काठमाडौं । सत्तारूढ नेपाल कम्युनिस्ट पार्टी (एमाले) निकटको अनेरास्ववियुको नयाँ नेतृत्व चयनका लागि महाधिवेशन भइरहेको छ । हालै राष्ट्रिय युवा संघको पोखरामा महाधिवेशन सम्पन्न भएको छ । युवा र विद्यार्थी संगठन पार्टीको महत्वपूर्ण संगठन हो ।

प्रधानमन्त्री एवं एमाले अध्यक्ष केपी शर्मा ओलीले दुवै संगठनमा नेतृत्व सर्वसम्मत ल्याउन चाहेका हुन् । त्यसका लागि उनले कडा निर्देशन नै दिएका थिए । तर, युवा र विद्यार्थी संगठनमा ओली निर्देशनको अवज्ञा भएको छ । सर्वसम्मत नेतृत्व चयनका लागि प्रयास गरिए पनि असफल भयो ।

युवा संघमा जबर्जस्ती सर्वसम्मत गर्न खोजेपछि प्रतिनिधिले निर्वाचनको माग गर्दै निर्वाचनबाटै नेतृत्व चयन गरे । सर्वसम्मत नेतृत्व चयन गर्ने प्रयास युवा संघमा मात्रै नभई अनेरास्ववियुमा समेत असफल भएको छ ।

अनेरास्ववियुको महाधिवेशनमा नेतृत्व चयनका लागि बिहीबार काठमाडौंमा मतदान हँुदै छ । निर्वाचन कार्यतालिका पटकपटक परिमार्जन गर्दै बिहीबारका लागि मतदान हुुने नयाँ कार्यतालिका आएको छ । दुई समूहका बीचमा कडा प्रतिस्पर्धा छ । महाधिवेशनको उद्घाटन गर्दै ओलीले सर्वसम्मत नेतृत्व चयन गर्न निर्देशन दिएका थिए ।

सोहीअनुसार अनेरास्ववियुमा सर्वसम्मत नेतृत्व चयनका लागि ओली, महासचिव शंकर पोखरेल, जनसंगठन समन्वय संयन्त्र प्रमुख भानुभक्त ढकाल, विद्यार्थी इन्चार्ज किशोरविक्रम मल्ललगायत नेताहरूले प्रयास गरेका थिए । तर, सर्वसम्मत नेतृत्व चयन नभएपछि अहिले दुई समूह प्रतिनिधिका बीचमा मत माग्दै अगाडि बढेका छन् ।

अध्यक्ष, उपाध्यक्ष, महासचिवदेखि सदस्यसम्म दुई समूह निर्माण भएको छ । एक समूहको नेतृत्व डा. सुजन कडरियाले गरेका छन् भने अर्को समूहको नेतृत्व प्रकाश पौडेलले गरेका छन् । कडरियाको टिममा महिला उपाध्यक्ष अञ्जना शिवाकोटी र महासचिव दीपक धामी छन् । पौडेलको प्यानलबाट महिला उपाध्यक्ष आरती भट्टराई र महासचिवमा आरके रोमस छन् ।

सोमबार महाधिवेशन हलमा एमाले स्थायी कमिटी सदस्यसमेत रहेका ढकालले सर्वसम्मत नेतृत्व चयन गर्ने भन्दै अध्यक्षमा कडरिया, उपाध्यक्षमा पौडेल, अञ्जना शिवाकोटी र महासचिव दीपक धामीको नाम प्रस्ताव गरेका थिए । तर, सो प्रस्तावविरुद्ध हलमै नाराबाजी भयो । सोमबार दिनभरि सर्वसम्मतको प्रयास जारी राखे पनि आकांक्षीहरूले र प्रतिनिधिहरूले निर्वाचनको माग गरेपछि ओलीको हाई कमान्ड सर्वसम्मत नेतृत्व चयन गर्न असफल भयो । प्रधानमन्त्री निवास बालुवाटारमा ओलीले तयार गरेको प्रस्तावित नामावली हलले अस्वीकृत ग¥यो ।

