पोखरा । २४ औं आहारारा पोखरा गोल्डकपमा १८ पेनाल्टीपछि बल्ल नतिजा निस्केको छ । पोखरा रंगशालामा बिहीबार चर्च ब्वाइज युनाइटेड क्लबले एनआरटीलाई सडन डेथको शिकार बनाउँदा दुवैतर्फ कुल १८ पेनाल्टी प्रहार हुन गएको थियो । लामो समयदेखि पोखरा रंगशालामा दुर्लभ नतिजा निस्केको हो ।
निर्धारित समयमा गोल गरेर अग्रता दिएको एनआरटी अन्ततः पेनाल्टी सुटआउटमा भने ६–५ गोलअन्तरले पराजित भयो ।
पेनाल्टीमा चर्च ब्वाइजका कीपर टिकेन्द्र थापा नायक बने । उनले ३ पेनाल्टी रोकेका थिए । उनी म्यान अफ दि म्याच समेत घोषित भए ।
यो जितसँगै चर्च ब्वाइजले अब साविक विजेता विभागीय त्रिभुवन आर्मी क्लबसँग २८ माघमा तेस्रो क्वाटरफाइनल खेल्नेछ ।
निर्धारित ९० मिनेटको खेलमा दुवैतर्फबाट एक–एक गोल भएपछि खेल अतिरिक्त समयमा धकेलिएको थियो । अतिरिक्त समयमा गोल नभएपछि अन्ततः टाइब्रेकरमा धकेलिएको हो ।
खेलको २५ औं मिनेटमा एनआरटीका लागि रिचर्ड विल्सनले गोल गर्दै अग्रता दिलाएका थिए । ६४ औं मिनेटमा चर्च ब्वाइजले बराबरी खेल्यो । नवीन लामाले पेनाल्टी प्रहार सदुपयोग गर्दै गोल गरेका हुन् । उनैले पेनाल्टी सुटआउटमा थप २ गोल गर्न सके ।
शुक्रबारको खेल भारतको थण्डरबोल्ट नर्थ युनाइटेड र संकटा क्लबबीच हुनेछ ।
गत २२ माघदेखि सुरु प्रतियोगितामा यसअघि नेपाल पुलिस क्लब र मच्छिन्द्र क्वाटरफाइनल प्रवेश गरिसकेका छन् ।
३ फागुनमा हुने प्रतियोगितामा १२ टिमले भाग लिएका छन् । विजेताले १२ लाख र उपविजेताले ६ लाख प्राप्त गर्ने क्लब अध्यक्ष केशवराज बरालले बताए ।
