काठमाडौं । नेपाली कांग्रेसको १५औँ महाधिवेशनमा सभापतिका लागि गगनकुमार थापा, किशोरसिंह राठौर र श्यामकृष्ण खड्गीबीच प्रतिस्पर्धा हुने भएको छ ।

सभापतिमा तीन जनाको उम्मेदवारी परेको छ । यीमध्ये थापा र राठौरबीच मुख्य प्रतिस्पर्धा हुने देखिएको छ । वरिष्ठ उपसभापति र महिला उपसभापति भने निर्विरोध भएका छन् ।

वरिष्ठ उपसभापतिमा विश्वप्रकाश शर्मा र महिला उपसभापतिमा पुष्पा भुसालको मात्र उम्मेदवारी परेकाले उनीहरू निर्विरोध निर्वाचित भएका हुन् । निर्वाचन समितिले औपचारिक घोषणा गरेपछि उनीहरूको निर्विरोध निर्वाचनले औपचारिकता पाउनेछ ।

कांग्रेसको संशोधित विधानअनुसार यसपटक केन्द्रीय कार्यसमिति १६७ बाट बढाएर २९७ सदस्यीय बनाइएको छ । पदाधिकारी संख्या १४ बाट बढाएर २६ पु-याइएको छ । नयाँ संरचनामा एक सभापति, एक वरिष्ठ उपसभापति, चार उपसभापति, तीन महामन्त्री, १५ सहमहामन्त्री, एक कोषाध्यक्ष, एक प्रवक्ता र एक सहप्रवक्ता रहने व्यवस्था गरिएको छ ।

यसपटक थपिएको वरिष्ठ उपसभापति सभापतिपछिको वरीयतामा रहनेछ । चार उपसभापतिमध्ये एक जना महिला अनिवार्य गरिएको छ । तीन महामन्त्रीमध्ये एक जना महिला हुनुपर्ने व्यवस्था छ । सहमहामन्त्रीको संख्या आठबाट बढाएर १५ पु¥याइएको छ ।

खुला उपसभापतिका दुई पदका लागि डा. चन्द्र भण्डारी, देवराज चालिसे, सुरेन्द्रराज पाण्डे, मधुप्रसाद आचार्य, डा. मीनेन्द्र रिजाल, दीपक गिरी, धनराज गुरुङ, गोविन्द भट्टराई र डा. चन्द्रमोहन यादव गरी नौ जनाको उम्मेदवारी परेको छ । महिला उपसभापतिमा पुष्पा भुसाल निर्विरोध भएकी हुन् । समावेशी उपसभापतिमा जीवन परियार, विनोद चौधरी, फरमुल्लाह मन्सुर, सीता गुरुङ र रञ्जित कर्णबीच प्रतिस्पर्धा हुनेछ ।

खुला महामन्त्रीका दुई पदमा प्रदीप पौडेल, गुरुराज घिमिरे, उदयशमशेर राणा, अमरसिंह पुन, नैनसिंह महर, शंकर तिवारी, डा. सुनिलकुमार शर्मा र डा. सन्तोष उपाध्याय उम्मेदवार छन् । महिला महामन्त्रीमा डा. डिला संग्रौला, महालक्ष्मी उपाध्याय ‘डिना’ र रिता खनालबीच प्रतिस्पर्धा हुनेछ ।

१५ सहमहामन्त्रीका विभिन्न क्लस्टरमा पनि उम्मेदवारी परेको छ। खुलातर्फ देवेन्द्रराज कँडेल, रामहरि खतिवडा र डिल्लीराम सुवेदी, महिलातर्फ प्रतिमा गौतम, खस–आर्यतर्फ मनोजमणि आचार्य, अजयबाबु शिवाकोटी र जगदीश्वरनरसिंह केसी तथा पिछडिएको क्षेत्रतर्फ जीवनबहादुर शाही र मीन भाम उम्मेदवार छन् ।

आदिवासी जनजातितर्फ बहादुरसिंह लामा, थारूतर्फ तेजुलाल चौधरी र योगेन्द्र चौधरी, दलिततर्फ लक्ष्मी परियार, प्रकाश रसाइली ‘स्नेही’, मानबहादुर नेपाली र नरेन्द्र पासवान, मधेशीतर्फ अभिषेकप्रताप शाह, मुस्लिमतर्फ अब्दुल सत्तार र अल्पसंख्यकतर्फ आङगेलु शेर्पाको उम्मेदवारी परेको छ ।

संशोधित विधानले केन्द्रीय सदस्यको संख्या पनि बढाएको छ । खुला केन्द्रीय सदस्य ४५, महिला खुला १५ तथा प्रदेश, दलित, आदिवासी जनजाति, खस–आर्य, मधेसी, थारू, पिछडिएको क्षेत्र, जनसम्पर्क समिति, श्रमिक, पेशागत विज्ञ, युवा, अपांगता भएका व्यक्ति र प्रजातन्त्र सेनानीका लागि छुट्टाछुट्टै प्रतिनिधित्वको व्यवस्था गरिएको छ ।

केन्द्रीय कार्यसमितिले ६६ जना सदस्य मनोनयन गर्न सक्ने व्यवस्था पनि छ । यसपटक ७ हजार ११४ महाधिवेशन प्रतिनिधिले नयाँ नेतृत्व चयन गर्नेछन् ।

सम्बन्धित समाचार

एमालेमा विद्यादेवी भण्डारी दोस्रो वरीयताक्रममा रहने कांग्रेस महाधिवेशन उद्घाटन समारोहमा रवि, केपी र प्रचण्डलाई आमन्त्रण कांग्रेस महाधिवेशनः ‘विधिको कांग्रेस’मा गगनको शक्ति परीक्षण विपद् अध्ययन गर्ने संसदीय विशेष समितिका सभापति पराजुलीले लिए शपथ कांग्रेसको देउवा पक्षको वडा अधिवेशन आज हुँदै, उल्लासपूर्ण सहभागिताका लागि देउवाको अपिल कांग्रेसविरोधी गतिविधिमा लाग्नेलाई अनुशासन समितिले कडा कारबाही गर्ने कांग्रेस महाधिवेशनको मञ्चमा नेताहरू (फोटोफिचर) कांग्रेसको बन्दसत्रलाई भोलि बिहान गगन थापाले सम्बोधन गर्ने