ओलीले कडरियाको नेतृत्वमा अनेरास्ववियुको नयाँ नेतृत्व चयन गर्न चाहेका थिए । त्यहीअनुसार पार्टीका नेताहरू परिचालन भएका थिए । तर, विद्यार्थीले नमानेपछि निर्वाचनको कार्यतालिका सार्वजनिक गरेर बिहीबार (आज) निर्वाचनको तयारी गरिएको छ । चुनावी प्रक्रियाका लागि अध्यक्षका दाबेदार पौडेललगायतका अन्य नेताहरूले अडान राखेका थिए ।

खुला उपाध्यक्षमा भरत धामी, धमेन्द्र केसी, विकास श्रेष्ठ, राजकुमार ढकाल र रोहित बमले उम्मेदवारी दिएका छन् । महिला उपाध्यक्षमा सुनिता धिताल र भवानी बजगाईंको पनि उम्मेदवारी परेको छ । त्यस्तै, महासचिवमा धामी र रोमसका साथै सुनिल कँडेलको उम्मेदवारी परेको छ ।

उपमहासचिव पदमा कमल जोशी, अमर शाही र प्रेमिका शाहीले उम्मेदवारी दिएका छन् । सचिवमा रक्षा बम, मदन भण्डारी, राजेश ओली, मनोज राई, गोपाल नेपाल, धर्मराज तिमिल्सेना, अनुप लामिछाने, स्मृति बराल, रेखा न्यौपाने, नीरज पौडेललगायतले उम्मेदवारी दिएका छन् । भित्रभित्र उपाध्यक्ष, उपमहासचिव र सचिवहरूलाई पनि आफ्नो समूहमा ल्याउने प्रयास दुवै समूहले गरिरहेका छन् । अध्यक्षका दुवै उम्मेदवारले आफू लोकप्रिय रहेको भन्दै चुनाव जित्ने दाबी गरेका छन् ।

निर्वाचनको प्राविधिक व्यवस्थापनका कारण अनेरास्ववियुको नेतृत्व चयनका लागि बुधबार रातिका लागि तय भएको मतदान बिहीबार (आज) बिहान मात्रै हुने निर्वाचन समितिले जनाएको छ । यसअघि निर्वाचन समितिले बुधबार राति ८ बजेदेखि २ बजेसम्म मतदातको समय तोकेकामा प्राविधिक व्यवस्थापनका कारण बिहीबार (आज) बिहानका लागि सारिएको हो । सुरक्षाकर्मीले राति मतदान गर्दा समस्या हुने भन्दै बिहीबारका लागि बिहान ८ बजेदेखि मतदान गर्ने तयारी भएको संगठनका निवर्तमान उपाध्यक्ष नारायण घर्तीले जनाएका छन् ।

अनेरास्ववियुको यो २४औं महाधिवेशन हो । मंगलबार राति २ बजेसम्म उम्मेदवारी दर्ता भएको थियो । बुधबार बिहान दाबी विरोधको प्रक्रिया टुंग्याएर १० बजेदेखि मतदान सुरु गर्ने भनिए पनि रुजुको काम समयमै नसकिएकाले ढिलाइ भएको हो । एमाले संगठन विभाग सचिव माधव ढुंगेलका अनुसार अनेरास्ववियुको जारी महाधिवेशनमा १ हजार ५ सय ३४ जना प्रतिनिधि छन् ।

९ पदाधिकारी, ४९ सचिवालय सदस्य र १ सय ५१ सदस्यीय केन्द्रीय कमिटीका लागि ५ सय २१ जनाले उम्मेदवारी दर्ता गराएका छन् । १ अध्यक्षका लागि दुई जनाको उम्मेदवारी परेको छ । २ उपाध्यक्षका लागि ९ जनाको उम्मेदवारी परेको छ । १ महासचिवका लागि ३ जना, १ उपमहासचिवका लागि ३ जना र ४ सचिवका लागि ३६ जनाको उम्मेदवारी परेको छ ।

नेताहरूले अझै पनि सहमतिमै नेतृत्व चयन प्रक्रिया टुंग्याउने तयारी आन्तरिक रूपमा गरिरहेको भए पनि अध्यक्षका प्रत्याशी प्रकाश पौडेल र डा. सुजन कडरियाले छुट्टाछुट्टै समूह बनाएर मत मागिरहेका छन् । अनेरास्ववियुको महाधिवेशन काठमाडौंको कीर्तिपुरस्थित त्रिवि स्मृति भवनमा २५ जेठदेखि जारी छ ।