काठमाडौं । २०औँ एसियाली खेलकुद (एसियाड) मा ट्रायथलनतर्फ प्राविधिक अधिकारीका रूपमा सहभागी हुन नेपालका चाहना शाह र पुष्प रत्न बज्राचार्य जापान प्रस्थान गर्दै छन् ।

नेपाल ट्रायथलन संघले बुधबार दुवैलाई बिदाइ गरेको हो । अन्तर्राष्ट्रिय रेफ्री तथा प्राविधिक अधिकारीका रूपमा एसियाडमा सहभागी हुने दक्षिण एसियाकै दुई प्रतिनिधि नेपालबाट छनोट हुनु नेपाली खेलकुदका लागि महत्वपूर्ण उपलब्धि भएको संघले जनाएको छ ।

आफ्‌नो प्राविधिक क्षमता थप निखार्न दुवै अधिकारी हालै दक्षिण कोरियामा आयोजित अन्तर्राष्ट्रिय एन्टी–डोपिङ तथा विशेष प्राविधिक सेमिनारमा सहभागी भएर स्वदेश फर्किएका थिए ।

यसपटक एसियाडको ट्रायथलन प्रतियोगितामा भने नेपाली खेलाडीले सहभागिता जनाउन पाएका छैनन् । नेपाल ट्रायथलन संघका अध्यक्ष नीलेन्द्रराज श्रेष्ठले ओलम्पिक कमिटीको आन्तरिक विवादका कारण नेपाली ट्रायथलन टोलीलाई एसियाडमा समावेश नगरिएकोमा दुःख व्यक्त गरे । उनले यस निर्णयबाट नेपाली खेलाडी अन्यायमा परेको बताए ।

नेपाली खेलाडी प्रतियोगितामा सहभागी हुन नपाए पनि प्राविधिक अधिकारीका रूपमा दुई नेपालीले अन्तर्राष्ट्रिय प्रतियोगितामा निर्णायक भूमिका निर्वाह गर्न पाउनु महत्वपूर्ण अवसर भएको श्रेष्ठले बताए ।

जापानको आइची–नागोयामा हुने एसियाडअन्तर्गत ट्रायथलनका प्रतिस्पर्धा सेप्टेम्बर २० र २१ मा सञ्चालन हुँदै छ । बिदाइ कार्यक्रममा अध्यक्ष श्रेष्ठले एसियाडजस्तो ठूलो अन्तर्राष्ट्रिय प्रतियोगितामा प्राविधिक अधिकारीको भूमिका र जिम्मेवारी महत्वपूर्ण हुने बताउँदै दुवैलाई शुभकामना दिए ।

सम्बन्धित समाचार

मलेसियाले नेपाललाई दियो एक सय चार रनको सामान्य लक्ष्य नेपाल ‘ए’ ‘टस’ जितेर न्युजिल्यान्ड विरुद्ध ‘ब्याटिङ’ गर्दै एसिसी प्रिमियर कपः नेपाललाई साउदी अरेबियाविरुद्ध फिल्डिङको निम्तो एसिसी प्रिमियर कपः साउदी अरेबियाद्वारा नेपाललाई १९१ रनको लक्ष्य ईसेवाले पायो एनपीएलको टिकट बेच्ने अधिकार एसिसी प्रिमियर कपः नेपाल ओमानसँग खेल्दै एनभीएल : काठमाडौं र कर्णाली फाइनलका लागि भिड्दै एउटै खेलमा कप्तान लामिछानेको नाममा तीन उपलब्धि