काठमाडौं । निर्देशक दीपेन्द्र गौचनले आफ्नो चलचित्र ‘मिसिङ : केटी हराएको सूचना’ आगामी ३० कात्तिकमा रिलिज गर्ने भएका छन् । यो चलचित्रको शुक्रबार टिजर सार्वजनिक गर्दै यसको प्रदर्शन मिति घोषणा गरिएको हो ।
दुई दशकपछि कथानक चलचित्रबाट नेपाली दर्शकमाझ निर्देशक गौचन आउन लागेका हुन् । उनले त्यतिबेला निर्देशन गरेको बाल कथामा आधारित चलचित्र उजेली देश बिदेशमा लोकप्रिय भएको थियो । त्यसपछि बृत्तचित्रको निर्देशनसँगै केही वर्ष कम्बोडियामा चलचित्रमा काम गरेर नेपाल फर्किएका दीपेन्द्रले यसपटक ‘मिसिङ : केटी हराएको सूचना’ निर्देशन गरेका हुन् । यो चलचित्रमा नाजिर हुसेन, सृष्टी श्रेष्ठ, अमितेश शाहसहित विभिन्न कलाकारहरुको अभिनय रहेको छ ।
निर्देशक गौचन र क्युएफएक्स चेन सिनेमाघरका सञ्चालक नकिम उद्दिनले मिलेर स्थापना गरेको ट्राइ–सिटी पिक्चर्सले चलचित्र ‘मिसिङ ः केटी हराएको सूचना’ निर्माण गरेको हो । आफुहरुले मनोरञ्जन मात्रनभई सामाजिक रूपमा प्रभावपार्ने चलचित्र निर्माण गरेको निर्देशक गौचनले बताएका छन् ।
यो चलचित्र तराई क्षेत्रमा हुने अपराध र त्यहाँको जीवनशैलीमा केन्द्रित रहेको छ । तराईमा पहाडे समुदाय र मधेसी समुदायको केटाकेटीबीचको प्रेमले निम्त्याउने विभेदको कथा यो चलचित्रमा समेटिएको पनि निर्देशक गौचनले बताएका छन् ।
