काठमाडौं । सरकारले काठमाडौं उपत्यकामा सञ्चालन हुने सार्वजनिक बस, माइक्रो बस र टेम्पोमा जोरबिजोर प्रणाली हटाएको छ ।
काठमाडौं, भक्तपुर र ललितपुरका प्रमुख जिल्ला अधिकारीहरूको शुक्रबार बसेको संयुक्त बैठकले सार्वजनिक यातायातका साधन (बस, माइक्रो बस र टेम्पो)मा लगाइएको जोरबिजोर प्रणाली हटाउने निर्णय गरेको हो ।
सार्वजनिक यातायातमा जोरबिजोर प्रणाली हटाइए पनि निजी सवारीसाधन (कार, मोटरसाइकल, स्कुटरलगायत) र सार्वजनिक ट्याक्सीमा भने जोरबिजोर प्रणाली यथावत् राखिएको छ ।
कोरोना भाइरस संक्रमणको जोखिमलगायत पछिल्लो परिस्थितिको मूल्यांकन गरेर सार्वजनिक सवारीसाधनमा जोरबिजोर हटाइएको र निजी सवारी तथा ट्याक्सीको हकमा यसअघि कायम गरिएको जोरबिजोर प्रणालीलाई यथावत् राखिएको जनाइएको छ ।
तीन जिल्लाका प्रमुख जिल्ला अधिकारीहरूको संयुक्त बैठकले ६ माघमा सबै प्रकारका सवारीसाधनमा जोरबिजोर प्रणाली लागू गर्ने निर्णय गरेका थिए । सो नियमले सार्वजनिक सवारीसाधनमा झनै भिडभाड बढेको भन्दै आलोचना बढेको थियो ।
