डडेल्धुरा । गन्यापधुरा गाउँपालिकाले आफ्नै आधुनिक प्रशासकीय भवनबाट सेवा प्रवाह सुरु गर्ने भएको छ । डडेल्धुराका पाँच गाउँपालिकामध्ये आफ्नै प्रशासकीय भवन निर्माण सम्पन्न गरी सेवा सञ्चालनको तयारी गरेको गन्यापधुराले आइतबार नवनिर्मित भवनको उद्घाटन गरेको हो ।

गाउँपालिका अध्यक्ष इन्द्रबहादुर कार्कीले वडा नम्बर २ गणेशपुरमा निर्माण गरिएको भवनको रिबन काटेर उद्घाटन गरेका हुन् । उनले शिलालेखको अनावरणसमेत गरेका थिए । हिन्दु धार्मिक परम्पराअनुसार पूजाआजा गरी भवनको विधिवत् उद्घाटन गरिएको वडा नम्बर २ का अध्यक्ष मनोज देउवाले बताए ।

तीन वटा सभाहलसहित ३६ कोठा रहेको भवन निर्माण सम्पन्न भएपछि लामो समयदेखि भाडाको घरबाट सेवा दिँदै आएको गाउँपालिकाले आफ्नै स्थायी प्रशासनिक केन्द्र प्राप्त गरेको छ । यसअघि गाउँपालिकाले भाडाको घर तथा कृषि र पशु सेवाका लागि निर्माण गरिएको एकीकृत भवनबाट प्रशासनिक कामकाज सञ्चालन गर्दै आएको थियो ।

आफ्नै भवनबाट सेवा सञ्चालन भएपछि प्रशासनिक कामकाज व्यवस्थित हुनुका साथै सेवाग्राहीलाई सेवा लिन र कर्मचारीलाई सेवा प्रवाह गर्न सहज हुने गाउँपालिका अध्यक्ष कार्कीले बताए । उनका अनुसार पर्याप्त कार्यकक्ष, बैठक तथा छलफलका लागि सभाहल र प्रशासनिक काम सञ्चालन गर्न आवश्यक संरचना तयार भएकाले गाउँपालिकाको सेवा प्रवाह थप व्यवस्थित हुनेछ ।

स्थानीय तहको जिम्मेवारी सम्हालेपछि गाउँपालिकाले प्रशासनिक संरचनासँगै शिक्षा, स्वास्थ्य, खेलकुद, सडक, सिँचाइ, खानेपानी र खेलकुदका पूर्वाधार निर्माणलाई प्राथमिकता दिँदै आएको कार्कीले बताए । पाँच वटा वडा रहेको गाउँपालिकामा चार वटा वडाका आफ्नै भवन निर्माण भई सेवा प्रवाह भइरहेको उनले जानकारी दिए ।

गाउँपालिकाले एमबिबिएस चिकित्सकसहितको १० शय्याको आधारभूत अस्पतालसमेत सञ्चालनमा ल्याएको छ । स्थानीयस्तरमै स्वास्थ्य सेवा उपलब्ध हुन थालेपछि सामान्य उपचारका लागि टाढा जानुपर्ने बाध्यता कम गर्न सहयोग पुगेको कार्कीको भनाइ छ । सडक, सिँचाइ, खानेपानी तथा कृषि क्षेत्रका पूर्वाधार निर्माणले स्थानीयको दैनिक जीवन सहज बनाउन सहयोग पुगेको उनले बताए । गाउँपालिकामा दुई वटा शीतभण्डारसमेत सञ्चालनमा रहेको कार्कीले जानकारी दिए ।

गाउँपालिकाका प्रमुख प्रशासकीय अधिकृत लिलिप तामाङका अनुसार प्रशासकीय भवन निर्माणका लागि २०७८ पुस २२ गते ठेक्का सम्झौता भएको थियो । सम्झौताअनुसार २०८१ पुस २० गतेसम्म निर्माण सम्पन्न गर्नुपर्ने भए पनि सङ्घीय सरकारबाट साझेदारीअनुसारको बजेट समयमै प्राप्त नहुँदा निर्माणमा ढिलाइ भएको उनले बताए ।

भवन निर्माणका लागि छ करोड ५२ लाख रुपैयाँमा ठेक्का सम्झौता भएको थियो । भवनको कुल लागत भने छ करोड ५३ लाख रुपैयाँ रहेको तामाङले जानकारी दिए । निर्धारित समयभन्दा करिब दुई वर्ष ढिलोगरी भवन निर्माण सम्पन्न भएको हो । गाउँपालिकाको नाममा ११ रोपनी जग्गा रहेकोमा आठ रोपनी क्षेत्रफलमा प्रशासकीय भवन निर्माण गरिएको तामाङले बताए । तीन वटा सभाहल र पर्याप्त कार्यकक्षसहितको भवनबाट प्रशासनिक कामकाज, बैठक, छलफल तथा विभिन्न कार्यक्रम सञ्चालन गर्न सहज हुने अपेक्षा गरिएको छ ।

आफ्नै प्रशासकीय भवन, वडा कार्यालय र स्वास्थ्य संस्थाको पूर्वाधार निर्माणसँगै गाउँपालिकाको संस्थागत क्षमता विकास र नागरिकलाई स्थानीयस्तरमै सेवा उपलब्ध गराउने आधार थप बलियो बनेको छ ।

सम्बन्धित समाचार

डिजिटल बोर्डमार्फत सुदूरपश्चिम चिनाउँदै धनगढी उपमहानगर, २३ वटा पर्यटन प्रवर्द्धनात्मक बुकलेट सार्वजनिक धनगढीको जेन्जी मार्गमा डिजिटल बोर्ड सञ्चालन, दैनिक ३ घण्टा प्रसारण हुने कालीगण्डकीः हिमतालभन्दा पहिरोको जोखिम लालबकैया नदीमा डुबेकी महिलालाई इन्स्पेक्टर केसीले जोखिम मोलेर बचाए पर्वलक्षित सुरक्षाः लामो दूरीका सवारीमा दुई चालक अनिवार्य बझाङमा जिप दुर्घटना हुँदा चालकको मृत्यु, दुई जना घाइते चित्रमा उतारिँदै मौलिकता, रङमा देखिँदै रोङको पहिचान सुदूरपश्चिममा फेरि रोकियो बजेट, प्रदेशसभा बैठक २४ गतेसम्म स्थगित