षिक संस्था बन्द भएका छन् । शैक्षिक संस्था बन्द हुँदा वीरगन्ज महानगरपालिकाभित्र मात्र अध्ययनरत १ लाख १० हजार बालबालिकाको पढाई प्रभावित भएको छ ।

केही दिनदेखि मध्य तराईमा अत्यधिक गर्मी बढेसँगै विद्यालय जाने उमेर समूहका बालबालिकालाई बचाउन वीरगन्ज महानगरपालिकाले ११ र १२ असारमा बिदा दिने निर्णय गरेको छ । संघ सरकारले शनिबार र आइतबार सार्वजनिक बिदा दिने निर्णय गरेपछि सातामा पाँच दिनमात्र पढ्दै आएका विद्यार्थीको पठनपाठनमा मधेशको गर्मीले समेत सकस थपिदिएको छ ।

वीरगन्ज महानगरले बिहीबार र शुक्रबार दुई दिन सार्वजनिक बिदा दिँदा यहाँका निजी तथा सामुदायिक शैक्षिक संस्थाको पठ पाठन आगामी सोमबार मात्र सञ्चालनमा आउने भएको छ । महानगरले दिएको दुई दिनको बिदा बर्से बिदामा कट्टा हुने गरी दिएको वीरगन्ज महानगरपालिका शैक्षिक प्रशासन महाशाखा प्रमुख आनन्द लामिछानेले बताए ।

वीरगन्ज महानगरपालिकाले बिहीबार र शुक्रबार गर्मी बिदा दिँदा यहाँका ९० वटा सामुदायिक र १८२ वटा संस्थागत गरी २७२ वटा विद्यालय बन्द भएको महानगरपालिकाले जनाएको छ । ती शैक्षिक संस्थामा कुल १ लाख १० हजार विद्यार्थी पठनपाठनरत रहेको महानगरपालिकाको शैक्षिक प्रशासन महाशाखा प्रमुख लामिछानेले बताए । मौसमी प्रतिकुलताले महानगरभित्रका सबै सामुदायिक र संस्थागत तथा मन्टेश्वरी समेत बन्द गर्नु परेको उनको भनाइ छ । मौसमी प्रतिकुलताले यहाँ अध्ययनरत सबै विद्यार्थीको पठनपाठन अवरुद्ध भएको छ ।

अत्यधिक गर्मीको चपेटाबाट विद्यार्थीको जीवन रक्षा गर्नु स्थानीय सरकारको पनि कर्तव्य भएकाले यो कदम चाल्न बाध्य भएको शैक्षिक प्रशासन महाशाखा प्रमुख लामिछानेले बताए । वीरगन्ज महानगरपालिकाका कार्यवाहक नगरप्रमुख, प्रमुख प्रशासकीय अधिकृत र पर्साका निजी विद्यालयहरूको छाता संगठन प्याब्सन, एन प्याब्सन, नगर तथा जिल्ला कार्य समिति पर्सालाई महानगरपालिका शैक्षिक प्रशासन महाशाखा प्रमुख लामिछानेले जारी गरेको पत्रको बोधार्थ दिइएको छ । बोधार्थमा सरोकारवाला सबै पक्षले महानगरको निर्णय कार्यान्वयन गराउन भनिएको छ ।

आइतबारपछि विद्यालय खोल्ने या अझ बन्द गर्ने भन्ने कुरा मौसमको प्रतिकुलता हेरी नयाँ निर्णय गर्न सकिने पनि वीरगन्ज महानगरपालिका शैक्षिक प्रशासन महाशाखाले जनाएको छ ।

सम्बन्धित समाचार

खानेपानी समस्यामा संस्थानको धारा वितरणले राहत डाबरको महमा पुनः कैफियत, कार्वाही माग हर्मुज खुल्ने सहमति, युद्धविराम विस्तारको प्रयास केप भार्डे, जसले विश्व चकित बनायो हरेक वर्ष बढ्छ नेपालीको थाप्लोमा ऋण रास्वपा महाधिवेशनमा आफैँ जाने भए गगन थापा सुनको मूल्यमा पुनः उछाल, प्रतितोला १ हजार ४ सय रुपैयाँले महँगियो १३० वर्षदेखि काठमाडौंवासीलाई पानी खुवाउँदैछ शिवपुरी जलाधार