वीरगन्ज । मधेश प्रदेशको एक मात्र महानगरपालिका ‘वीरगन्ज’ ले अघिल्लो वर्षभन्दा ७३ करोड २२ लाख २३ हजार सिलिङ्ग बढाएर आगामी आर्थिक वर्षको नीति तथा कार्यक्रम ल्याएको छ । महानगरप्रमुख राजेशमान सिंह विभिन्न मुद्दा हुँदै अख्तियारको भ्रष्टाचार मुद्दामा निलम्बन भएपछि उपप्रमुख इम्तियाज आलम नेतृत्वको महानगरपालिकाले अघिल्लो बर्षभन्दा अझ बजेटको आकार बढाएर आगामी वर्षको नीति तथा कार्यक्रम ल्याएको हो ।

बिषम परिस्थितिका बीच वीरगन्ज महानगरपालिकाले आर्थिक वर्ष ०८३-०८४ का लागि ल्याएको नीति तथा कार्यक्रम ४ अर्ब ४२ करोड ३४ लाख ६९ हजारको रहेको छ । जबकी अघिल्लो वर्ष सामान्य अवस्थामा महानगर प्रमुख सिंहकै नेतृत्वमा रहेको बखत पनि यो प्रदेशको एकमात्र महानगरपालिका वीरगन्जले कुल ३ अर्ब ६९ करोड १२ लाख ४६ हजारको मात्र बजेट ल्याएको थियो । तर यो वर्ष त्योभन्दा ठूलो आकारको बजेट कार्यवाहक महानगर प्रमुख आलमको नेतृत्वको महानगरपालिकाले ल्याएको तथ्याँकले पुष्टि गरेको छ ।

उपप्रमुख कार्यवाहक महानगर प्रमुख बनेपछि सबै वडाध्यक्षहरु मध्ये जेष्ठताको आधारमा वीरगन्ज महानगरपालिकाको आगामी बजेट वडा नम्बर ४ का वडाध्यक्ष जगत साह कानुले सार्वजनिक गरे । उनले सार्वजनिक गरेको आगामी आर्थिक वर्षको बजेटमा चालु तर्फ २ अर्ब ४० करोड ३४ लाख ८५ हजार विनियोजन गरेको छ । यो भनेको कुल बजेटको ५४ दशमलब ३ प्रतिशत हो । त्यसैगरी पूँजिगत तर्फ रु. १ अर्ब ९६ करोड ९९ लाख ८४ हजार रहेको छ । यो पनि कुल बजेटको ४४ दशमलब ६ प्रतिशत हो । त्यसैगरी वित्तीय व्यवस्था तर्फ भने ५ करोड अर्थात १ दशमलब १ प्रतिशत विनियोजन गरेको वडाध्यक्ष कानुले बताए ।

आन्दानीको श्रोत
बजेट खर्चको उक्त तथ्याँक अनुसार आन्दानीको श्रोत तर्फ भने संघीयअन्तर सरकारी वित्तीय हस्तान्तरणबाट रु.१ अर्ब ९८ करोड २९ लाख, संघीयकै राजश्व बाँडफाँडबाट २४ करोड ६८ लाख ८३ हजार र प्रदेशअन्तर सरकारी वित्तीय हस्तान्तरणबाट ५ करोड २८ हजार, प्रदेश राजश्व बाँडफाँडबाट रु.१ करोड ६७ लाख १४ हजार, घरजग्गा रजिष्ट्रेशन शुल्क वापत रु. ४५ करोड, आन्तरिक राजश्वबाट १ अर्ब ४८ करोड र गतवर्षको नगद मौज्दातबाट ४ करोड ६९ लाख ४४ हजार तथा नगर विकास कोषबाट रु. १५ करोड संकलन हुने अनुमान गरिएको छ ।

बजेटको सिलिङ्ग बढेर आए अनुसार आन्दानीका श्रोतको भने भरपर्दो अवस्थाका नहुनुले चालु आर्थिक वर्ष जस्तो आगामी आर्थिक वर्ष पनि घाटाको बजेट हुनसक्ने विरगन्ज महानगरपालिकाका आर्थिक विश्लेषकहरुको भनाइ छ । कारण चालु आर्थिक वर्ष नै हालसम्म समानीकरण अनुदानतर्फ रु. ३३ करोड १६ लाख, राजश्व तर्फ रु.२२ करोड ८३ लाख, सशर्त अनुदानतर्फ रु.९३ करोड ७२ लाख, समपुरक अनुदानतर्फ रु. ७७ लाख र विशेष अनुदान तर्फ १ करोड ३५ लाख गरी कुल १ अर्ब ५१ करोड ८३ लाख मात्र प्राप्त हुनुले आगामी वर्षको पनि संकेत राम्रो नभएको उनीहरुको दावी छ ।

