डडेलधुरा । एक दशकयता अलपत्र अवस्थामा रहेको सिँचाइ योजना सम्पन्न हुँदा स्थानीयमा सिँचाइ गर्न पाउने आशा पलाएको छ । भागेश्वर गाउँपालिका–४ को सबैभन्दा ठूलो नौगाउँ–डुङरी–किमोला गाउँ क्षेत्रको हजारौं रोपनी जमिनमा सिँचाइको व्यवस्था पु¥याउने योजना अलपत्र परेको एक दशकपछि यस वर्ष सम्पन्न हुने चरणमा रहेको छ ।

आकाशे पानीको भरमा खेती गर्दै आएका यहाँका बस्तीका बारीमा सिँचाइ गर्न आर्थिक वर्ष २०७२÷२०७३ मा तीन करोड रुपैयाँ बढी रकममा निर्माणका लागि ठेक्का लगाइएको थियो । यस क्षेत्रका आधा दर्जन बस्तीको हजारौं रोपनी जमिनमा सिँचाइ गर्ने उद्देश्यले योजना निर्माणको काम थालिएको थियो । तर योजना सम्पन्न नहुँदै अलपत्र पारिएपछि जमिन बाँझो हुँदै गर्दा बस्ती रित्तिँदै गएका थिए ।

दुई वर्षमा काम सम्पन्न गर्ने गरी भएको ठेक्का सम्झौताको काम चालु आर्थिक वर्षमा ठिक १० वर्षपछि सम्पन्न हुने चरणमा छ । योजना निर्माणका लागि जलस्रोत तथा सिँचाइ विकास डिभिजन कार्यालय डडेलधुराले शर्मा थेगिम जेभी निर्माण कम्पनी कैलालीसँग २०७२ साल जेठ महिनामा ठेक्का सम्झौता गरेको थियो ।

नौगाउँ–डुङ्री नेपाली कांग्रेसका नेता एवं पूर्वसिँचाइ एवं परराष्ट्रमन्त्री एनपी साउदको पहाड घर हो । उनी सिँचाइ मन्त्री हुँदा गाउँमा सिँचाइको योजना परेको थियो । जलस्रोत तथा सिँचाइ विकास डिभिजन कार्यालय डडेलधुराका डिभिजन अधिकृत अमर पालका अनुसार निर्माण कम्पनीले सुरुमा बनाएका आठ वटा पोखरी हाल जीर्ण भइसकेका थिए । हाल ती पोखरीभित्रै नयाँ पोखरी निर्माण गरिएका छन् । गाडिएका पाइपसमेत चोरी भएपछि अहिले नयाँ पाइप जडान गरिएको छ ।

निर्माण कम्पनी कालोसूचीमा पर्ने खतरा बढेपछि हाल सिँचाइ योजनाको काम धमाधम गरिएको उनले जानकारी दिए । निर्माण कम्पनीले सुरुको वर्ष पानीको मूलबाट पाइप बिछ्याई गाड्ने र आरसीसी ढलान गरी पोखरी निर्माण गर्ने काम गरेको थियो । तर काम अधुरै गरेर छाडेपछि निर्माण गरिएका पोखरी जीर्ण बनेका थिए ।

कार्यालयका प्राविधिक रोशन भट्टका अनुसार महाभारत पर्वतमा रहेको विसानकन्या जंगलको मूलबाट सिँचाइको पानी नौगाउँ पु¥याइएको हो । यसको दूरी आठ हजार ३०० मिटर रहेको छ । एक सेकेन्डमा २५ लिटर पानी खस्ने गरी २०० एमएमको पाइपमा गाउँमा पानी पु¥याइएको उनले बताए ।

यस योजनाको नाला बनाउने काम उपभोक्ता समितिबाट गरिने सम्झौता गरिए पनि हाल निर्माण कम्पनी आफैले गरेको वडा नम्बर ४ का वडाध्यक्ष वसन्तराज चटौतले बताए । सिँचाइ योजना सम्पन्न भए पारिलो क्षेत्रका यी गाउँको उर्वरभूमिमा प्रशस्त अन्नबाली उत्पादन हुने आसमा स्थानीय रहेको उनको भनाइ छ ।

स्थानीय चक्रबहादुर ठकुराठीका अनुसार गाउँमा सिँचाइ योजनाको काम सम्पन्न भए व्यावसायिक रूपमा बेमौसमी तरकारी खेती, आकाशे भरमा गर्नु पर्ने बाध्यता अन्त्य हुने छ । व्यावसायिक रूपमा पशुपालनसमेत गर्न स्थानीयलाई निकै सहज हुने छ ।

सम्बन्धित समाचार

नियमित सरसफाइ, फोहोर व्यवस्थापन र जनसहभागिताले धनगढी सफा र व्यवस्थित बन्दै बाजुरालाई पूर्ण खोप सुनिश्चितता र दिगोपना घोषणा स्याउले बजारमा खानेपानी राहत: ३२० फिट गहिराइमा डिप बोरिङबाट पानी भेटियो पत्रकार खेम भण्डारी पक्राउ बिना हेलमेट बुलेट चलाएका मुख्यमन्त्री कमलबहादुर शाहलाई ५०० रुपैयाँ जरिवाना बर्दियाबाट सुरु भयो लालपुर्जा वितरण अभियान बैतडीमा घर भत्किँदा तीन जना घाइते