राजविराज । फागुन २१ गते हुने प्रतिनिधिसभा निर्वाचनका क्रममा मतदातालाई आकर्षण गर्न उम्मेदवारहरुले फरक–फरक शैलीमा चुनावी प्रसारप्रसार गरी रहेका छन् ।
यसैक्रममा नेपाल जनता पार्टीले बिहीबार सप्तरीमा चारवटै निर्वाचन क्षेत्रका आफ्ना उम्मेदवारलाई साधुसन्तबाट आशिर्वाद दिलाउँदै चुनावी प्रचारप्रसार अभियान सुरु गरेका छन् ।
सदरमुकाम राजविराज स्थित क्याम्पस खेलमैदानमा सयौंको संख्यामा भेला भएका साधुसन्तबाट आशिर्वाद थाप्दै उम्मेदवारहरु आ–आफ्नो क्षेत्रमा फर्कि प्रसारप्रसार अभियान शुरु गरेको पार्टीका जिल्ला प्रवक्ता ललन मंडलले जानकारी दिए ।
हिन्दुवादी संगठनको रुपमा चिनिएका सो पार्टीका उम्मेदवारहरुले हिन्दु घर्म गुरु र साधुसन्तको आशिर्वाद लिदै विधिवत रुपमा चुनावी प्रसारप्रचारमा जुटेको बताएका छन् । उक्त पार्टीबाट सप्तरीको निर्वाचन क्षेत्र नम्बर १ मा दिपेन्द्र प्रसाद यादव, क्षेत्र नम्बर २ मा
रञ्जु झा ठाकुर, क्षेत्र नम्बर ३ मा डा. सन्तोष चमन यादव र क्षेत्र नम्बर ४ मा कोशल किशोर दास उम्मेदवार छन् ।
कार्यक्रममा पुर्व साँसद एवं नेजपाका महामन्त्री समेत रहेकी रञ्जु झा ठाकुरले धर्मगुरु र साधुसन्तबाट आशिर्वाद लिई सुरुभएको प्रचारप्रसार अभियान अन्तर्गत अन्य माध्यमबाट समेत मतदाता संग जोडिने कार्यक्रमहरु सञ्चालन हुने जानकारी दिईन । सो अवसरमा उनले क्षेत्रको समग्र विकासका लागि आफुहरुले काम गर्ने प्रतिवद्धता सहित मतदातालाई सहयोग गर्न अपिल गरेकी थिईन् । उक्त पार्टीद्वारा जारी गरिएको संकल्पपत्रमा संघीय गणतान्त्रिक सहितको पुर्ण लोकतान्त्रिक हिन्दु सनातन राष्ट्र निर्माण, सबै जातजाती धर्मावलम्वी र क्षेत्रको न्यायोचित समावेशीकरण, समानुपातिक प्रतिनिधित्व, शिक्षा, स्वास्थ्य, खेलकुद, सांस्कृतिक र पत्रकारिता क्षेत्रको उत्थान लगायतका विषयलाई प्राथमिकतामा राखिएको छ ।
जिल्ला अध्यक्ष दिपेन्द्र यादवको अध्यक्षतामा आयोजित उक्त कार्यक्रममा पार्टीका केन्द्रिय अध्यक्ष त्रिभुवननाथ पाठक, सचिव जयनाथ यादव, मधेश प्रदेश प्रदेश अध्यक्ष शत्रुघन प्रसाद साह तथा महन्थ मोतीदास बैरागी लगायतले उम्मेदवारको पक्षमा आ–आफ्नो विचार राखेका थिए ।
