काठमाडौं । भाषा आयोगले सवारीसाधनमा राखिने इम्बोस्ड नम्बर प्लेट नेपाली भाषामै राख्न सरकारको ध्यानाकर्षण गराएको छ ।
इम्बोस्ड नम्बरमा लेखिने अक्षर अंग्रेजी भाषामा राख्ने निर्णय भएपछि सरकारको चौतर्फी आलोचना भइरहेको छ । यस विषयमा सर्वोच्च अदालतमा समेत मुद्दा विचाराधीन रहेका बेला आयोगले नेपाली भाषामै नम्बर राख्न भनेको हो ।
आयोगले अंग्रेजी भाषालाई संविधानले नै नचिनेको भाषा भन्दै सवारीसाधनको विद्युतीय नम्बरप्लेट नेपाली भाषामा राख्न स्मरण गराएको छ ।
आयोगका अध्यक्ष डा. गोपाल ठाकुरले मंगलबार एक विज्ञप्ती जारी गर्दै ‘संविधानको धारा ७ को उपधारा १ मा देवनागरी लिपीमा लेखिने नेपाली भाषा सरकारी कामकाजको भाषा भएकाले विद्युतीय संकेत संख्या नेपाली भाषामा राख्न’ स्मरण गराएको छ ।
सरकारी कामकाजको भाषामा संविधानमै लेखिएको बाहेकको हकमा भाषा आयोगको सिफारिस आवश्यक हुने संवैधानिक प्रावधान स्मरण गराउँदै घुमाउरो हिसाबले सरकारलाई आफ्नो निर्णयमा गम्भीर हुन ध्यानाकर्षण गराएको छ ।
