काठमाडौं । होस्टेल र होस्टेल २ को सफलतापछि चलचित्र ’होस्टेल ३’को पनि निर्माण थालिएको छ । यो चलचित्रको आईतबारबाट काठमाडौंमा छायाँकन सुरुगरिएको हो ।
आइतबार बिहान ललितपुरको कार्यविनायक मन्दिरमा शुभ मुहूर्त गर्दै नेपाली यो चलचित्रको छायाँकन थालिएको हो। मुहूर्त शटमा चलचित्रका प्रमुख कलाकार पारस बम र सिम्रन पन्तले टेक दिए ।
यो चलचित्रको काठमाडौंमा २५ दिन छायाँकन गर्ने र त्यसपछि बाँकी छायाँकन तिहारलगत्तै गर्ने निर्माण पक्षले जनाएको छ ।
यो चलचित्रलाई सशान कँडेलले निर्देशन गरिरहेका छन् । होस्टेल ३ मा पारस बम, रिहान गिरी, आशिष घिमिरे, पदम तामाङ, सिम्रन पन्त, हेना नगरकोटी, उमर खान, समा पराजुली, सन्तोष बानियाँलगायतका कलाकारहरूको अभिनय रहने छ । चलचित्रमा अभिनेता आर्यन सिग्देल शिर्ष भूमिकामा छन् भने उनको जोडीमा अभिनेत्री परीक्षा लिम्बु रहने छिन् ।
होस्टेल ३ लाई आगामी १६ फागुनमा विश्वभर एकसाथ रिलिज गरिने निर्माण पक्षले आईतबार जनायो । चलचित्रका डिओपीमा अर्जुन तिवारी, सिनेमाटोग्राफर बुद्ध थापा र मनोज खत्री छन् । यसका कार्यकारी निर्माता शङ्कर कोइराला, निर्माता कर्ण कार्की र गोविन्द अधिकारी हुन ।