प्रदेशतर्फको एक पैसामा पनि आएनः महानगर
चालु आर्थिक वर्षका लागि प्रदेशतर्फबाट आउने भनिएको समानीकरण अनुदानतर्फको २ करोड ७५ लाख, राजश्वतर्फ वाँडफाँडको १ करोड ६७ लाख, सशर्त अनुदानतर्फको १ करोड ७५ लाख र शिषेश अनुदानतर्फको रु ५० लाखलगायत गरी कुल ६ करोड ६७ लाख अनुमान गरिएको बजेट हालसम्म नआउनुले वीरगन्ज महानगरपालिकाको आगामी बजेट पनि सुखद् नहुने आर्थिक विश्लेषकहरुको तर्क गलत भन्न सक्ने अवस्था छैन । आन्तरिक श्रोततर्फ पनि हालसम्म ५३ करोड मात्र संकलित रकमको सिलिङ्ग रहेको आगामी वर्षको बजेट प्रस्तुत गर्दै वडाध्यक्ष कानुले तथ्य सार्वजनिक गरे ।

महानगरपालिकाले असारसम्मको लक्ष्य ७० करोड राखेको छ । यो पनि घाटाकै बजेट रहेको अनुमान आर्थिक विश्लेषकहरुको छ । यस्तो परिस्थितिमा वीरगन्ज महानगरपालिकाले आगामी वर्षका लागि लिएको लक्ष्यमा बजेट श्रोतकै अस्पष्टता देखिएको वीरगन्ज उद्योग बाणिज्य संघका अध्यक्ष हरिप्रसाद गौतमले बताए । बजेट निकै सन्तुलनको ल्याइए पनि त्यो व्यवहारिक रुपमा जटिल रहेको उनको तर्क छ ।

लक्ष्य भेट्ने गरी काम हुन्छ : कार्यवाहक नगरप्रमुख आलम
बजेट श्रोत संकलनमाथि स्थानीयले आशंका जनाए पनि वीरगन्ज महानगरपालिकाले आगामी वर्ष गर्ने नयाँ योजनाको कार्यदिशा र लक्ष्यका ’bout कार्यवाहक नगरप्रमुख ईम्तियाज आलमले प्रष्ट खाका सार्वजनिक गरे । उनले जेनजी आन्दोलनमा ध्वस्त बनाइएको महानगरपालिकाको मुख्य प्रशासनीक भवन, वडा नम्बर १०, १४ र २६ को प्रशासनीक भवन निर्माणदेखि शिक्षा, स्वास्थ्य, वन, वातावरण तथा विपत् व्यवस्थापनसम्मको प्रष्ट खाका वीरगन्ज महानगरपालिकाका कार्यवाहक नगरप्रमुख आलमले सार्वजनिक गरे ।

‘औद्योगिक तथा व्यापारिक शहर, सुशंस्कृति सभ्य हाम्रो वीरगन्ज महानगर’ भन्ने नारा सहित वीरगन्ज महानगरपालिकाको २० औं नगरसभा अधिवेशनमा प्रस्तुत नीति तथा कार्यक्रम पालनामा महानगर सकृय भएर उत्रिने महानगरपालिकाका प्रमुख प्रशासकीय अधिकृत बसन्त बहादुर बोहोराले बताए । अनुमानित बजेटकै आधारमा अगाडी बढ्दा लक्ष्य पनि भेटिने उनको भनाइ छ ।

१४ वटा स्थानीय पालिका रहेको पर्सामा ठोरी गाउँपालिका, सखुवाप्रसौनी गाउँपालिका, पटेर्वा सुगौली गाउँपालिका, पोखरिया नगरपालिका, वीरगन्ज महानगरपालिका सहित अधिकांश पालिकाहरुले असार १० भित्र गाउँ सभा तथा नगरसभा गरेका छन् ।

सम्बन्धित समाचार

‘मधेश ट्राभल मार्ट’ पर्यटन प्रर्वद्धनको अर्को आयाम नेपाल राष्ट्र बैंक(तेस्रो संशोधन) विधेयक, २०८३ सर्वसम्मतिले स्वीकृत आरोप प्रमाणित भए मन्त्री मात्रै नभई सार्वजनिक जीवन नै त्याग्ने अर्थमन्त्रीको घोषणा बेरुजुको समस्या नीतिगत तथा व्यवहारिक रुपमा सम्बोधन गर्न जोड आज सातवटै प्रदेशको बजेट आउँदै पवित्र धार्मिक स्थल गन्याप शिखर पुग्ने पदमार्ग निर्माण हुँदै ‘मधेश सरकारको बजेट बिचौलिया पोस्ने खालको’ नेप्सेले पायो नयाँ नेतृत्व, अमृत लम्साल अध्यक्षमा नियुक्त