धनगढी । कैलालीको धनगढी उपमहानगरपालिकाले तीन वर्षको अवधिमा घर तथा विभिन्न संरचनामा पसेका चार हजार ८३६ वटा सर्पको उद्धार गरेको छ ।

सर्पको टोकाइबाट हुन सक्ने जोखिम न्यूनीकरण तथा सर्प संरक्षण गर्ने उद्देश्यले उपमहानगरपालिकाले सञ्चालन गरेको सर्प उद्धार अभियानअन्तर्गत उपमहानगरको नगर प्रहरीको टोलीले उक्त संख्यामा सर्पको उद्धार गरेको हो ।

धनगढी उपमहानगरपालिकाले २०८० असार ३१ गतेदेखि घर तथा अन्य संरचनामा पसेका सर्पको उद्धारका लागि अभियान सुरु गरेको थियो । उपमहानगरपालिकाका अनुसार अभियान सुरु भएदेखि २०८३ भदौ मसान्तसम्म चार हजार ८३६ वटा सर्पको उद्धार गरिएको हो ।

नगर प्रहरी टोलीले घरगोठ, कार्यालय, पसल, आँगन, बाथरुमलगायतका स्थानमा पसेका सर्पलाई सुरक्षित रूपमा नियन्त्रणमा लिएर उपयुक्त प्राकृतिक क्षेत्रमा छाड्ने गरेको छ ।

उद्धार गरिएका सर्पमा कमन करेत, करेत, अजिङ्गर, कमन कोब्रा, ब्ल्याक कोब्रा, किङ कोब्रा र ब्यान्डेड करेतलगायतका प्रजाति रहेका छन् । विषालु तथा गैरविषालु दुवै प्रजातिका सर्पको उद्धार गरिँदै आएको नगर प्रहरीले जनाएको छ ।

धनगढीमा घर, कार्यालय, पसल वा अन्य संरचनामा सर्प पसेमा नगर प्रहरीलाई तत्काल खबर गर्न सकिने व्यवस्था गरिएको छ । त्यसका लागि उपमहानगरपालिकाले ०९१–५९०६९० र टोल फ्री नम्बर १८१०५००००९० सार्वजनिक गरेको छ । सूचना प्राप्त भएपछि नगर प्रहरीको सर्प उद्धार टोली घटनास्थलमा पुगेर सर्पलाई सुरक्षित रूपमा नियन्त्रणमा लिने गरेको छ ।

अभियान सुरु गर्दा उपमहानगरपालिकाले २५ जना नगर प्रहरीलाई सर्प उद्धारसम्बन्धी विशेष तालिम दिएको थियो । शुक्लाफाँटा राष्ट्रिय निकुञ्जको टोलीले नगर प्रहरीलाई सर्प उद्धार, नियन्त्रण र सुरक्षित स्थानान्तरणसम्बन्धी तालिम दिएको थियो । तालिमप्राप्त नगर प्रहरीले पछि अन्य नगर प्रहरीलाई समेत सर्प उद्धारसम्बन्धी सीप र प्रविधि’bout प्रशिक्षण दिँदै आएका छन् ।

सर्पको टोकाइबाट हुने जोखिम न्यूनीकरण गर्दै नागरिकको ज्यान जोगाउने उद्देश्यले सुरु गरिएको अभियानले सर्प संरक्षणमा समेत योगदान पुर्‍याएको उपमहानगरपालिकाको भनाइ छ ।

उद्धार गरिएका सर्पलाई नमारिकन सुरक्षित रूपमा प्राकृतिक क्षेत्रमा छाड्ने गरिएकाले अभियानप्रति स्थानीयवासीको सकारात्मक प्रतिक्रिया रहेको नगर प्रहरीले जनाएको छ ।

सम्बन्धित समाचार

बाढीबाट जोगिएका कैलालीका श्रमिक घर फर्किए, १४० भन्दा बढी अझै सम्पर्कविहीन धनगढीमा ‘भलमन्सा प्रथा संरक्षण तथा विकास ऐन २०८३’ वारे अभिमुखीकरण खुम्रे किराले बाजुराबासीको गाँस खोस्यो ! कञ्चनपुरका नदी तटीय क्षेत्रका बासिन्दालाई सतर्क रहन आग्रह बाढीमा मृत्यु हुनेको संख्या १ हजार ३५६ पुग्यो, ४ हजार ९९४ अझै बेपत्ता बझाङ अस्पताललाई दक्ष जनशक्ति र उपकरणसहित ५० शय्याको बनाउन माग कैलालीका तीन पालिकामा असोज १ देखि जेईविरुद्ध खोप, १ लाख ८२ हजारलाई लगाइने राहत कोषमा प्याब्सनको १२ करोड सहयोग, काठमाडौं प्यबसनबाट ४ करोड रुपैयाँ