सुन्दरहरैंचा (मोरङ) । एउटा विद्यालयको सफलता केवल आधुनिक भवन, आकर्षक पूर्वाधार वा उत्कृष्ट नतिजाले मात्र मापन हुँदैन, त्यसको वास्तविक आधार दक्ष, प्रेरित र समयअनुकूल शिक्षक हुन्। यही मान्यतालाई आत्मसात् गर्दै मोरङको सुन्दरहरैंचा–५ स्थित पूर्वाञ्चल पब्लिक स्कुलले आफ्ना शिक्षक तथा शिक्षिकाको क्षमता अभिवृद्धिलाई प्राथमिकतामा राख्दै निरन्तर लगानी गरिरहेको छ।

विद्यालयले ‘शिक्षक अभिमुखीकरण कार्यक्रम–२०८३’ सञ्चालन गरेको कार्यक्रमका मुख्य प्रशिक्षक शिक्षा तथा व्यक्तित्व विकास प्रशिक्षक टोम गौतम रहेका छन्। अभिमुखीकरण कार्यक्रममा विद्यालयका सम्पूर्ण शिक्षक–शिक्षिकाको सक्रिय सहभागिता रहेको छ।

प्रशिक्षक टोम गौतमले विद्यार्थी–केन्द्रित शिक्षण प्रणाली, प्रभावकारी कक्षाकोठा व्यवस्थापन, आधुनिक शिक्षण प्रविधि, सकारात्मक अनुशासन, सञ्चार सीप, समय व्यवस्थापन, नेतृत्व विकास तथा शिक्षकको व्यावसायिक दक्षता अभिवृद्धिका विषयमा प्रशिक्षण दिइरहेका छन्। उनले बदलिँदो समयसँगै शिक्षकले पनि आफ्नो ज्ञान, सीप र शिक्षण शैलीलाई निरन्तर परिष्कृत गर्दै जानुपर्नेमा जोड दिए।

उनका अनुसार शिक्षक केवल पाठ्यपुस्तक पढाउने व्यक्ति मात्र नभई विद्यार्थीको सोच, चरित्र, सिर्जनशीलता र नेतृत्व विकास गर्ने मार्गदर्शक भएकाले उनीहरूको निरन्तर क्षमता विकास आजको आवश्यकता हो।

विद्यालयका प्रिन्सिपल सन्तोष कुमार राईका अनुसार विद्यार्थीलाई गुणस्तरीय शिक्षा प्रदान गर्न सबैभन्दा पहिले शिक्षक सक्षम, आत्मविश्वासी र समयअनुकूल हुन आवश्यक हुन्छ। त्यसैले विद्यालयले नियमित रूपमा विभिन्न तालिम, कार्यशाला र अभिमुखीकरण कार्यक्रम सञ्चालन गर्दै शिक्षकको व्यावसायिक दक्षता बढाइरहेको छ।

प्रिन्सिपल राईले भने, “हामीलाई विश्वास छ, शिक्षकमा गरिएको लगानी कहिल्यै खेर जाँदैन। आज शिक्षकलाई सिकायौं भने त्यसको प्रतिफल हजारौं विद्यार्थीको उज्ज्वल भविष्यका रूपमा समाजले प्राप्त गर्छ। त्यसैले हाम्रो पहिलो प्राथमिकता नै शिक्षकको क्षमता विकास हो।”

उनका अनुसार अहिलेको शिक्षण प्रणाली परम्परागत शैलीभन्दा धेरै फरक भइसकेको छ। त्यसैले विद्यालयले प्रविधिमैत्री, विद्यार्थी–केन्द्रित तथा व्यवहारिक शिक्षण पद्धतिलाई आत्मसात् गर्दै शिक्षकलाई समयअनुकूल बनाउने अभियानलाई निरन्तरता दिएको छ। यसले कक्षाकोठामा सिकाइलाई थप प्रभावकारी, सिर्जनात्मक र जीवनोपयोगी बनाएको उनको विश्वास छ।

विद्यालयका अध्यक्ष मोहन प्रसाद ढकालका अनुसार शिक्षकमाथि गरिएको लगानीको सकारात्मक प्रभाव विद्यार्थीहरूको सिकाइ उपलब्धि, अनुशासन, आत्मविश्वास तथा शैक्षिक नतिजामा स्पष्ट रूपमा देखिन थालेको बताए । अभिभावकहरूले समेत विद्यालयको यस पहलको प्रशंसा गर्दै आफ्ना छोराछोरीले गुणस्तरीय र व्यवहारिक शिक्षा प्राप्त गरिरहेको प्रतिक्रिया दिने गरेका छन्।

पूर्वाञ्चल पब्लिक स्कुललाई विश्वास छ “भविष्य बदल्ने शक्ति शिक्षकसँग हुन्छ।” त्यसैले विद्यालयले शिक्षकलाई केवल कर्मचारीका रूपमा नभई राष्ट्र निर्माणका अभियन्ताका रूपमा सम्मान गर्दै उनीहरूको क्षमता विकासमा निरन्तर लगानी गरिरहेको जनाएको छ।

विद्यालयले सञ्चालन गरिरहेको ‘शिक्षक अभिमुखीकरण कार्यक्रम–२०८३’ लाई पनि यही अभियानको महत्वपूर्ण कडीका रूपमा लिइएको छ। प्रशिक्षक टोम गौतमको सहजीकरणमा भइरहेको यो कार्यक्रमले शिक्षकलाई अझ सक्षम, सिर्जनशील र परिणाममुखी बनाउने विश्वास विद्यालयले व्यक्त गरेको छ।

शिक्षकलाई सशक्त बनाउँदै विद्यार्थीको उज्ज्वल भविष्य निर्माण गर्ने पूर्वाञ्चल पब्लिक स्कुलको यो अभियान गुणस्तरीय शिक्षाप्रतिको प्रतिबद्धताको सशक्त उदाहरण बनेको छ। आज शिक्षकमा गरिएको लगानीले भोलिका सक्षम, नैतिक, सिर्जनशील र जिम्मेवार नागरिक निर्माणमा महत्वपूर्ण योगदान पुर्‍याउने विश्वास विद्यालयले लिएको छ।

सम्बन्धित समाचार

सुनसरीका निजी विद्यालयमा शैक्षिक सुधारको पहल साजिलाल माविको विव्यस गठनमा राजनीतिक गन्ध साजिलाल माविको अध्यक्ष चयन विवादमा २१३औँ भानु जयन्तीमा भानु साझा पुस्तकालयको दोस्रो तला उद्घाटन निःशुल्क स्वास्थ्य शिविरले महिलाको स्वास्थ्यमा सुधार किशोरावस्थामा गर्भपतन गराउँदा प्रजनन स्वास्थ्यमा खतरा बढ्ने चिकित्सा शिक्षा आयोगको उपाध्यक्षमा खत्री नियुक्त हत्या आरोपमा एकै घरका तीन जना पक्राउ