कालिकोट । कालिकोट जिल्लाको पलाँता गाउँपालिका १ राडुनेटामा सडक निर्माणका विषयमा विवाद हुँदा दोहोरो झड्प भएको छ । बन्दाबन्दी खुकुलो भएसंगै वडा नं १ को राडुनेटामा स्काभेटरसहित सडक खन्न पगेका गाउँपालिका अध्यक्ष लक्ष्मणबहादुर बममाथि नेकपाका गाउँ कमिटीका अध्यक्ष विष्णु रोकाया इन्द्र र वडा नं १ का अध्यक्ष मानबहादुर भण्डारीको योजनामा अध्यक्षमाथि आक्रमण भएको हो ।
वडा नं २, ३ र ४ को बाटो खन्न गाउँपालिकाले सुरु गर्न थालेपछि डोजर लगाएर बाटो खन्न नपाइने भन्दै अध्यक्षमाथि आक्रमण भएको प्रहरीले जनाएको छ । जिल्ला प्रहरी कार्यालय कालीकोटका प्रहरी प्रमुख श्यामबाबु ओलियाले गाउँपालिका अध्यक्ष बम र उनकी श्रीमतीलगायतका केही घाइत भएको बताए । घाइते उनीहरुको राडुनेटामा रहेको स्वास्थ्य चौकीमा उपचार भइरहेको छ । अध्यक्ष बमकी श्रीमती गोरीकला बम सख्त घाइते भएकी छन् । अन्यलाई सामान्य चोटपटक लागेको भएपनि अध्यक्ष पत्नीको चोट बढी भएको आफूलाई जानकारी आएको आएको प्रहरी प्रमुख ओलियाले बताए ।
गाउँपालिका अध्यक्ष र घाइते वडाध्यक्ष र नेकपा गाउँ कमिटीका अध्यक्षको पहिलेदेखि नै विभिन्न विषयमा विवाद हुँदै आइरहेको छ । झडप हुने क्षेत्रमा टेलिफोनले काम नगर्दा सम्बन्धित जनप्रतिनिधिसँग सम्पर्क गर्न सकिएको छैन ।