मुगु । सामाजिक सञ्जालमा बुधबार एउटा कारुणिक दृश्य देखियो । जुन मुगु पश्चिम खत्याड गाउँपालिका–४ माझचौरको थियो । एउटा स्टे«चरमा चार–पाँच अधबैंसे महिला बिरामी बोकेर माझचौरस्थित निजी औषधि पसलतर्फ लाग्दै थिए ।
उनीहरू गाउँपालिकाकै वडा नं. ३ माथिखर्कगाउँका स्थानीय महिला हुन् । खत्याड गाउँपालिका–३ माथिखर्कगाउँकी ७० वर्षीया पञ्चा टमटा दमले थला परेपछि उनलाई गाउँकै चार–पाँच महिलाले बोकेर औषधि पसल पु¥याएर उपचार गराए । करिब डेढ घण्टाको पैदल दूरीमा रहेको गाउँदेखि ती महिलाले स्ट्रेचरमा बिरामी बोकेर उपचार गराउन पुग्नु सम्भवतः जिल्लाका लागि पहिलो घटना हो ।
‘त्यो दृश्य माझचौरमै स्टेसनरी पसल गर्दै आएका खत्याड–११ रातापानीका कमल कार्कीको आँखामा ठोक्कियो । उनले तस्बिर खिचे अनि फेसबुकमा सार्वजनिक गर्दै लेखे, ‘देशको अवस्था यतिसम्म भइसकेछ जबकि गाउँमा बूढापाका बिरामी हुँदा पनि बोकेर स्वास्थ्यचौकीसम्म लैजान युवा छैनन् ।
हुन त, कसरी गाउँमा युवाहरू बसून् ? रोजगारी छैन, श्रम गरेर खान पुग्दै काम गरे नि एक–दुई वर्षसम्म ज्याला मिल्दैन ! अनि कसरी गाउँमा बस्ने ? कसरी परिवार पाल्ने ? देशका ७ सय ५३ स्थानीय तहका वडादेखि केन्द्रसम्म भ्रष्टाचारी नेतालाई पालनपोषण गर्न सबै पार्टी लागिपर्ने अनि कसरी देश अगाडि बढ्ला ?’