सुन्दरहरैंचा(मोरङ) । नेपाली कांग्रेस मोरङ क्षेत्र नं. ६ ले आयोजना गरेको ‘जरा अभियान’ कार्यक्रममा बोल्दै क्षेत्रीय सभापति देवराज तामाङले पार्टी संगठनलाई जरो तहसम्म सुदृढ बनाउँदै जनतासँगको सम्बन्ध अझ मजबुत बनाउनुपर्नेमा जोड दिएका छन्।

उनले पार्टीभित्रको एकता, स्पष्ट राजनीतिक एजेण्डा र कार्यकर्तामाझको समन्वय अभावका कारण विगतका निर्वाचनहरूमा कांग्रेसले अपेक्षित नतिजा हासिल गर्न नसकेको उल्लेख गर्दै अब त्यसबाट पाठ सिकेर अघि बढ्नुपर्ने बताएका हुन्।

‘जरा अभियान’लाई संगठन सुदृढीकरणको महत्वपूर्ण अभियानका रूपमा व्याख्या गर्दै तामाङले नेपाली कांग्रेसलाई गाउँ–टोल तहसम्म थप सक्रिय, जनमुखी र जिम्मेवार बनाउने दिशामा सबै नेता–कार्यकर्ता एकजुट भएर लाग्नुपर्ने धारणा राखे। उनले पार्टीको शक्ति केवल नेतृत्व तहमा सीमित नरहने, बरु जरो तहका कार्यकर्ताको सक्रियता, समर्पण र जनतासँगको प्रत्यक्ष सम्बन्धमै संगठनको वास्तविक बल निहित रहने बताए।

उनले विगतका निर्वाचन परिणामको समीक्षा गर्दै पार्टीभित्र समयमै स्पष्ट रणनीति, साझा एजेण्डा र सशक्त चुनावी तयारी नहुँदा हार बेहोर्नुपरेको स्वीकार गरे। “हामीले अब विगतका कमजोरीहरूलाई खुलेर समीक्षा गर्दै सुधारको बाटो समात्नुपर्छ,” उनले भने, “व्यक्तिगत स्वार्थभन्दा माथि उठेर पार्टी र जनताको हितलाई केन्द्रमा राखेर अघि बढ्न सके नेपाली कांग्रेस फेरि जनविश्वासको केन्द्र बन्न सक्छ।”

तामाङले आगामी दिनमा कांग्रेसलाई थप एकताबद्ध, अनुशासित र जनअपेक्षाअनुसार रूपान्तरण गर्नुपर्ने आवश्यकता औंल्याउँदै पार्टीभित्र देखिने गुटगत सोच र अनावश्यक विवादले संगठन कमजोर बनाउने चेतावनी पनि दिए। उनले कार्यकर्ताहरूलाई पार्टीको नीति, सिद्धान्त र लोकतान्त्रिक मूल्य–मान्यतालाई आत्मसात गर्दै जनताका मुद्दा उठाउन सक्रिय भूमिका खेल्न आग्रह गरे।

कार्यक्रममा सहभागी नेता तथा कार्यकर्ताहरूले पनि ‘जरा अभियान’ले संगठनलाई पुनर्जागृत गर्ने, कार्यकर्तामा नयाँ ऊर्जा थप्ने र जनस्तरसम्म कांग्रेसको पहुँचलाई अझ प्रभावकारी बनाउने विश्वास व्यक्त गरेका थिए। स्थानीय तहदेखि क्षेत्रीय संरचनासम्म पार्टीलाई चलायमान, एकीकृत र परिणाममुखी बनाउने उद्देश्यसहित सञ्चालन गरिएको यो अभियानलाई कांग्रेसको संगठनात्मक पुनर्संरचना र राजनीतिक पुनर्जागरणको प्रयासका रूपमा हेरिएको छ।

सम्बन्धित समाचार

सुन्दरहरैचामा सुकुम्बासीमाथि डोजर नचलाउन स्थानीय सरकारलाई सभापति तामाङको आग्रह कूटनीतिक राहदानी दुरुपयोग रोक्न कडाइ गर्ने दलहरूको सहमति सम्पत्ति छानबिन आयोगले सुरु गर्‍यो काम मन्त्रिपरिषद् बैठक सिंहदरबारमा जारी रास्वपा सभापति लामिछानेको मुद्दाको सुनुवाइ स्थगित शेखर गोल्छा पक्राउ परेसँगै उच्च निगरानीमा शाह, मोर र गुप्ता सुकुम्बासी बस्तीहरू हटाउँदा मौलिक अधिकारको सम्मान गर्न आग्रह प्रधानमन्त्री शाहले बोलाए मन्त्रिपरिषद् बैठक